វៀតណាម បើកព្រលានយន្តហោះ ដែលស្ថិតក្រោមការគ្រប់គ្រងរបស់ឯកជន ជាលើកដំបូង
- 2018-12-31 02:27:35
- ចំនួនមតិ 0 | ចំនួនចែករំលែក 0
វៀតណាម បើកព្រលានយន្តហោះ ដែលស្ថិតក្រោមការគ្រប់គ្រងរបស់ឯកជន ជាលើកដំបូង
ចន្លោះមិនឃើញ
វៀតណាម បានបើកសម្ពោធជាផ្លូវការព្រលានយន្តហោះអន្តរជាតិ Van Don, ស្ថានីយអ្នកដំណើរ Ha Long និងផ្លូវល្បឿនលឿន Ha Long-Van Don ដែលស្ថិតនៅក្នុងខេត្ត Quang Ninh កាលពីថ្ងៃទី៣០ ខែធ្នូ ឆ្នាំ២០១៨ ក្រោមអធិបតីភាពរបស់នាយករដ្ឋមន្រ្តីវៀតណាម លោក ង្វៀន សួនហ៊្វុក។
ហេដ្ឋារចនាសម្ព័ន្ធខាងលើនេះ ត្រូវបានចំណាយដើមទុនវិនិយោគប្រមាណ ៨៦០លានដុល្លារ ដោយក្រុមហ៊ុនឯកជន Sun Group។ ក្នុងនោះព្រលានយន្តហោះ Van Don ដែលចាប់ផ្តើមសាងសង់កាលពីឆ្នាំ២០១៥ លើផ្ទៃដី ២៨៨ហិកតា គឺជាព្រលានយន្តហោះអន្តរជាតិដំបូងរបស់វៀតណាម ដែលត្រូវបានធ្វើឡើងក្រោមរូបភាព BOT (សាងសង់-ប្រតិបត្តិការ-ផ្ទេរ) ក្នុងតម្លៃវិនិយោគជិត ៣២១លានដុល្លារ។
ព្រលានយន្តហោះនេះ មានសមត្ថភាពអាចទទួលយន្តហោះ Boeing 787, 777 និង Airbus A350, A320។ វាត្រូវបានសាងសង់ឡើងដើម្បីទទួលបានអ្នកដំណើរពី ២ ទៅ ២,៥លាននាក់ក្នុងមួយឆ្នាំ នៅត្រឹមឆ្នាំ២០២០ ហើយនឹងអាចកើនឡើងដល់ ៥លាននាក់នៅត្រឹមឆ្នាំ២០៣០។
ព្រលានយន្តហោះ Van Don ស្ថិតក្នុងផែនការរបស់រដ្ឋាភិបាលវៀតណាម ដែលចង់ពង្រីកព្រលានយន្តហោះអន្តរជាតិដល់ចំនួន ១៣ និងព្រលានយន្តហោះក្នុងស្រុក ដល់ចំនួន ១៥ នៅត្រឹមឆ្នាំ២០២៣។ បច្ចុប្បន្ន វៀតណាម មានព្រលានយន្តហោះចំនួន ២១ នៅទូទាំងប្រទេស។
លោក ង្វៀន សួនហ្វុក បានថ្លែងក្នុងពិធីបើកសម្ពោធនេះថា ព្រលានយន្តហោះ Van Don គឺជាគំរូមួយសម្រាប់បង្ហាញពីការចូលរួមរបស់វិស័យឯកជន ជាជាងការកាន់កាប់ដោយអង្គភាពរដ្ឋ ក្នុងការអភិវឌ្ឍហេដ្ឋារចនាសម្ព័ន្ធក្នុងប្រទេស។
បន្ទាប់ពីព្រលានយន្តហោះនេះ វៀតណាម ក៏គ្រោងនឹងវិនិយោគយ៉ាងហោចណាស់ ៣ពាន់លានដុល្លារ ដើម្បីសាងសង់ព្រលានយន្តហោះថ្មីចំនួន៦ទៀត ក្នុងរយៈពេល៥ឆ្នាំក្រោយ។ រដ្ឋាភិបាលវៀតណាម ក៏គ្រោងពង្រីកព្រលានយន្តហោះដែលមានស្រាប់ផងដែរ៕