សម្ដេច ហេង សំរិន៖ CPP ត្រូវប្រុងប្រយ័ត្នខ្ពស់លើការសម្រេចចិត្តខាងនយោបាយ

2018-12-18 04:55:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេច ហេង សំរិន ប្រធានកិត្តិយសគណបក្សប្រជាជនកម្ពុជា (CPP) បានបញ្ជាក់ថា ប៉ុន្មានឆ្នាំចុងក្រោយនេះ សភាពការណ៍ក្នុងប្រទេស និងសភាពការណ៍អន្តរជាតិមានការវិវត្តប្រែប្រួលយ៉ាងឆាប់រហ័ស និងស្មុគស្មាញ ដែលទាមទារឲ្យ CPP ត្រូវតាមដាន និងធ្វើការសម្រេចចិត្តខាងនយោបាយដោយប្រុងប្រយ័ត្នបំផុត ដើម្បីរក្សាការពារបាននូវដំណើរសុខសន្តិភាព ស្ថិរភាព ប្រជាធិបតេយ្យ បូរណភាពទឹកដី អធិបតេយ្យ ឯករាជ្យជាតិ និងការអភិវឌ្ឍសេដ្ឋកិច្ចសង្គមនៅកម្ពុជា។

សម្តេច ហេង សំរិន ប្រធានកិត្តិយសគណបក្សប្រជាជនកម្ពុជា (CPP) ថ្លែងក្នុងសន្និបាតគណៈកម្មាធិការកណ្ដាល CPP នៅមជ្ឈមណ្ឌលសន្និបាតកោះពេជ្រ

ការបញ្ជាក់របស់សម្ដេច ហេង សំរិន ដូច្នេះបានធ្វើឡើងក្នុងសន្និបាតគណៈកម្មាធិការកណ្ដាល CPP លើកទី៤១ រយៈពេល ៣ថ្ងៃ គឺពីថ្ងៃទី១៨ ដល់ ២០ ខែធ្នូ ឆ្នាំ២០១៨ នៅមជ្ឈមណ្ឌលសន្និបាតកោះពេជ្រ។

សម្ដេច ហេង សំរិន បន្ថែមទៀតថា "ផ្អែកលើនេះ គណបក្សបានដាក់ចេញនូវមាគ៌ានយោបាយដ៏ត្រឹមត្រូវលើរាល់បញ្ហាពាក់ព័ន្ធ ជាហេតុធ្វើឲ្យសភាពការណ៍កម្ពុជានៅឆ្នាំ២០១៨ បន្តមានការប្រែប្រួលវិជ្ជមានជាក់ស្តែង គឺការបោះឆ្នោតជ្រើសតាំងសមាជិកសភាទាំងពីរ ពិសេសការជ្រើសតាំងតំណាងរាស្ត្រអាណត្តិទី៦ បានប្រព្រឹត្តទៅត្រឹមត្រូវដោយសេរី ត្រឹមត្រូវ យុត្តិធម៌ គ្មានអំពើហិង្សា និងមានការទទួលស្គាល់ជាទូទៅនៅគ្រប់មជ្ឈដ្ឋាន លើកលែងតែពួកប្រឆាំង និងអ្នកគាំទ្រមួយចំនួន ដែលមានឧបាយកលចង់ផ្តួលរំលំគណបក្សប្រជាជនកម្ពុជា"។

សម្តេច ហេង សំរិន បានសង្កត់ធ្ងន់ថា “យើងត្រូវចងចាំកុំភ្លេចថា គណបក្សប្រជាជនកម្ពុជាកើតឡើងដោយសារប្រជាជន ជារបស់ប្រជាជន ដើម្បីបម្រើប្រជាជន និងរួមសុខទុក្ខជាមួយប្រជាជននៅគ្រប់កាលៈទេសៈ។ … ពេលគណបក្សទទួលបានជ័យជម្នះ យើងរីករាយនឹងជ័យជម្នះ តែយើងមិនត្រូវភ្លេចខ្លួន ឬស្កប់ស្កល់នឹងជ័យជម្នះឡើយ ព្រោះគ្រប់សមរភូមិភារកិច្ចរបស់យើងសុទ្ធតែមានបញ្ហាប្រឈម ឬយថាហេតុ នៃហានិភ័យ ដែលអាចកើតមានឡើង។ ដូច្នេះយើងទាំងអស់គ្នាត្រូវតែប្រុងប្រយ័ត្នខ្ពស់ និងប្រឹងប្រែងជាប់ជានិច្ច ដើម្បីសេចក្តីសុខសាន្ត និងភាពសំបូរសប្បាយរុងរឿងរបស់ប្រជាជន និងប្រទេសជាតិយើង”៕

គួរបញ្ជាក់ថា មហាសន្និបាតនេះ នឹងពិភាក្សាលើបញ្ហាសំខាន់ៗ ដូចជា ៖

១. ឆ្លងសេចក្តីព្រាងរបាយការណ៍ស្តីពីសភាពការណ៍ទូទៅ និងការងារគណបក្សឆ្នាំ២០១៨ និងទិសដៅភារកិច្ចឆ្នាំ២០១៩។
២. ការបោះឆ្នោតជ្រើសតាំងបន្ថែមសមាជិកគណៈចាត់ចែង និងជ្រើសរើសប្រធានគណៈកម្មាធិការត្រួតពិនិត្យ នៃគណៈកម្មាធិការកណ្តាល។
៣. ការបោះឆ្នោតជ្រើសតាំងបំពេញបន្ថែមសមាជិកគណៈអចិន្ត្រៃយ៍ នៃគណៈកម្មាធិការកណ្តាលមួយចំនួន៕