សិង្ហបុរី ចេញវិធានការថ្មីមួយ ធានាគ្មានភាគីទី៣ លូកដៃដោយឯកតោក្នុងជម្លោះដែនទឹិកជាមួយម៉ាឡេស៊ី

2018-12-13 07:21:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រទេសសិង្ហបុរីបានធ្វើសេចក្តីប្រកាសមួយក្រោមអនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS) ដើម្បីធានាថា គ្មានប្រទេសហត្ថលេខីណាមួយនៃអនុសញ្ញាអន្តរជាតិនេះ អាចចាប់ផ្ដើមធ្វើជាភាគីទី៣ នៃការសម្របសម្រួល ឬមជ្ឈិតកម្មដោយឯកតោភាគី លើជម្លោះដែនទឹករវាងសិង្ហបុរី និងម៉ាឡេស៊ីនោះទេ។ នេះបើតាមការបញ្ជាក់របស់អ្នកនាំពាក្យក្រសួងការបរទេសសិង្ហបុរី នៅថ្ងៃទី១៣ ខែធ្នូ ២០១៨នេះ។

រូបភាព៖ Straits Time

សិង្ហបុរីជឿជាក់ថា ជម្លោះដូច្នេះ ត្រូវដោះស្រាយដោយល្អបំផុតតាមរយៈការចរចា ហើយប្រសិនបើបរាជ័យ ជម្លោះនេះត្រូវនាំទៅកាន់ភាគីអន្តរជាតិទី៣ សម្រាប់ការដោះស្រាយ ដោយលក្ខខណ្ឌនានា ដែលភាគីទាំងអស់ឯកភាពគ្នា។

សេចក្តីប្រកាសនេះបានបញ្ជូនទៅកាន់អង្គការសហប្រជាជាតិនៅក្រុង New York ហើយ ខណៈដែលជម្លោះដែនទឹករវាងសិង្ហបុរី និងម៉ាឡេស៊ី ក្នុងតំបន់ Tuas កំពុងតែមានការអះអាងទាមទាររៀងៗខ្លួន។

ការធ្វើសេចក្តីប្រកាសនេះ គឺក្រោមមាត្រា 298(1)(a) នៃច្បាប់សមុទ្រ ដែលមានន័យថា ប្រទេសផ្សេងទៀត ដែលបានចុះហត្ថលេខាលើអនុសញ្ញាអង្គការសហប្រជាជាតិស្តីពីច្បាប់សមុទ្រ មិនអាចចូលធ្វើជាភាគីទី៣ សម្រាប់ការសម្របសម្រួល ឬមជ្ឈិតកម្មដោយឯកតោប្រឆាំងនឹងប្រទេសសិង្ហបុរី លើជម្លោះដែនទឹកនោះទេ។ ជាមួយគ្នានេះ សិង្ហបុរីក៏មិនអាចចូលធ្វើជាភាគីទី៣ សម្រាប់ការសម្របសម្រួល ឬមជ្ឈិតកម្មដោយឯកតោប្រឆាំងនឹងប្រទេសផ្សេងទៀត សម្រាប់ជម្លោះដូច្នេះផងដែរ។

អ្នកនាំពាក្យក្រសួងការបរទេសសិង្ហបុរីបានកត់សម្កាល់ប្រទេសជាច្រើន ដែលបានចុះហត្ថលេខាលើច្បាប់សមុទ្រ ដូចជាប្រទេសបារាំង កាណាដា អ៊ីតាលី អេស្ប៉ាញ អូស្រ្ដាលី និងថៃ ដែលបានធ្វើសេចក្តីប្រកាសស្រដៀងគ្នានេះ៕

ប្រភព៖ Straits Times ប្រែសម្រួល៖ វាសនា