ឥណ្ឌា បាញ់បង្ហោះផ្កាយរណប "Angry Bird" សម្រាប់ជួយដល់យោធា

2018-12-20 06:44:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អង្គការស្រាវជ្រាវអវកាសឥណ្ឌា (ISRO) កាលពីថ្ងៃទី១៩ ខែធ្នូ ឆ្នាំ២០១៨ បានបាញ់បង្ហោះផ្កាយរណបទំនាក់ទំនងមួយឈ្មោះ "Indian Angry Bird" ទៅកាន់គន្លងផែនដី សម្រាប់ឱ្យកងទ័ពអាកាសឥណ្ឌាប្រើប្រាស់។ ការបាញ់បង្ហោះនេះ ធ្វើឡើងនៅមជ្ឈមណ្ឌលអវកាស Satish Dhawan ក្នុងរដ្ឋ Andhra Pradesh។

បើតាមអង្គការ ISRO ផ្កាយរណបយោធាដែលមានទម្ងន់ ២២៥០គីឡូក្រាមនេះ នឹងចំណាយពេលពីរបីថ្ងៃ ដើម្បីឈានទៅដល់គន្លងអវកាសរបស់វា។ ផ្កាយរណបដែលបំពេញបេសកកម្មរយៈពេល៨ឆ្នាំមួយនេះ នឹងជួយកាត់បន្ថយការជ្រៀតជ្រែកពីបរទេស និងលេចធ្លាយព័ត៌មានរបស់ឥណ្ឌា។

ក្រោយបាញ់បង្ហោះ លោក K Sivan ប្រធានអង្គការ ISRO បាននិយាយថា នេះជាបេសកកម្មទី៧ ដែលបាញ់បង្ហោះដោយ ISRO ក្នុងរយៈពេល ៣៥ថ្ងៃមកនេះ។ ក្នុងនោះផ្កាយរណប៤គ្រឿងដែលធ្វើឡើងដោយឥណ្ឌា ត្រូវបានបាញ់បង្ហោះដោយជោគជ័យតាមរយៈរ៉ុកកែតចំនួន ៣គ្រាប់ ចេញពីមជ្ឈមណ្ឌលអវកាសនេះ។

អនុប្រធានាធិបតីឥណ្ឌា លោក Venkaiah Naidu បានបង្ហោះនៅ Twitter របស់លោក ដោយចូលរួមអបអរសាទរជាមួយនឹងការបាញ់បង្ហោះផ្កាយរណបផ្ទាល់ខ្លួននេះ និងបានអះអាងថា វានឹងជួយជំរុញដ៏ធំសម្រាប់សមត្ថភាពការពារជាតិឥណ្ឌា៕

ប្រភព៖ indiatoday ប្រែសម្រួល៖ សំភី