ស្ពានឫស្សីកោះប៉ែន នឹងត្រូវបើកឱ្យឆ្លងកាត់នៅចុងឆ្នាំនេះហើយ

2018-12-13 08:34:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ស្ពានឫស្សីកោះប៉ែន ត្រូវបានសម្រេចការសាងសង់ប្រមាណ ៦០ ទៅ ៧០% ហើយ ដោយស្ពាននេះនឹងត្រូវដាក់ឱ្យដំណើរការមុនថ្ងៃបុណ្យគ្រីស្តម៉ាស ថ្ងៃទី២៥ធ្នូខាងមុខនេះ។ នេះបើតាមការបញ្ជាក់របស់លោក ប៊ុន ណារ៉ា ដែលជាអ្នកទទួលបានវិនិយោគសង់ស្ពានឫស្សីកោះប៉ែនពីអាជ្ញាធរខេត្តកំពង់ចាម នៅថ្ងៃទី១៣ ខែធ្នូ ឆ្នាំ២០១៨។

លោកបានឱ្យដឹងថា ស្ពានដែលមានប្រវែង ៨០០ម៉ែត្រ និងទទឹង ២ម៉ែត្រនេះ អាចឱ្យរថយន្តតូចៗកង់ ម៉ូតូ និងថ្មើរជើងចេញចូលបាន។

ស្ពានឫស្សីកោះប៉ែន (រូបថត៖ ខែមេសា ឆ្នាំ២០១៧)

ស្ពានឬស្សី ឬស្ពានប្រដឹសនេះ ត្រូវបានសាងសង់ដោយអ្នកបច្ចេកទេសខ្មែរ ដែលមានទម្លាប់ធ្វើកាលពីដើមរៀងមក ត្រូវបានសាងសង់រាល់មួយឆ្នាំម្តង ហើយពេលរដូវទឹកទន្លេមេគង្គស្រកនារដូវប្រាំងឆ្នាំ២០១៨នេះក៏នៅតែធ្វើ។ លោក ប៊ុន ណារ៉ា បានរៀបរាប់យ៉ាងដូច្នេះថា៖ «**យើងតែងតែសង់រៀងរាល់ឆ្នាំ ពេលទឹកទន្លេឡើងយើងត្រូវតែរុះចោល។ ទឹកស្រកយើងសង់វិញចេញពីមុខវត្តដីដុះទៅកាន់កោះប៉ែន ដែលជារមណីយដ្ឋានវាលខ្សាច់នាកណ្តាលទន្លេសម្បូរទៅដោយខ្យល់អាកាសបរិសុទ្ធ ត្រជាក់ និងមានការលក់ដូរម្ហូបអាហារ និងផលិតផលដំណាំដាំដុះយ៉ាងច្រើននៅទីនោះ**»។

«យើងប្រើឬស្សីអស់ជាង១ម៉ឺនដើម។ ឆ្នាំនេះឬស្សីបានឡើងថ្លៃជាងឆ្នាំមុនៗ។ យើងក៏ពិបាករកប្រាក់ចំណេញដែរហើយថ្លៃកម្មករក៏ឡើងដែរ។ ដោយសារអាជ្ញាធរខេត្ត មានបំណងចង់រក្សាអភិរក្សស្ពាននេះផង យើងក៏នៅសាងសង់តទៅទៀត ពីព្រោះស្ពាននេះបានល្បីលេចឮលើពិភពលោកហើយ។ជនបរទេសឬភ្ញៀវទេសចរណាក៏មកមើលចង់ស្គាល់ស្ពាននេះណាស់»។ នេះបើតាមលោក ណារ៉ា បញ្ជាក់បន្ថែម។

គួររំលឹកថា កាលពីឆ្នាំ២០១៧ ស្ពាននេះបានទទួលភ្ញៀវដើរឆ្លងកាត់ប្រមាណ ៤ម៉ឺននាក់។ ស្ពាននេះ កើតមានតាំងពីទស្សវត្សទី៦០មកម្ល៉េះ។ ដើមឡើយស្ពានឫស្សីនេះ ត្រូវបានសាងសង់គ្រាន់តែសម្រាប់ដឹកជញ្ជូនកសិផលរបស់កសិករនៅតំបន់កោះប៉ែន ទៅលក់នៅផ្សារក្រុងកំពង់ចាមតែប៉ុណ្ណោះ៕

អត្ថបទ៖ សំភី