នាយករដ្ឋមន្ត្រីអំពាវនាវឱ្យសារព័ត៌មាន ជៀសវាងការផ្សព្វផ្សាយព័ត៌មានតែមួយជ្រុង ឬមិនពិត

2018-12-21 02:31:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចនាយករដ្ឋមន្រ្តី ហ៊ុន សែន បានអំពាវនាវឱ្យអ្នកសារព័ត៌មានជាតិ និងអន្តរជាតិ ដែលកំពុងបំពេញបេសកកម្មនៅកម្ពុជា យកចិត្តទុកដាក់អនុវត្តឱ្យបានត្រឹមត្រូវ តាមក្រមសីលធម៌វិជ្ជាជីវៈសារព័ត៌មាន គោរពច្បាប់រដ្ឋ និងជៀសវាងនូវការផ្សព្វផ្សាយព័ត៌មានមិនពិត ឬព័ត៌មានតែមួយជ្រុង ឬដោយសារតែគំនុំ ដោយពុំគិតអំពីក្បួនខ្នាតក្រឹត្យក្រមនៃសារព័ត៌មាន។ ការអំពាវនាវនេះ ធ្វើឡើងតាមរយៈសារលិខិតផ្ញើជូនវេទិកានិពន្ធនាយកសារព័ត៌មានកម្ពុជាស្តីពី "ការប្រយុទ្ធប្រឆាំងនឹងព័ត៌មានក្លែងក្លាយ" នាថ្ងៃទី២១ ខែធ្នូ ឆ្នាំ២០១៨។

សារលិខិតនេះបានលើកឡើងថា ការផ្សព្វផ្សាយព័ត៌មានក្លែងក្លាយបំប៉ោងសភាពការណ៍ ញុះញង់ឲ្យមានជម្លោះផ្ទៃក្នុង គឺរុញច្រានប្រទេសឲ្យធ្លាក់ក្នុងភាពវឹកវរ អសន្តិសុខ ឬបង្កឲ្យមានជម្លោះប្រដាប់អាវុធជាមួយប្រទេសជិតខាង ធ្វើឲ្យអន្តរាយដល់ប្រទេសជាតិ ដែលជាអំពើខុសច្បាប់មិនអត់អោនឲ្យជាដាច់ខាត។

សម្តេច ហ៊ុន សែន ថ្លែងនាពេលកន្លងមក

សម្តេច ហ៊ុន សែន បានបញ្ជាក់ថា កម្ពុជាបាននឹងកំពុងប្រឈមយ៉ាងក្តៅគគុក ទៅនឹងការប្រើប្រាស់ព័ត៌មានក្លែងក្លាយបំពុលបរិយាកាសសង្គម ដែលបង្កឡើងដោយក្រុមអ្នកនយោបាយបក្សប្រឆាំង និងពួកឱកាសនិយមក្នុងគោលដៅប៉ុនប៉ងផ្តួលរំលំរាជរដ្ឋាភិបាលកម្ពុជា ស្របច្បាប់តាមរយៈការធ្វើបដិវត្តន៍ពណ៌។

សម្តេចបន្ថែមថា រាជរដ្ឋាភិបាលកម្ពុជា ត្រូវការសារព័ត៌មានដែលមានថាមពលប្រកបដោយការទទួលខុសត្រូវ និងមានភាពស្មោះត្រង់ចំពោះវិជ្ជាជីវៈ គឺទាមទារឲ្យអ្នកសារព័ត៌មានស្តាប់គ្រប់សំឡេង ហ៊ាននិយាយការពិត ហ៊ាននិយាយរិះគន់ក្នុងន័យស្ថាបនា និងហ៊ានទទួលយកការពិត ដើម្បីឲ្យព័ត៌មានរបស់ខ្លួនក្លាយជាព័ត៌មានពិត ហើយធ្វើការឆ្លុះបញ្ចាំងឱ្យឃើញគ្រប់តថភាពសង្គម៕

អត្ថបទ៖ សំភី