អត្រាស្លាប់ ដោយសារយន្តហោះដឹកអ្នកដំណើរ កើនឡើងក្នុងឆ្នាំ២០១៨

2019-01-02 03:58:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អត្រាស្លាប់ដោយសារឧបទ្ទវហេតុយន្តហោះដឹកអ្នកដំណើរ នៅជុំវិញពិភពលោក បានហក់ឡើងក្នុងឆ្នាំ២០១៨។ នេះបើយោងតាមក្រុមហ៊ុនប្រឹក្សារបស់ហុល្លង់ To70 និងក្រុមហ៊ុនសុវត្ថិភាពអាកាសចរណ៍ Aviation Safety Network ដែលរាយការណ៍កាលពីថ្ងៃទី១ ខែមករា ឆ្នាំ២០១៩។

អ្នកជំនាញ ពិនិត្យបំណែកយន្តហោះ ជើងហោះហើរ Lion Air ដែលបានធ្លាក់កាលពីថ្ងៃទី២៩ តុលា ឆ្នាំ២០១៨

ក្រុមហ៊ុនទាំងពីរ បានរាយការណ៍ដូចគ្នាថា យ៉ាងហោចណាស់មនុស្សជាង ៥០០នាក់ បានស្លាប់ដោយសារឧបទ្ទវហេតុយន្តហោះ ក្នុងឆ្នាំ២០១៨។ យោងតាម To70 បានប៉ាន់ស្មានថា ឧបទ្ទវហេតុយន្តហោះដែលបណ្ដាលឲ្យមានអ្នកស្លាប់ កើតឡើង១លើក ក្នុងចំណោម ៣លានជើងហោះហើរ ឬស្មើនឹង ០,៣៦ ក្នុងចំណោមជើងហោះហើរមួយលានជើង។ តួលេខនេះ បានកើនឡើង បើធៀបទៅនឹងឆ្នាំ២០១៧ ដែលមាន ០,២៤ ក្នុងចំណោមជើងហោះហើរមួយលានជើង។ ក្នុង ៥ឆ្នាំចុងក្រោយ មាន ០,២៤ ក្នុងចំណោមជើងហោះហើរមួយលានជើង។

ក្នុងឆ្នាំ២០១៧ មនុស្ស ១៣នាក់បានស្លាប់ដោយសារឧបទ្ទវហេតុយន្តហោះ នៅជុំវិញពិភពលោក។

យោងតាម Aviation Safety Network ក្នុងរយៈពេល ២ទសវត្សរ៍ចុងក្រោយ ចំនួនស្លាប់នេះបានថយចុះ នៅទូទាំងពិភពលោក។ ក្នុងឆ្នាំ២០០៥ អ្នកស្លាប់មានចំនួន ១០១៥នាក់។

ឧបទ្ទវហេតុយន្តហោះសំខាន់ៗ កាលពីឆ្នាំ២០១៨ មាន៖

ថ្ងៃទី២៩ តុលា៖ ជើងហោះហើរ Lion Air ធ្លាក់នៅឥណ្ឌូណេស៊ី, ស្លាប់ ១៨៩នាក់
ខែឧសភា៖ ជើងហោះហើរ Cubana ធ្លាក់នៅប្រទេសគុយប៉ា, ស្លាប់ ១១២នាក់
ខែមេសា៖ កញ្ចក់បង្អួចរបស់ជើងហោះហើរ US Airline មួយបានបែកពេលកំពុងហោះហើរ បណ្ដាលឲ្យស្ត្រីម្នាក់ស្លាប់

ខែមីនា៖ ជើងហោះហើរ US-Bangla ធ្លាក់នៅនេប៉ាល់, ស្លាប់ ៥១នាក់
ខែកុម្ភៈ៖ ជើងហោះហើរ Saratov ធ្លាក់នៅរុស្ស៊ី, ស្លាប់ ៧១នាក់; ជើងហោះហើរ Aseman ធ្លាក់នៅអ៊ីរ៉ង់, ស្លាប់ ៦៦នាក់៕

ប្រភព៖ Channelnewsasia ប្រែសម្រួល៖ លាភ.