Samsung បិទរោងចក្រដំឡើងទូរសព្ទ នៅចិន

2018-12-13 06:49:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហ៊ុន Samsung បានប្រកាសបិទដំណើរការរោងចក្រមួយកន្លែង នៅក្នុងប្រទេសចិន បន្ទាប់ពីការលក់បានធ្លាក់ចុះ និងការប្រកួតប្រជែងទូរសព្ទដែលមានតម្លៃថោកជាង កើតឡើងពីសំណាក់ក្រុមហ៊ុនក្នុងស្រុក។

រោងចក្រ Samsung នៅក្រុង Tianjin ប្រទេសចិន នឹងត្រូវបិទទ្វារ នៅដំណាច់ឆ្នាំ២០១៨ (រូបថត៖ pocketnow.com)

យោងតាមក្រុមហ៊ុនផ្នែកស្រាវជ្រាវទីផ្សារ Counterpoint បានឲ្យដឹងថា ក្នុងត្រីមាសទីមួយ ឆ្នាំ២០១៨ ភាគហ៊ុនរបស់ Samsung ក្នុងទីផ្សារចិន បានធ្លាក់ចុះ ១% ធ្វើឲ្យ Samsung ចាញ់ក្នុងការប្រកួតប្រជែងពីសំណាក់ Huawei ។

ក្នុងសេចក្ដីថ្លែងការណ៍របស់ Samsung បានបញ្ជាក់ថា ខ្លួននឹងបិទរោងចក្រនៅក្នុងក្រុង Tianjin ភាគខាងជើងប្រទេសចិន ដើម្បីពង្រឹងប្រសិទ្ធភាពរោងចក្រផលិតកម្ម។ រោងចក្រនៅក្រុង Tianjin មាន កម្មករ បុគ្គលិកប្រហែល ២៦០០ នាក់ និងត្រូវបិទនៅដំណាច់ឆ្នាំ២០១៨នេះ។ ក្រុមហ៊ុនបន្តថា បុគ្គលិក នឹងទទួលបានសំណង និងត្រូវផ្ដល់ឱកាសឲ្យផ្លាស់ទៅបម្រើការនៅរោងចក្រ Samsung ណាមួយផ្សេងទៀត។

យ៉ាងណាក៏ដោយ Samsung អះអាងថា រោងចក្ររបស់ខ្លួនមួយកន្លែងទៀត នៅក្រុង Huizhou ខេត្ត Guangdong ប្រទេសចិន នឹងដំណើរការជាធម្មតា។

អ្នកវិភាគជាន់ខ្ពស់ខាងសន្តិសុខរបស់ក្រុមហ៊ុន Hyundai Motor លោក Greg Roh បាននិយាយថា Samsung មិនគួរបន្តដំណើរការរបស់ខ្លួននៅប្រទេសចិននោះទេ ដោយសារតែកំណើនតម្លៃពលកម្ម ហើយ Samsung ស្ទើរតែគ្មានចំណែកភាគហ៊ុនក្នុងទីផ្សារចិន។ លោកថា Samsung គួរតែគិតគូរពីប្រទេសឥណ្ឌា និងវៀតណាមវិញ។

សូមបញ្ជាក់ថា រោងចក្រ Samsung នៅក្រុង Tianjin ផលិត ស្មាតហ្វូនបាន ៣៦លានគ្រឿងក្នុងមួយឆ្នាំ ខណៈរោងចក្រនៅក្រុង Huizhou ផលិតបាន ៧២លានគ្រឿងក្នុងមួយឆ្នាំ។ ដោយឡែក រោងចក្រ Samsung នៅវៀតណាម ចំនួនពីរ រួមគ្នាអាចផលិតបាន ២៤០លានគ្រឿងក្នុងមួយឆ្នាំ៕

ប្រភព៖ Reuters ប្រែសម្រួល៖ លាភ.