រដ្ឋមន្រ្តីទេសចរណ៍ ស្នើឱ្យក្រុមហ៊ុនវៀតណាម ពង្រីកជើងហោះហើរមកកម្ពុជាបន្ថែមទៀត

2018-12-20 04:24:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ថោង ខុន រដ្ឋមន្ត្រីក្រសួងទេសចរណ៍ បានសំណូមពរឱ្យក្រុមហ៊ុនអាកាសចរណ៍វៀតណាម ពង្រីកជើងហោះហើរពីប្រទេសវៀតណាម មកកាន់រាជធានីភ្នំពេញ ខេត្តសៀមរាប និងតំបន់ឆ្នេរសមុទ្ររបស់កម្ពុជា ឱ្យកាន់តែច្រើនថែមទៀត។ សំណូមពរនេះ ត្រូវបានធ្វើឡើងក្នុងឱកាសដែលលោកបានអញ្ជើញជាអធិបតីក្នុងពិធីចែកពានរង្វាន់ជូនទីភ្នាក់ងារទេសចរណ៍ ដែលមានស្នាដៃល្អក្នុងការលក់សំបុត្រ ជូនក្រុមហ៊ុនអាកាសចរណ៍ Vietnam Airline កាលពីល្ងាចថ្ងៃទី១៩ ខែធ្នូ ឆ្នាំ២០១៨។

លោករដ្ឋមន្ត្រីលើកឡើងថា ដើម្បីទ្រទ្រង់ដល់ការរីកលូតលាស់នៃវិស័យទេសចរណ៍ឱ្យកាន់តែខ្លាំងក្លាថែមទៀត ការអភិវឌ្ឍ និងធ្វើទំនើបកម្មមធ្យោបាយដឹកជញ្ជូន ទាំងផ្លូវអាកាស ផ្លូវគោក ផ្លូវទឹក និងផ្លូវដែក ហេដ្ឋារចនាសម្ព័ន្ធទ្រទ្រង់ និងបច្ចេកវិទ្យាក្នុងវិស័យដឹកជញ្ជូន គឺជាកត្តាកំណត់ចាំបាច់សម្រាប់និរន្តរភាពនៃវិស័យទេសចរណ៍ ។

លោក ថោង ខុន ថ្លែងនាពេលកន្លងមក

បើតាមលោក ថោង ខុន បច្ចុប្បន្នឧស្សាហកម្មដឹកជញ្ជូន និងធ្វើដំណើរ ជាដៃគូមិនអាចខ្វះបានក្នុងការរុញដោល និងអភិវឌ្ឍវិស័យទេសចរណ៍ ពាណិជ្ជកម្ម ទំនាក់ទំនងរវាងប្រជាជននិងប្រជាជន ក្នុងនោះ ការដឹកជញ្ជូនតាមផ្លូវអាកាស ក៏កើនឡើងគួរឱ្យកត់សម្គាល់ ដោយឈរលើគោលការណ៍សុវត្ថិភាពខ្ពស់ និងចំណេញពេលវេលា បើធៀបនឹងមធ្យោបាយផ្សេងៗទៀត។

បច្ចុប្បន្ន កម្ពុជាមានជើងហោះហើរពីវៀតណាមមក សរុបចំនួន ២៣ជើងក្នុងមួយថ្ងៃ ក្នុងនោះ សៀមរាប-ហូជីមិញ ៦ជើង, សៀមរាប-ហាណូយ ៦ជើង, ភ្នំពេញ-ហូជីម៉ិញ ៥ជើង ហើយនិងជើងហោះហើរពី សៀមរាប-ដាណាង, ព្រះសីហនុ-ហូជីម៉ិញ ដែលភាគច្រើន ប្រតិបត្តិការដោយក្រុមហ៊ុន Vietname Airline, ក្រុមហ៊ុនអាកាសចរណ៍ជាតិកម្ពុជាអង្គរអ៊ែរ, ក្រុមហ៊ុន Vietjet, ក្រុមហ៊ុនអាកាសចរណ៍ Silk Air និងក្រុមហ៊ុនអាកាសចរណ៍ Qatar Airways៕

ប្រភព៖ Vayo Fm ប្រែសម្រួល៖ សំភី