ADB ផ្តល់ប្រាក់កម្ចី ៧០លានដុល្លារ សម្រាប់កែលម្អផ្លូវជាតិចំនួន២ នៅកម្ពុជា
- 2018-12-13 04:35:29
- ចំនួនមតិ 0 | ចំនួនចែករំលែក 0
ADB ផ្តល់ប្រាក់កម្ចី ៧០លានដុល្លារ សម្រាប់កែលម្អផ្លូវជាតិចំនួន២ នៅកម្ពុជា
ចន្លោះមិនឃើញ
ធនាគារអភិវឌ្ឍន៍អាស៊ី (ADB) បានសម្រេចផ្តល់ប្រាក់កម្ចីសម្បទានប្រមាណ ៧០លានដុល្លារ សម្រាប់កែលម្អ និងលើកកម្ពស់កំណាត់ផ្លូវជាតិលេខ១ និងលេខ៦។ ពិធីចុះហត្ថលេខាទទួលប្រាក់កម្ចីនេះ គឺធ្វើឡើងរវាងលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងតំណាងមកពី ADB នៅថ្ងៃទី១៣ ខែធ្នូ ឆ្នាំ២០១៨។
យោងតាមសេចក្តីប្រកាសព័ត៌មានរបស់ក្រសួងសាធារណការ ឱ្យដឹងថា ថវិកានេះនឹងត្រូវយកទៅប្រើប្រាស់សម្រាប់លើកកម្រិតផ្លូវជាតិលេខ១ ចន្លោះពីអ្នកលឿងទៅបាវិត(គីឡូម៉ែត្រលេខ៦៣+៣០០ ដល់គីឡូម៉ែត្រលេខ ១៥៩+០០០) ពីកម្រាលកៅស៊ូ DBST នាពេលប្ចុប្បន្នទៅជាកម្រាលកៅស៊ូ AC។ ចំណែកកំណាត់ផ្លូវជាតិលេខ៦វិញ គឺត្រង់ចន្លោះពីក្រុងសៀមរាប ទៅក្រឡាញ់ (គីឡូម៉ែត្រលេខ៣១៧+៦៣០ ដល់គីឡូម៉ែត្រលេខ៣៦៧+៥១២) ដែលបច្ចុប្បន្នមានកម្រាលកៅស៊ូ ACស្រាប់ហើយនោះ នឹងត្រូវសាងសង់លូសងខាងផ្លូវដើម្បីរំដោះទឹកភ្លៀងចេញ។
មិនតែប៉ុណ្ណោះថវិកាខាងលើនេះ ក៏នឹងយកទៅស្ថាបនាមន្ទីរពិសោធន៍ សម្ភារៈសំណង់ចំនួន ៤កន្លែង នៅខេត្តក្រចេះ កំពត សៀមរាប និងពោធិ៍សាត់ ដើម្បីបង្កលក្ខណៈងាយស្រួលឲ្យក្រសួងសាធារណការ និងដឹកជញ្ជូន អាចត្រួតពិនិត្យបច្ចេកទេសការស្ថាបនាផ្លូវថ្នល់ ឲ្យកាន់តែមានគុណភាពរឹងមាំល្អដែរ។
សូមរំលឹកថា កាលពីចុងខែតុលាកន្លងទៅ ក្រសួងសាធារណការ បានចុះហត្ថលេខាលើអនុស្សារណៈនៃការយោគយល់ជាមួយក្រុមហ៊ុនកូរ៉េ Korea Consultants International (KCI) ដែលមានទឹកប្រាក់ជាង ៣លានដុល្លារ លើគម្រោងការងារត្រួតពិនិត្យ និងគាំទ្រការអនុវត្តគម្រោងកែលម្អ និងលើកកម្រិតបណ្ដាញកំណាត់ផ្លូវជាតិទាំង២នេះ៕
អត្ថបទទាក់ទង៖
ផ្លូវជាតិលេខ១ និងលេខ៦ នឹងត្រូវស្ថាបនាកែលម្អ នាដើមឆ្នាំក្រោយ
ក្រសួងសាធារណការ និងក្រុមហ៊ុនកូរ៉េ ចុះ MoU លើគម្រោងជាង៣លានដុល្លារ