ឆ្នាំ ២០១៨ កម្ពុជា-វៀតណាម រកឃើញអដ្ឋិធាតុទាហានវៀតណាម ជិត ៦០០ធាតុ

2019-01-03 02:01:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្នុងឆ្នាំ២០១៨ កន្លងទៅ កងទ័ពកម្ពុជា សហការជាមួយក្រុមរកអដ្ឋិធាតុវៀតណាម រកឃើញអដ្ឋិធាតុទាហានស្ម័គ្រចិត្តវៀតណាម ចំនួន ៥៩០ធាតុបន្ថែមទៀត។ នេះបើតាមការឲ្យដឹងរបស់លោកនាយឧត្តមសេនីយ៍ ឈុំ សុជាត អ្នកនាំពាក្យក្រសួងការពារជាតិ នៅលើទំព័រហ្វេសប៊ុករបស់លោក។

លោកបន្តថា ក្នុងចំណោមធាតុទាំងនោះ ត្រូវបានរកឃើញដោយ យោធភូមិភាគពិសេសចំនួន ៥២ធាតុ យោធភូមិភាគទី១ ចំនួន៣៦ធាតុ យោធភូមិភាគទី២ ចំនួន ២០៧ធាតុ យោធភូមិភាគទី៣ ចំនួន ១៣៥ធាតុ យោធភូមិភាគទី៤ ចំនួន ៩២ធាតុ និងយោធភូមិភាគទី៥ ចំនួន ៦៨ធាតុ។

ពិធីប្រគល់អដ្ឋិធាតុទាហានវៀតណាម ទៅឲ្យវៀតណាមនាពេលកន្លងមក

រាជរដ្ឋាភិបាលកម្ពុជា និងរដ្ឋាភិបាលវៀតណាម បានចុះហត្ថលេខាលើកិច្ចព្រមព្រៀងមួយ កាលពីថ្ងៃទី២៨ ខែសីហា ឆ្នាំ២០០០ ស្តីពីការរុករកការប្រមូលផ្តុំ និងការធ្វើមាតុភូមិនិវត្តអដ្ឋិធាតុរបស់កងទ័ពស្ម័គ្រចិត្តវៀតណាម ដែលពលីនៅសម័យសង្គ្រាមនៅកម្ពុជា។

រយៈពេល១៧ឆ្នាំ ពីឆ្នាំ២០០០ - ២០១៧ នៃប្រតិបត្តិការនេះ គណៈកម្មការស្តីពីកិច្ចការពិសេស នៃរដ្ឋាភិបាលទាំងពីរ បានចុះហត្ថលេខាលើអនុស្សរណៈយោគយល់គ្នាចំនួន១៥។

គិតមកទល់នឹងពេលនេះ ការរុករក និងប្រមូលផ្តុំអដ្ឋិធាតុ នៃកងទ័ពស្ម័គ្រចិត្តវៀតណាម ត្រូវបានរកឃើញចំនួនជាង ១៧ ៨៥០ អដ្ឋិធាតុ ហើយក៏បានធ្វើមាតុភូមិនិវត្តទៅកាន់ទីបញ្ចុះនៅប្រទេសវៀតណាម។

យោងតាមរបាយការណ៍របស់គណៈកម្មាធិការពិសេសស្វែងរកអដ្ឋិធាតុបង្ហាញថា បច្ចុប្បន្ន គឺនៅសល់អដ្ឋិធាតុរបស់ជនជាតិវៀតណាមជិត ៤ពាន់នាក់ទៀតនៅកម្ពុជា ដែលមិនទាន់ត្រូវបានរកឃើញនៅឡើយ។ កម្ពុជា-វៀតណាម បានកំណត់គោលដៅបញ្ចប់ការស្វែងរកអដ្ឋិធាតុជនជាតិវៀតណាមឱ្យអស់ នៅត្រឹមឆ្នាំ២០២០៕

ប្រភព៖ Vayo Fm ប្រែសម្រួល៖ សុខ សុវត្ថិ