មន្ទីរបរិស្ថានខេត្ត៖ សត្វដែលខាំគោមួយក្បាលនៅសំឡូត គឺជាខ្លាឃ្មុំ
- 2018-12-19 02:02:38
- ចំនួនមតិ 0 | ចំនួនចែករំលែក 0
មន្ទីរបរិស្ថានខេត្ត៖ សត្វដែលខាំគោមួយក្បាលនៅសំឡូត គឺជាខ្លាឃ្មុំ
ចន្លោះមិនឃើញ
លោក កត បូរ៉ាន ប្រធានមន្ទីរបរិស្ថានខេត្តបាត់ដំបង បានអះអាងថា សត្វដែលបានខាំសត្វគោមួយក្បាលរបស់ម្ចាស់ឈ្មោះ ស៊ុន ភាព នៅភូមិស្ទឹងតូច ឃុំកំពុងល្ពៅ នៅស្រុកសំឡូត ខេត្តបាត់ដំបង គឺជាខ្លាឃ្មុំ។ នេះបើតាមការចុះផ្សាយនៅលើទំព័រហ្វេសប៊ុករបស់ក្រសួងបរិស្ថាន កាលពីថ្ងៃទី១៨ ខែធ្នូ ឆ្នាំ២០១៨។
លោក កត បូរ៉ាន បានឱ្យដឹងថា មានវត្តមានខ្លាឃ្មុំជាច្រើននៅក្នុងតំបន់ការពារធម្មជាតិក្នុងខេត្តបាត់ដំបង។ ការលើកឡើងនេះ ខណៈដែលសមត្ថកិច្ច បានឃើញដានជើងនៅលើដី និងរោមខ្លាឃ្មុំធំជាប់នឹងស្នាមរបួស ដែលវាចេញពីព្រៃមកខាំសត្វគោមួយក្បាលនោះ។
លោកប្រធានមន្ទីរបញ្ជាក់បន្ថែមថា៖ «នេះពិតជាមានវត្តមាននៃសត្វខ្លាឃ្មុំពិតប្រាកដ ព្រោះពិនិត្យឃើញមានរោម និងស្នាមក្រចកជាប់នឹងរបួសសត្វគោ ដោយឡែករបៀបវាយប្រហារចំណីអាហារគឺវាខាំបំពង់កក្រោម និងខ្ទប់ចម្រុះ»។
ក្នុងតំបន់ប្រើប្រាស់ច្រើនយ៉ាងសំឡូត ដែលស្ថិតនៅក្នុងស្រុកសំឡូត ខេត្តបាត់ដំបង ជាជម្រករស់នៅនៃហ្វូងខ្លាឃ្មុំព្រៃ ដែលខ្លះមានទម្ងន់ចាប់ពី ១៤០គីឡូក្រាម។ លោក កត បូរ៉ាន អះអាងថា បន្ទាប់ពីមានការការពារ និងអភិរក្សធនធានធម្មជាតិបានល្អប្រសើរ នៅតាមតំបន់ការពារធម្មជាតិ រយៈពេល ១០ឆ្នាំកន្លងមកនេះ ជាពិសេសនៅក្នុងខេត្តបាត់ដំបង វត្តមានសត្វព្រៃមានចំនួនកើនឡើងច្រើន។ បើតាមរយៈការអង្កេតចាប់បានពីកាមេរ៉ា នៅតំបន់ការពារធម្មជាតិនេះ ថនិកសត្វធំៗជាច្រើនបានបង្ហាញខ្លួន ជាពិសេសចំនួនសត្វខ្លាឃ្មុំ និងខ្លារខិន៕