អានុភាពប្រភពអគ្គិសនីកម្ពុជា កើនឡើងជិត ១៨ដង ក្នុងរយៈពេល ២០ឆ្នាំចុងក្រោយ
- 2018-12-17 06:17:25
- ចំនួនមតិ 0 | ចំនួនចែករំលែក 0
អានុភាពប្រភពអគ្គិសនីកម្ពុជា កើនឡើងជិត ១៨ដង ក្នុងរយៈពេល ២០ឆ្នាំចុងក្រោយ
ចន្លោះមិនឃើញ
ក្នុងរយៈពេល ២០ឆ្នាំកន្លងមកនេះ តាមរយៈការរៀបចំផែនការ និងការអភិវឌ្ឍប្រភពអគ្គិសនីជាបន្តបន្ទាប់លើមូលដ្ឋាននៃសុខសន្តិភាពទូទាំងប្រទេស អានុភាពប្រភពអគ្គិសនីដែលកម្ពុជាមានបានកើនឡើងពី ១៥០ម៉េហ្កាវ៉ាត់ នៅឆ្នាំ១៩៩៨ រហូតដល់ ២៦៤៨ម៉េហ្កាវ៉ាត់ នៅចុងឆ្នាំ២០១៨ ដែលស្មើនឹងកំណើនជិត ១៨ដង។ នេះបើតាមការបញ្ជាក់របស់ក្រសួងរ៉ែ និងថាមពល តាមរយៈទំព័រហ្វេសប៊ុករបស់ខ្លួន នៅថ្ងៃទី១៧ ខែធ្នូ ឆ្នាំ២០១៨នេះ។
ជាមួយគ្នានេះ រាជរដ្ឋាភិបាលកម្ពុជា តាមរយៈក្រសួងរ៉ែ និងថាមពលបានរៀបចំផែនការ និងធ្វើការអភិវឌ្ឍគម្រោងបណ្តាញជាតិបញ្ជូនអគ្គិសនីជាបន្តបន្ទាប់ ធ្វើឲ្យបច្ចុប្បន្ននេះ កម្ពុជាមានប្រព័ន្ធបណ្តាញជាតិមួយដែលមានខ្សែបញ្ជូនតង់ស្យុងខ្ពស់ ២១៤១គីឡូម៉ែត្រ និងអនុស្ថានីយ ៣៣កន្លែង ដែលអាចភ្ជាប់ប្រភពអគ្គិសនីទាំងអស់ដែលបានអភិវឌ្ឍ រួចអាចបញ្ជូនប្រភពអគ្គិសនីនេះទៅឲ្យអនុស្ថានីយនៅតាមរាជធានី-ខេត្តចំនួន ២០ ដោយផ្ទាល់ និងអាចបញ្ជូនបន្តតាមរយៈខ្សែបញ្ជូនរងទៅឲ្យខេត្ត ៥ ដែលនៅសល់ជាបណ្តោះអាសន្ន ។
ក្រសួងរ៉ែកបញ្ជាក់ទៀតថា ក្នុងរយៈពេលជិត ២០ឆ្នាំនេះ មានការអភិវឌ្ឍបណ្តាញបញ្ជូនរង និងបណ្តាញចែកចាយថ្មីជាង ៦៣៤៧៦គីឡូម៉ែត្របន្ថែម ធ្វើឲ្យការផ្គត់ផ្គង់អគ្គិសនីបច្ចុប្បន្ន គ្របដណ្តប់លើភូមិចំនួន ១២៣០៥ភូមិ ត្រូវជា ៨៦,៨៥% នៃចំនួនភូមិទាំងអស់។ ឯការភ្ជាប់បណ្តាញអគ្គិសនីឲ្យអ្នកប្រើប្រាស់វិញ បានកើនឡើងដល់ ២,៦៥លានទីតាំង ដែលក្នុងនោះមានលំនៅដ្ឋានចំនួន ២,៥៤លានខ្នងផ្ទះ ត្រូវជា ៧២,១៦% នៃខ្នងផ្ទះសរុប៕