វៀតណាម ចង់ធ្វើជាម្ចាស់ផ្ទះនៃកិច្ចប្រជុំកំពូលលើកទី២រវាង ដូណាល់ ត្រាំ-គីម ជុងអ៊ុន

2018-12-14 03:34:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

វៀតណាម បានបង្ហាញចំណាប់អារម្មណ៍ក្នុងការធ្វើជាម្ចាស់ផ្ទះនៃកិច្ចប្រជុំកំពូលលើកទី២ រវាងប្រធានាធិបតីអាមេរិក លោក ដូណាល់ ត្រាំ និងមេដឹកនាំកូរ៉េខាងជើង លោក គីម ជុងអ៊ុន បន្ទាប់ពីជំនួបកំពូលលើកទី១ ធ្វើឡើងនៅសិង្ហបុរី កាលពីខែមិថុនាកន្លងទៅ។ នេះបើតាមការចុះផ្សាយរបស់ CNN កាលពីថ្ងៃទី១៣ ខែធ្នូ ឆ្នាំ២០១៨ ដោយដកស្រង់ពីប្រភពរដ្ឋាភិបាលកូរ៉េខាងត្បូង។

ការបង្ហាញពីបំណងរៀបចំធ្វើជាម្ចាស់ផ្ទះនេះ ធ្វើឡើងដោយមន្រ្តីជាន់ខ្ពស់វៀតណាម ដែលបានថ្លែងទៅកាន់រដ្ឋាភិបាលកូរ៉េខាងត្បូង កាលពីពេលថ្មីៗនេះ។

លោក គីម ជុងអ៊ុន និងលោក ដូណាល់ ត្រាំ ក្នុងពិធីចុះហត្ថលេខា អំឡុងជំនួបចចារជាប្រវត្តិសាស្រ្ដ នៅសណ្ឋាគារ Capella Hotel នៅសិង្ហបុរី នាថ្ងៃ១២ ខែមិថុនា ២០១៨

បើតាមការចុះផ្សាយរបស់ Yonhap បង្ហាញថា វៀតណាមគឺជាទីកន្លែងដ៏មានសក្តានុពលសម្រាប់កិច្ចប្រជុំកំពូលអាមេរិក-កូរ៉េខាងជើង លើកទី២ រួមជាមួយប្រទេសម៉ុងហ្គោលី និងឥណ្ឌូណេស៊ី។ កូរ៉េខាងជើង ដែលជាប្រទេសឯកាមួយពីសហគមន៍អន្តរជាតិ គឺមានស្ថានទូតរបស់ខ្លួន នៅក្នុងប្រទេសទាំង៣នេះ។

កាលពីដើមខែធ្នូនេះ លោក ដូណាល់ ត្រាំ បានបង្ហាញក្តីរំពឹងថា ជំនួបកំពូលលើកទី២ រវាងលោក និងលោក គីម ជុងអ៊ុន នឹងធ្វើឡើងនៅអំឡុងខែមករា ឬខែកុម្ភៈ ឆ្នាំ២០១៩ នៅក្នុងទីតាំងមួយ ក្នុងចំណោម៣ទីតាំងដែលត្រូវជ្រើសរើស ប៉ុន្តែលោកមិនបញ្ជាក់ឈ្មោះទីតាំងនោះឡើយ។

គួរកត់សម្គាល់ថា កាលពីពេលថ្មីៗនេះ លោក Mark Lambert មន្រ្តីជាន់ខ្ពស់ការបរទេសអាមេរិកទទួលបន្ទុកតំបន់អាស៊ីខាងកើត និងប៉ាស៊ីហ្វិក បានទៅធ្វើទស្សនកិច្ចនៅប្រទេសវៀតណាម។ នេះបើតាម Yonhap ដកស្រង់ចេញពីប្រភពមួយនៅក្រុងវ៉ាស៊ីងតោន។ ប៉ុន្តែគេមិនទាន់ដឹងច្បាស់ទេថា ដំណើរទស្សនកិច្ចនេះ មានជាប់ទាក់ទងនឹងកិច្ចប្រជុំកំពូលលើកទី២ រវាងមេដឹកនាំអាមេរិក-កូរ៉េខាងជើង ឬយ៉ាងណានោះទេ៕

ប្រភព៖ Yonhapnews ប្រែសម្រួល៖ សំភី