១សន្លឹកបើកបង្ហាញពីប្រវត្តិសម្ដែងរួមគ្នាលើកដំបូងរបស់ អម្ពរ ទេវី-ទេព រិនដារ៉ូ

2019-01-02 08:16:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ស៊ិន ច័ន្ទសាយ៉ា ទីប្រឹក្សាក្រសួងវប្បធម៌ និងវិចិត្រសិល្បៈ និងជាអតីតប្រធាននាយកដ្ឋានភាពយន្ត និងផ្សព្វផ្សាយវប្បធម៌ បានបើកកកាយលើកដំបូងបំផុតពីប្រវត្តិសម្ដែងរួមគ្នារវាងសិល្បករដ៏ល្បីឈ្មោះពីររូបគឺអ្នកនាង អម្ពរ ទេវី និងលោក ទេព រិនដារ៉ូ។

តាមរយៈរូបភាពមួយសន្លឹកខាងក្រោមនេះ បង្ហាញពីសិល្បកររៀមច្បងទាំងពីរនៅជាយុវវ័យនៅឡើយ ដោយលោក ស៊ិន ច័ន្ទសាយ៉ា ប្រាប់ថា នេះគឺជារូបភាពក្នុងការសម្ដែងជាតួឯករួមគ្នាលើកដំបូងបំផុតរបស់អ្នកទាំង២ ក្នុងទសវត្សរ៍ទី៩០។

លោកបង្ហើបដូច្នេះថា៖ «ចងចាំថាជារូបថតដែលកំលោះ ទេព រិនដារ៉ូ និងកញ្ញា អម្ពរ ទេវី សំដែងជាតួឯករួមគ្នាលើកដំបូងបង្អស់ក្នុងរឿង" អាថ៌កំបាំងនៃកិច្ចសន្យា" នាឆ្នាំ១៩៩០»។ រឿងនេះ គឺលោក ស៊ិន ច័ន្ទសាយ៉ា ជាផលិតករប្រតិបត្តិផ្ទាល់តែម្ដង។

បន្ទាប់ពីនោះមក ទេព រិនដារ៉ូ-អម្ពរ ទេវី ក៏បានក្លាយជាដៃគូសាកសម ក្នុងនោះចំណងដៃភាគច្រើននៃផលិតផលភាពយន្តខ្មែរពេញនិយមការសម្ដែងជាគូរបស់អ្នកទាំងពីរ។ រឿងដែល ទេព រិនដារ៉ូ និង អម្ពរ ទេវី សម្ដែងរួមគ្នាកាលពីអតីតកាលនោះមានដូចជារឿង "សម្ដីចុងក្រោយ" រឿង "សាកមើលសិន" និងរឿង "ឃ្លាំងជីវិត" ជាដើម។

យ៉ាងណាក៏ដោយ ក្រោយឧស្សាហកម្មភាពយន្តក្នុងស្រុកឆ្លងកាត់ស្ថានភាពដួលហើយងើបក្នុងអំឡុងឆ្នាំ ២០០០ ពិសេសបន្ទាប់ពីអ្នកនាង អម្ពរ ទេវី បានចេញទៅរស់នៅសហរដ្ឋអាមេរិកមក ការសម្ដែងរួមគ្នារបស់ពួកគេទាំងពីរ ក៏ត្រូវអាក់ខាន។

ពួកគេទាំងពីរ ទើបនឹងវិលមកការសម្ដែងរួមគ្នាជាថ្មី កាលពីឆ្នាំ ២០១៧ ក្នុងរឿង "ទឹកចិត្តម្ដាយសម័យថ្មី" របស់អ្នកនិពន្ធ ពាន់ ភួងបុប្ផា។ ក្រោយពីលេចមុខក្នុងរឿងថ្មីជាមួយគ្នានោះមក ពួកគេ ក៏ត្រូវបានទាក់ទងមកសម្ដែងរួមគ្នាជាថ្មីទៀត ក្នុងរឿង "ឆន្ទា" វណ្ណកម្មផលិតកម្ម "Red Picture” ដឹកនាំដោយលោក ឌៀប សុវណ្ណារ៉ា នៅក្នុងឆ្នាំ ២០១៨៕

ប្រភព៖ Sabay News អត្ថបទ៖ ទារិកា