ជប៉ុន ពន្លឿនការពង្រីកវិស័យយោធារបស់ខ្លួន ដើម្បីទប់ទល់ចិន និងរុស្ស៊ី
- 2018-12-18 04:00:51
- ចំនួនមតិ 0 | ចំនួនចែករំលែក 0
ជប៉ុន ពន្លឿនការពង្រីកវិស័យយោធារបស់ខ្លួន ដើម្បីទប់ទល់ចិន និងរុស្ស៊ី
ចន្លោះមិនឃើញ
ប្រទេសជប៉ុននឹងពន្លឿនការចំណាយលើយន្តហោះចម្បាំងទំនើប មីស៊ីលរយៈចម្ងាយឆ្ងាយ និងសព្វាវុធផ្សេងទៀត ក្នុងរយៈពេល ៥ឆ្នាំខាងមុខ ដើម្បីគាំទ្រកងកម្លាំងអាមេរិក ដែលកំពុងប្រឈមនឹងយោធាចិន ក្នុងតំបន់ប៉ាស៊ីហ្វិកខាងលិច។ នេះបើតាមការចេញផ្សាយរបស់សារព័ត៌មាន Channel News Asia ដោយផ្អែកលើឯកសារ ២របស់រដ្ឋាភិបាលជប៉ុន ដែលសារព័ត៌មានសិង្ហបុរីនេះទទួលបាន។
គម្រោងនេះ គឺជាការបង្ហាញយ៉ាងច្បាស់ពីមហិច្ចតារបស់ជប៉ុន ដើម្បីក្លាយជាមហាអំណាចតំបន់ ខណៈការកសាងយោធារបស់ចិន និងការលេចឡើងរបស់រុស្ស៊ី បានដាក់សម្ពាធលើសម្ព័ន្ធមិត្តរបស់អាមេរិក។
ក្នុងឯកសារកម្មវិធីយោធារយៈពេល ១០ឆ្នាំ ដែលត្រូវទទួលបានការឯកភាពដោយលោក ស៊ីនហ្សូ អាបេ នាយករដ្ឋមន្រ្តីជប៉ុន បានបញ្ជាក់ថា "អាមេរិកនៅតែជាប្រទេសមហាអំណាចពិភពលោកទី១ ប៉ុន្ដែបញ្ហាជាតិនានាកំពុងតែលេចឡើង ហើយយើងកត់សម្គាល់នូវសារៈសំខាន់នៃការប្រកួតប្រជែងបែបយុទ្ធសាស្រ្ត ជាមួយចិន និងរុស្ស៊ី ខណៈពួកគេបង្ហបញ្ហាសណ្ដាប់ធ្នាប់តំបន់"។
យោងតាមឯកសារយោធារបស់ជប៉ុន បញ្ជាក់ថា ជប៉ុនគ្រោងទិញយន្តហោះចម្បាំងទំនើបបំផុតរបស់អាមេរិក F-35 ចំនួន ៤៥គ្រឿង ក្នុងទំហំទឹកប្រាក់ ៤ពាន់លានដុល្លារ បន្ថែមលើយន្ដហោះចម្បាំង ៤២គ្រឿងទៀត ដែលអាមេរិកបានបញ្ជាទិញពីក្រុមហ៊ុន Lockheed Martin។
ចំណែកនាវាផ្ទុកឧទ្ធម្ភាគចក្រ ២គ្រឿងទៀតរបស់ជប៉ុន គ្រោងនឹងអភិវឌ្ឍទៅជានាវាផ្ទុកយន្តហោះចម្បាំង F-35 វិញ៕