អ៊ីស្រាអែល គ្រោងបញ្ជូនយានអវកាសទៅភពព្រះចន្ទជាលើកដំបូង នៅដើមឆ្នាំក្រោយ

2018-12-18 08:45:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រទេសអ៊ីស្រាអែល គ្រោងនឹងបញ្ជូនយានអវកាសមួយឈ្មោះ Beresheet ទៅកាន់ភពព្រះចន្ទ នៅអំឡុងដើមឆ្នាំ២០១៩ខាងមុខ បន្ទាប់ពីយាននេះត្រូវបានបញ្ចប់ការសាងសង់ និងធ្វើតេស្តរួចរាល់។ នេះបើតាមការបញ្ជាក់របស់លោក Ido Anteby នាយកអង្គការ SpacelL ដែលដឹកនាំគម្រោងនេះ កាលពីថ្ងៃទី១៧ ខែធ្នូ ឆ្នាំ២០១៨។

លោកបានឱ្យដឹងថា ក្នុងប៉ុន្មានសប្តាហ៍ទៀត យានអវកាសនេះនឹងត្រូវបញ្ជូនទៅកាន់មជ្ឈមណ្ឌល Cape Canaveral ក្នុងរដ្ឋ Florida សហរដ្ឋអាមេរិក ដែលជាកន្លែងត្រូវបាញ់បង្ហោះ តាមរយៈរ៉ុកកែត Falcon 9 របស់ក្រុមហ៊ុន Space X។

យានអវកាសដែលមានរូបរាងដូចជាតុមូលមួយនេះ មានកម្ពស់ ១,៥ម៉ែត្រ និងទម្ងន់ ៥៨៥គីឡូក្រាម ។

ក្រុមវិស្វករដែលសាងសង់យានអវកាស Beresheet

ប្រសិនបើទទួលជោគជ័យ នោះអ៊ីស្រាអែល នឹងក្លាយជាប្រទេសទី៤ ដែលបានដាក់យានអវកាស (គ្មានមនុស្ស) នៅលើភពព្រះចន្ទ បន្ទាប់ពីអាមេរិក អតីតសហភាពសូវៀត (ឆ្នាំ១៩៦៦) និងចិន (ឆ្នាំ២០១៣)។ ពីមុនមក អ៊ីស្រាអែល ក៏ធ្លាប់បានបញ្ជូនផ្កាយរណបជាច្រើនទៅកាន់ទីអវកាសផងដែរ ប៉ុន្តែនេះគឺជាការបញ្ជូនយានអវកាសទៅឆ្ងាយបំផុតរបស់ប្រទេសនេះ។

បើតាមលោក Ido Anteby ការចុះចតរបស់យាន Beresheet នៅលើផ្ទៃដីភពព្រះចន្ទ នឹងធ្វើឡើងនៅត្រង់ចន្លោះនៃទីតាំងចុះចតរបស់ អាប៉ូឡូទី១៥ និងអាប៉ូឡូទី១៧ របស់អាមេរិកកាលពីមុន។ ទីតាំងនោះគឺមានផ្ទៃរាបស្មើ ប៉ុន្តែក៏មានរណ្តៅតូចៗ និងផ្ទាំងថ្មជាច្រើនផងដែរ៕

ប្រភព៖ Dailymail ប្រែសម្រួល៖ សំភី