ស្ពានឫស្សីកោះប៉ែន នឹងត្រូវបើកឱ្យឆ្លងកាត់នៅចុងឆ្នាំនេះហើយ
- 2018-12-13 08:34:41
- ចំនួនមតិ 0 | ចំនួនចែករំលែក 0
ស្ពានឫស្សីកោះប៉ែន នឹងត្រូវបើកឱ្យឆ្លងកាត់នៅចុងឆ្នាំនេះហើយ
ចន្លោះមិនឃើញ
ស្ពានឫស្សីកោះប៉ែន ត្រូវបានសម្រេចការសាងសង់ប្រមាណ ៦០ ទៅ ៧០% ហើយ ដោយស្ពាននេះនឹងត្រូវដាក់ឱ្យដំណើរការមុនថ្ងៃបុណ្យគ្រីស្តម៉ាស ថ្ងៃទី២៥ធ្នូខាងមុខនេះ។ នេះបើតាមការបញ្ជាក់របស់លោក ប៊ុន ណារ៉ា ដែលជាអ្នកទទួលបានវិនិយោគសង់ស្ពានឫស្សីកោះប៉ែនពីអាជ្ញាធរខេត្តកំពង់ចាម នៅថ្ងៃទី១៣ ខែធ្នូ ឆ្នាំ២០១៨។
លោកបានឱ្យដឹងថា ស្ពានដែលមានប្រវែង ៨០០ម៉ែត្រ និងទទឹង ២ម៉ែត្រនេះ អាចឱ្យរថយន្តតូចៗកង់ ម៉ូតូ និងថ្មើរជើងចេញចូលបាន។
«យើងប្រើឬស្សីអស់ជាង១ម៉ឺនដើម។ ឆ្នាំនេះឬស្សីបានឡើងថ្លៃជាងឆ្នាំមុនៗ។ យើងក៏ពិបាករកប្រាក់ចំណេញដែរហើយថ្លៃកម្មករក៏ឡើងដែរ។ ដោយសារអាជ្ញាធរខេត្ត មានបំណងចង់រក្សាអភិរក្សស្ពាននេះផង យើងក៏នៅសាងសង់តទៅទៀត ពីព្រោះស្ពាននេះបានល្បីលេចឮលើពិភពលោកហើយ។ជនបរទេសឬភ្ញៀវទេសចរណាក៏មកមើលចង់ស្គាល់ស្ពាននេះណាស់»។ នេះបើតាមលោក ណារ៉ា បញ្ជាក់បន្ថែម។
គួររំលឹកថា កាលពីឆ្នាំ២០១៧ ស្ពាននេះបានទទួលភ្ញៀវដើរឆ្លងកាត់ប្រមាណ ៤ម៉ឺននាក់។ ស្ពាននេះ កើតមានតាំងពីទស្សវត្សទី៦០មកម្ល៉េះ។ ដើមឡើយស្ពានឫស្សីនេះ ត្រូវបានសាងសង់គ្រាន់តែសម្រាប់ដឹកជញ្ជូនកសិផលរបស់កសិករនៅតំបន់កោះប៉ែន ទៅលក់នៅផ្សារក្រុងកំពង់ចាមតែប៉ុណ្ណោះ៕