រាជរដ្ឋាភិបាល គ្រោងពង្រីកបន្ថែមផ្លូវជាតិលេខ១ ឱ្យបានធំទូលាយ

2018-12-21 04:19:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងសាធារណការ និងដឹកជញ្ជូន បានឱ្យទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) ធ្វើការសិក្សា ដើម្បីពង្រីកបន្ថែមផ្លូវជាតិលេខ១ ឱ្យបានធំទូលាយ ដើម្បីចូលរួមកាត់បន្ថយគ្រោះថ្នាក់ និងការកកស្ទះចរាចរណ៍ ជាពិសេសសម្រាប់រថយន្តដឹកជញ្ជូនទំនិញដែលឆ្លងកាត់តាមផ្លូវនេះ។ នេះបើតាមការថ្លែងរបស់លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន នៅក្នុងពិធីសម្ពោធមួយនៅកំពង់ផែស្វយ័តភ្នំពេញ កាលពីសប្តាហ៍មុន។

បើតាមការលើកឡើងរបស់លោក ស៊ុន ចាន់ថុល នាពេលកន្លងមក ឱ្យដឹងថា ផ្លូវជាតិលេខ១ គឺជាផ្នែក១ នៃផ្លូវអាស៊ានហាយវ៉េ AH1 រត់កាត់តំបន់ទំនាបនៃមហាអនុតំបន់ទន្លេមេគង្គ (GMS) បាងកក-ភ្នំពេញ-វង់តាវ ដែលនឹងផ្តល់សារៈសំខាន់យ៉ាងខ្លាំង ក្នុងការបម្រើឲ្យកិច្ចសហប្រតិបត្តិការ ការប្រកួតប្រជែង ការរួមគ្នារស់នៅជាសហគមន៍ ការតភ្ជាប់ ការធ្វើសមាហរណកម្មតំបន់ និងសកលភាវូបនីយកម្ម ពិសេសការដឹកជញ្ជូនឆ្លងកាត់ព្រំដែន ការផ្គត់ផ្គង់ភស្តុភារ លំហូរពាណិជ្ជកម្ម និងទេសចរណ៍ជាតិ-អន្តរជាតិ ដែលឆ្លងកាត់តាមច្រកទ្វារអន្តរជាតិនានារបស់កម្ពុជា។

លោក ស៊ុន ចាន់ថុល ថ្លែងនាពេលកន្លងមក

កាលពីថ្ងៃទី១៣ធ្នូកន្លងទៅនេះ ធនាគារអភិវឌ្ឍន៍អាស៊ី (ADB) បានចុះហត្ថលេខាផ្តល់ប្រាក់កម្ចីសម្បទានប្រមាណ ៧០លានដុល្លារ សម្រាប់កែលម្អ និងលើកកម្ពស់កំណាត់ផ្លូវជាតិលេខ១ និងផ្លូវជាតិលេខ៦។ ក្នុងនោះផ្លូវជាតិលេខ១ ចន្លោះពីអ្នកលឿងទៅបាវិត(គីឡូម៉ែត្រលេខ៦៣+៣០០ ដល់គីឡូម៉ែត្រលេខ ១៥៩+០០០) នឹងត្រូវលើកកម្រិតពីកម្រាលកៅស៊ូ DBST នាពេលប្ចុប្បន្ន ទៅជាកម្រាលកៅស៊ូ AC។

ចំណែកកាលពីខែមីនា ឆ្នាំ២០១៨ រាជរដ្ឋាភិបាលបានដាក់សម្ពោធឱ្យប្រើប្រាស់កំណាត់ផ្លូវជាតិលេខ១ ពីច្បារអំពៅ-ក្តីតាកុយ ប្រវែង៤គីឡូម៉ែត្រ ដោយចំណាយថវិកាជាង ២៣លានដុល្លារ ក្នុងនោះថវិកាប្រមាណជា ១៦លានដុល្លារ ជាជំនួយឥតសំណងរបស់រដ្ឋាភិបាលជប៉ុន និងថវិកា ៧,៨៧លានដុល្លារ ជាថវិកាបដិភាគរបស់រាជរដ្ឋាភិបាលកម្ពុជា សម្រាប់ដោះស្រាយគោលនយោបាយ និងផលប៉ះពាល់។ កំណាត់ផ្លូវដែលមានមានទទឹងចាប់ពី ២៥ម៉ែត្ររហូតដល់ ៣៩ម៉ែត្រនេះ គឺជាដំណាក់កាលចុងក្រោយនៃគម្រោងធ្វើឲ្យប្រសើរឡើងនូវកំណាត់ផ្លូវជាតិលេខ១ ពីភ្នំពេញ-អ្នកលឿង ដែលមានប្រវែងសរុបជិត ៥៦គីឡូម៉ែត្រ៕