ក្រសួងសាធារណការ ដាក់ឱ្យដំណើរការកម្មវិធីថែទាំផ្លូវ Road Care Mobile App

2018-12-13 09:03:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានអញ្ជើញសម្ពោធដាក់ឱ្យដំណើរការជាផ្លូវការនូវកម្មវិធីថែទាំផ្លូវ (ROAD CARE mobile app) នាព្រឹកថ្ងៃទី១៣ ខែធ្នូ ឆ្នាំ២០១៨ ដោយមានការចូលរួមពីក្រសួងសា្ថប័នពាក់ព័ន្ធ ដៃគូអភិវឌ្ឍន៍ ព្រមទាំងថ្នាក់ដឹកនាំ និងមន្ត្រីរាជការនៃក្រសួងផងដែរ។

លោក ស៊ុន ចាន់ថុល បានថ្លែងឱ្យដឹងថា កម្មវិធីថែទាំផ្លូវនេះ បង្កើតឡើងក្នុងគោលបំណងពង្រឹងទំនាក់ទំនងរវាងអ្នកប្រើប្រាស់ផ្លូវថ្នល់ និងក្រុមការងារជួសជុលថែទាំផ្លូវ បង្កើនទំនួលខុសត្រូវរបស់អាជ្ញាធរមានសមត្ថកិច្ច លើកកម្ពស់គុណភាពផ្លូវ ពង្រីកការចូលរួមពីសាធារណជន បណ្ដុះស្មារតីស្រឡាញ់ថែរក្សាសម្បត្តិជាតិ និងធ្វើជាម្ចាស់ការលើទ្រព្យសម្បត្តិទាំងនោះ។

លោក ស៊ុន ចាន់ថុល ថ្លែងក្នុងពិធីដាក់ឱ្យដំណើរការកម្មវិធី Road Care mobile app នាព្រឹកថ្ងៃទី១៣ ធ្នូ ២០១៨។ រូបថត៖ ក្រសួងសាធារណការ

លោកទេសរដ្ឋមន្ត្រីបានបន្តថា តាមរយៈកម្មវិធីថែទាំផ្លូវនេះ ប្រជាពលរដ្ឋអាចរាយការណ៍ពីស្ថានភាពផ្លូវជង្ហុកសំបុកមាន់ជូនអាជ្ញាធរមានសមត្ថកិច្ចពាក់ព័ន្ធ ដោយគ្រាន់តែប្រើកម្មវិធីនេះ ថត បន្ទាប់មកបញ្ជូនរូបភាព ឬវីដេអូឃ្លីប ទៅកាន់ក្រុមការងារទទួលបន្ទុក គឺជាការស្រេច ដើម្បីមានវិធានការជួសជុលបានទាន់ពេលវេលា។

ជាមួយគ្នានោះផងដែរ លោកបានគូសបញ្ជាក់ថា កម្មវិធីថែទាំផ្លូវនេះ នឹងរួមចំណែកក្នុងការអភិវឌ្ឍប្រទេសជាតិឱ្យរីកចម្រើន កាត់បន្ថយគ្រោះថ្នាក់ចរាចរណ៍ដែលបង្កឡើងដោយផ្លូវជង្ហុកសំបុកមាន់ ព្រមទាំងជួយឱ្យប្រជាពលរដ្ឋធ្វើដំណើរតាមដងផ្លូវប្រកបដោយសុវត្ថិភាព ជាពិសេសជាងនេះទៅទៀត វាបង្ហាញពីការរីកចម្រើននៃអរិយធម៌ខ្មែរនាពេលបច្ចុប្បន្ន តាមការរីកចម្រើននៃវិស័យព័ត៌មានវិទ្យានេះ។

សូមជម្រាបថា កម្មវិធីថែទាំផ្លូវ ត្រូវបានបង្កើតឡើងដោយស្នាដៃកូនខ្មែរយើងផ្ទាល់ ដែលជាមន្ត្រីនៃក្រសួងសាធារណការ និងដឹកជញ្ជូន ហើយកម្មវិធីនេះត្រូវបានដាក់បញ្ចូលទៅកាន់ Play Store និង App Store ដែលអាចឱ្យប្រជាពលរដ្ឋទាញយកកម្មវិធីមកប្រើប្រាស់នៅលើទូរសព្ទដៃស្មាតហ្វូនបាន ដោយមិនចាំបាច់ចំណាយប្រាក់៕

អត្ថបទ៖ សំភី