ទឹកត្រីកំពត ត្រៀមលក្ខណៈចេញទៅប្រកួតប្រជែង នៅក្រៅប្រទេស

2018-12-13 03:30:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ផលិតផលទឹកត្រីដ៏ល្បីឈ្មោះនៃខេត្តកំពត កំពុងត្រៀមលក្ខណៈនាំចេញទៅប្រកួតប្រជែង និងដាក់លក់នៅលើទីផ្សារអន្តរជាតិ ដូចផលិតផលម្រេចនៃខេត្តភាគនិរតីមួយនេះដែរ។ ក្នុងចំណោមសិប្បកម្មចំនួន ៧កន្លែងនៅទូទាំងខេត្ត ក្នុងមួយឆ្នាំ ទិន្នផលនៃការផលិតទឹកត្រីមានបរិមាណប្រមាណជិតមួយ ១,៥លានលីត្រ។

លោក ចាន់ ស៊ីថា ប្រធានក្រុមហ៊ុនផលិតទឹកត្រីង៉ូវ ហេងកំពត ដែលមានមូលដ្ឋានស្ថិតក្នុងភូមិតាអង្គ សង្កាត់ត្រើយកោះ ក្រុងកំពតបានប្រាប់ឲ្យដឹងថា ក្រុមហ៊ុនរបស់លោកកំពុងត្រៀមលក្ខណៈសម្បត្តិ ដើម្បីនាំទឹកត្រីដែលជាផលិតផលប្រចាំខេត្តកំពត ចេញទៅលក់នៅលើទីផ្សារអន្តរជាតិ។ កន្លងមក ផលិតផលរបស់លោក ផ្តោតជាសំខាន់តែលើទីផ្សារក្នុងប្រទេសប៉ុណ្ណោះ។

តែឥឡូវ ក្រុមហ៊ុននឹងបំពេញនូវលក្ខខណ្ឌមួយចំនួនដើម្បីនាំទៅលក់នៅទីផ្សារអន្តរជាតិ។ ជាមួយគ្នានេះ លោកក៏សំណូមពរចំពោះស្ថាប័នពាក់ព័ន្ធ ឲ្យជួយបង្កលក្ខណ:ងាយស្រួល និងគាំទ្រការនាំចេញទឹកត្រីដែលជាស្នាដៃរបស់ខ្មែរ ដើម្បីបានចូលរួមប្រកួតប្រជែងក្នុងទីផ្សារអន្តរជាតិនោះ។ លោកប្រធានក្រុមហ៊ុនបានសម្តែងក្តីរំពឹងថា ការនាំចេញនេះនឹងទទួលបានប្រាក់ចំណេញច្រើនហើយបង្កើនការងារសម្រាប់ប្រជាពលរដ្ឋក្នុងស្រុកកាន់តែច្រើនឡើង។

លោកចាន់ ស៊ីថា បានបញ្ជាក់ថា ទឹកត្រីរបស់លោក ជាប្រភេទទឹកត្រីផលិតពីត្រីកាកឺមស្រស់ យកពីសមុទ្រ ដាក់ត្រាំជាមួយអំបិលក្នុងធុងឈើដែលធុងនីមួយៗ អាចផ្ទុកបានពី ៥តោនទៅ ១៥តោន។នៅពេលរក្សាទុកបានគ្រប់មួយឆ្នាំ ទើបធ្វើឲ្យទឹកត្រីនោះ មានរសជាតិឈ្ងុយឆ្ងាញ់ និងប្រកបដោយអនាម័យល្អ។

លោកប្រធានក្រុមហ៊ុនបានបន្តថា អាជីវកម្មទឹកត្រីរបស់លោកនៅតែមានការកើនឡើង ដោយមួយខែៗ ក្រុមហ៊ុនអាចផលិតប្រភេទលេខ១ លេខ២ និងលេខ៣ បានជាង ១០ម៉ឺនលីត្រ ជាមួយមានអ្នកជំនាញ ព្រមទាំងកម្មករផលិតផ្ទាល់សរុបជាង ៥០នាក់។

លោក សុខ គឹមជឿន ប្រធានមន្ទីរឧស្សាហកម្ម និងសិប្បកម្មខេត្តកំពត បានឲ្យដឹងថា នៅទូទាំងខេត្តមានសិប្បកម្មផលិតទឹកត្រីតូចធំចំនួន ៧កន្លែង ដោយមួយឆ្នាំៗបរិមាណផលិតបានជាមធ្យមប្រមាណ១ ៤៥០ ០០០លីត្រ។ មន្ទីរជំនាញតែងគាំទ្រ និងលើកទឹកចិត្តដល់សហគ្រាសផលិតទឹកត្រីទាំងអស់ដែលមាននៅក្នុងខេត្តកំពតរហូតមកដល់បច្ចុប្បន្ន។

លោកប្រធានមន្ទីរបានបញ្ជាក់ថា ពេលមានការតាំងពិព័រណ៍ថ្នាក់ជាតិ ឬអន្តរជាតិ អាជ្ញាធរខេត្តតែងតែបង្កលក្ខណៈដល់ម្ចាស់សហគ្រាសផលិតទឹកត្រីទាំងនោះ បាននាំយកផលិតផលរបស់ខ្លួនចូលរួមផ្សព្វផ្សាយដើម្បីឲ្យគេស្គាល់នូវលក្ខណៈពិសេស ក៏ដូចជារសជាតិរបស់ទឹកត្រីខេត្តកំពតទៀតផង៕

ប្រភព៖ រស្មីកម្ពុជា ប្រែសម្រួល៖ លាភ.