ឥណ្ឌា ផ្តល់ជំនួយ ១,៤ពាន់លានដុល្លារឱ្យម៉ាល់ឌីវ ខណៈប្រទេសនេះ កំពុងតស៊ូនឹងបំណុលចិន

2018-12-18 04:53:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នាយករដ្ឋមន្រ្តីឥណ្ឌា លោក ណារិនដ្រា មូឌី បានថ្លែងកាលពីថ្ងៃទី១៧ ខែធ្នូ ឆ្នាំ២០១៨ថា ឥណ្ឌា នឹងផ្តល់ជំនួយហិរញ្ញប្បទាន ១,៤ពាន់លានដុល្លារ ឱ្យប្រទេសម៉ាល់ឌីវ ដែលនេះគឺជាការផ្តល់ជំនួយដ៏ធំបំផុត។ ការប្រកាសផ្តល់ជំនួយនេះ ធ្វើឡើងក្នុងខណៈដែលប្រទេសម៉ាល់ឌីវ កំពុងតស៊ូជាមួយនឹងបំណុលរបស់ចិនយ៉ាងច្រើនក្រាស់ក្រែល។ នេះបើតាមការចុះផ្សាយរបស់ Reuters។

លោក មូឌី បានធ្វើការប្រកាសដូច្នេះបន្ទាប់ពីជំនួបពិភាក្សាជាមួយប្រធានាធិបតីម៉ាល់ឌីវថ្មី លោក Mohamed Ibrahim Solih។ លោក Solih ដែលមាននិន្នាការទៅរកឥណ្ឌា បានប្រកួតឈ្នះលើបុរសខ្លាំងដែលមាននិន្នាការទៅចិន គឺលោក Abdulla Yameen នៅក្នុងការបោះឆ្នោតមួយ កាលពីខែតុលាកន្លងទៅ។

បើតាម Reuters ក្នុងអំឡុងការសាងសង់រយៈពេល ៥ឆ្នាំនៅម៉ាល់ឌីវ ចិនបានកសាងស្ពានឆ្លងកាត់សមុទ្រដ៏សំខាន់មួយដែលភ្ជាប់រដ្ឋធានី Male ទៅកាន់ព្រលានយន្តហោះ ព្រមទាំងការអភិវឌ្ឍព្រលានយន្តហោះ និងសង់លំនៅឋានជាច្រើនផងដែរ។ ប៉ុន្តែសកម្មភាពសាងសង់ដ៏រហ័សបែបនេះ បានបង្កជាក្តីបារម្ភសម្រាប់ម៉ាល់ឌីវ ដែលអាចជាប់បំណុលចិនពី ១,៥ ទៅ ៣ពាន់លានដុល្លារ។

កម្មករចិន កំពុងឈរមើលស្ពានឆ្លងកាត់សមុទ្រក្នុងប្រទេសម៉ាល់ឌីវ ដែលសាងសង់ដោយចិន (រូបថត៖ Reuters)

លោកនាយករដ្ឋមន្រ្តីឥណ្ឌា បញ្ជាក់ថា៖ «**សម្រាប់ម៉ាល់ឌីវ ការអភិវឌ្ឍសង្គម និងសេដ្ឋកិច្ច គឺយើងបាននឹងកំពុងផ្តល់នូវជំនួយហិរញ្ញប្បទាន ១,៤ពាន់លានដុល្លារ ក្នុងកំណែទម្រង់នៃការគាំទ្រថវិកា កិច្ចព្រមព្រៀងដោះដូររូបិយបណ្ណ (Currency Swap) និងឥណទានសម្បទាន**»។ លោកបានចាត់ទុកម៉ាល់ឌីវ ជាមិត្តដ៏ជិតស្និទ្ធមួយ និងជាអ្នកជិតខាងគ្នា ព្រមទាំងត្រៀមខ្លួនជួយជានិច្ច៕

ប្រភព៖ Reuters ប្រែសម្រួល៖ សំភី