កម្ពុជា សម្លឹងការនាំចេញសម្លៀកបំពាក់សម្រាប់រដូវរងា ទៅរុស្ស៊ី

2018-12-25 02:18:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ប៉ាន សូរស័ក្តិ រដ្ឋមន្រ្ដីក្រសួងពាណិជ្ជកម្មបានអះអាងថា ក្រៅពីទីផ្សារនៃការនាំចេញសម្លៀកបំពាក់ទៅកាន់សហភាពអឺរុប និងសហរដ្ឋអាមេរិកនោះ កម្ពុជាកំពុងតែចាប់ដៃគូជាមួយប្រទេសរុស្ស៊ី ដោយផ្ដោតសំខាន់ទៅលើសម្លៀកបំពាក់សម្រាប់រដូវរងារ អាវរោមសត្វ ឬអាវធំ ដែលជាសក្ដានុពល ក្នុងការពង្រីកទីផ្សារធំក្នុងការនាំចេញរបស់កម្ពុជា។ ការថ្លែងនេះ ធ្វើឡើងក្នុងពិធីបើកសន្និបាតបូកសរុបការងារពាណិជ្ជកម្មឆ្នាំ២០១៨ និងទិសដៅអនុវត្តន៍ការងារពាណិជ្ជកម្មឆ្នាំ២០១៩ កាលពីព្រឹកថ្ងៃទី២៤ ខែធ្នូ ឆ្នាំ២០១៨ នៅទីស្ដីការក្រសួងពាណិជ្ជកម្ម។

លោកថ្លែងថា រាជរដ្ឋាភិបាលកម្ពុជា បានចាប់ដៃគូលើកិច្ចព្រមព្រៀងពាណិជ្ជកម្មអឺរ៉ុប-អាស៊ី ក្នុងនោះគឺផ្ដោតជាមួយប្រទេសរុស្ស៊ី។ បន្ទាប់ពីចរចារួចរាល់ហើយ កម្ពុជានឹងបើកទីផ្សារសម្លៀកបំពាក់សម្រាប់រដូវរងារទៅកាន់ប្រទេសរុស្ស៊ី ដែលជាសក្ដានុពល ក៏ដូចជាកាលានុវត្ដភាពរបស់កម្ពុជាផងដែរ។

លោក ប៉ាន សូរស័ក្តិ ថ្លែងទៅកាន់អ្នកសារព័ត៌មានក្រោយពិធីបើកសន្និបាតសរុបការងារ កាលពីថ្ងៃទី២៤ធ្នូ ២០១៨។ រូបថត៖ AKP

លោករដ្ឋមន្រ្តីបានបញ្ជាក់ថា កម្ពុជាគឺសមាជិកនៃកិច្ចព្រមព្រៀងពាណិជ្ជកម្មគ្រប់ជ្រុងជ្រោយ ដូច្នេះបន្ទាប់ពីទីផ្សាររុស្ស៊ី កម្ពុជាក៏មានឱកាសនាំចេញទៅកាន់ប្រទេសផ្សេងៗជាច្រើនទៀតដូចជាប្រទេសចិន ឥណ្ឌា កូរ៉េខាងត្បូង ជប៉ុន អូស្រ្ដាលី និងប្រទេសណូវែលសេឡង់។

លោក ប៉ាន សូរស័ក្តិ រំពឹងថា ក្នុងឆ្នាំ២០១៩ខាងមុខ កម្ពុជានឹងមានភាពប្រកួតប្រជែង និងធ្វើការនាំចេញនូវផលិតផលបានច្រើន ជាពិសេសការនាំចេញសម្លៀកបំពាក់សម្រាប់រដូវរងារ ដែលរហូតមកដល់ពេលនេះ កម្ពុជាកំពុងចរចាបន្ដខិតខំជំរុញតាមនីតិវិធី និងយន្ដការនៃការសម្របសម្រួលទៅតាមប្រទេសនីមួយៗ។

យោងតាមរបាយការណ៍ក្រសួងពាណិជ្ជកម្មបានឱ្យដឹងថា ការនាំចេញរបស់កម្ពុជា មានកំណើនប្រមាណ ១០ភាគរយ ក្នុងឆ្នាំ២០១៨ ដែលកំណើននេះទទួលបានពីការបន្តកើនឡើងនៃវិស័យកាត់ដេរ និងការនាំចេញផលិតផលកសិកម្ម និងឧស្សាហកម្ម តាមរយៈការខិតខំបើកច្រកទីផ្សារ នាំចេញទៅកាន់ជាង ១៤៧ប្រទេស នៅទូទាំងពិភពលោក។ ចំពោះការនាំចេញនេះ មានទំហំប្រមាណជា ៦០ភាគរយ នៃផលិតផលក្នុងស្រុកសរុបរបស់កម្ពុជា៕

ប្រភព៖ AKP ប្រែសម្រួល៖ សំភី