អ្នកវិទ្យាសាស្ត្រ រកឃើញសត្វនិងរុក្ខជាតិថ្មីៗ ១៥៧ជំពូក ក្នុងមហាតំបន់មេគង្គ នៅឆ្នាំ២០១៧

2018-12-13 07:35:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមអ្នកវិទ្យាសាស្ត្រពិភពលោក បានរកឃើញពូជសត្វ និងរុក្ខជាតិថ្មីៗ ចំនួន ១៥៧ជំពូក ក្នុងមហាតំបន់មេគង្គ រួមមានកម្ពុជា ឡាវ មីយ៉ាន់ម៉ា ឬភូមា ថៃ និងវៀតណាម ក្នុងឆ្នាំ២០១៧។

ត្រីពូជប្រភេទថ្មីមួយប្រភេទ Schistura kampucheensis ដែលក្រុមអ្នកវិទ្យាសាស្ត្រពិភពលោក ទើបរកឃើញនៅកម្ពុជា ក្នុងចំណោមសត្វ និងរុក្ខជាតិថ្មីៗ ១៥៧ជំពូក ក្នុងមហាតំបន់មេគង្គ (រូប៖ អង្គការ WWF)

អង្គការមូលនិធិសាកលសម្រាប់អភិរក្សធនធានធម្មជាតិ WWF ឲ្យដឹងតាមរយៈសេចក្តីប្រកាសព័ត៌មានផ្សាយថ្ងៃទី១២ ធ្នូនេះថា ក្នុងរបកគំហើញនោះ នៅកម្ពុជា មានជំពូកសត្វ និងរុក្ខជាតិថ្មីៗ ចំនួន ៨ ជំពូក ត្រូវបានក្រុមអ្នកវិទ្យាសាស្ត្ររកឃើញ ខណៈនៅមីយ៉ាន់ម៉ា ឬភូមាមាន ៣៩ វៀតណាម ៥៨ ថៃ ៣៥ និងឡាវមាន ២៤ជំពូកសត្វ និងរុក្ខជាតិថ្មីៗ។

ក្នុងចំណោមជំពូកសត្វ និងរុក្ខជាតិថ្មីៗ ដែលក្រុមអ្នកវិទ្យាសាស្ត្រទើបនឹងរកឃើញទាំងនេះ ជារួម មាន ថនិកសត្វ ឬសត្វដែលចិញ្ចឹមកូនដោយទឹកដោះ មាន ៣ជំពូក ត្រី មាន ២៣ជំពូក សត្វដែលអាចរស់នៅលើគោកបាន និងក្នុងទឹកបាន មាន ១៤ជំពូក សត្វល្មូន មាន ២៦ជំពូក និងរុក្ខជាតិ មាន ៩១ជំពូក។

របាយការណ៍ចុងក្រោយ Living Planet Report របស់អង្គការ WWF ឲ្យដឹងថា ក្នុងរយៈពេល ៤០ ឆ្នាំចុងក្រោយ មានការធ្លាក់ចុះបរិមាណសត្វព្រៃក្នុងពិភពលោក រហូតដល់ទៅ ៦០ភាគរយ។ សម្រាប់មហាតំបន់មេគង្គ ការធ្លាក់ចុះនៃបរិមាណសត្វព្រៃនេះ រឹតតែអាក្រក់ ដោយសារតែមានការបំផ្លិចបំផ្លាញក្នុងទ្រង់ទ្រាយធំ នៃជម្រកសត្វព្រៃ និងការបរបាញ់សត្វព្រៃ ឬការនេសាទ ដែលមានលក្ខណៈជាឧស្សាហកម្មជាដើម នៅតាមកន្លែងជាច្រើននៅក្នុងតំបន់នេះ៕

ប្រភព៖ Radio Free Asia ប្រែសម្រួល៖ លាភ.