អាជ្ញាធរណែនាំឱ្យម្ចាស់ផ្ទះសំណាក់-សណ្ឋាគារ ត្រូវមានអាងបម្លែង មុនបង្ហូរទឹកកខ្វក់ចូលសមុទ្រ

2018-12-18 02:09:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រដ្ឋបាលខេត្តព្រះសីហនុ បានចេញនូវវិធានការចំនួន២៖

ទី១. ការផ្សព្វផ្សាយដល់ប្រជាពលរដ្ឋ ម្ចាស់ផ្ទះសំណាក់ សណ្ឋាគារ ប្រកបអាជីវកម្ម ត្រូវមានអាងប្រតិកម្ម ឬថាំងផ្លាកស្ទិក មុននឹងបង្ហូរទឹកកខ្វក់ចូលលូ ចេញទៅសមុទ្រ។

ទី២. ចាប់បង្ខំឱ្យប្រជាពលរដ្ឋ ឬម្ចាស់ផ្ទះសំណាក់ និងសណ្ឋាគារ ចាំបាច់ត្រូវមានអាងប្រតិកម្ម ឬថាំងផ្លាកស្ទិក។ ប្រសិនបើមិនអនុវត្ដតាមការណែនាំរបស់រដ្ឋបាលខេត្តទេ នៅថ្ងៃទី២៨ ខែធ្នូខាងមុខនេះ អាជ្ញាធរខេត្តនឹងចាប់ផ្ដើមអនុវត្តតាមផ្លូវច្បាប់ជាធរមាន ដោយត្រូវផ្អាកអាជីវកម្មជាបណ្តោះអាសន្ន។

វិធានការខាងលើនេះ ត្រូវបានលើកឡើងដោយលោក យន្ត មីន អភិបាលខេត្តព្រះសីហនុ កាលពីថ្ងៃទី១៧ ខែធ្នូ ឆ្នាំ២០១៨។ នេះបើតាមការចុះផ្សាយរបស់វេបសាយក្រសួងព័ត៌មាន។

ទឹកកខ្វក់ហូរចេញពីសណ្ឋាគារមួយនៅជាប់ឆ្នេរអូរឈើទាល ក្នុងខេត្តព្រះសីហនុ។ រូបថត៖ អង្គការស្រាវជ្រាវជាតិកម្ពុជា (CNRO) កាលពីដើមខែធ្នូ ឆ្នាំ ២០១៨។

លោក យន្ត មីន បានបញ្ជាក់ថា បើមានការចូលរួមពីប្រជាពលរដ្ឋ និងម្ចាស់ផ្ទះ សំណាក់ សណ្ឋាគារ បញ្ហាទឹកកខ្វក់ នឹងត្រូវបានកាត់បន្ថយបានរហូតដល់៩៨ភាគរយ ដើម្បីបរិស្ថានមឆ្នេរសមុទ្រ សម្រាប់ភ្ញៀវទេសចរជាតិ និងអន្តរជាតិ ទៅលេងកម្សាន្តកាន់តែច្រើនឡើងនៅខេត្តព្រះសីហនុ ជារៀងរាល់ឆ្នាំ។

លោកអភិបាលខេត្ដ បន្តថា ដោយសារកំណើនសេដ្ឋកិច្ច និងការអភិវឌ្ឍនៅខេត្តព្រះសីហនុ មានការកើនឡើងយ៉ាងឆាប់រហ័ស ប៉ុន្ដែបញ្ហាទឹកកខ្វក់ ក៏ជាកង្វល់របស់រដ្ឋបាលខេត្ត ក៏ដូចជាគណៈកម្មការឆ្នេរផងដែរ ក្នុងការដោះស្រាយទឹកកខ្វក់ ហូរចូលក្នុងសមុទ្រ។

បច្ចុប្បន្នខេត្តព្រះសីហនុ មានស្ថានីយបូមទឹកកខ្វក់ ៤កន្លែង ហើយអាជ្ញាធរខេត្ដកំពុងសិក្សាស្ថានីយនៅខាងមុខសាលាខេត្ត ដើម្បីបូមទឹកកខ្វក់បញ្ចៀស ចេញកុំឱ្យហូរចូលសមុទ្រ បង្កផលប៉ះពាល់ដល់តំបន់ឆ្នេរសមុទ្រក្នុងខេត្តព្រះសីហនុ ដែលជាសមាជិកក្លឹបឆ្នេរស្អាតលើពិភពលោក៕

អត្ថបទ៖ សំភី