ប្រធានធនាគារពិភពលោក ប្រកាសលាលែងពីតំណែងដ៏គួរឱ្យភ្ញាក់ផ្អើល
- 2019-01-08 04:24:21
- ចំនួនមតិ 0 | ចំនួនចែករំលែក 0
ប្រធានធនាគារពិភពលោក ប្រកាសលាលែងពីតំណែងដ៏គួរឱ្យភ្ញាក់ផ្អើល
ចន្លោះមិនឃើញ
ប្រធានធនាគារពិភពលោក (WB) លោក Jim Yong Kim បានប្រកាសលាលែងពីតំណែងមុនចប់អាណត្តិកាលពីថ្ងៃទី៧ ខែមករា ឆ្នាំ២០១៩ ដើម្បីទៅចាប់យកការងារថ្មីនៅក្នុងវិស័យឯកជនដោយមិនបានរំពឹងទុក។ លោកនឹងចុះចេញតំណែងនេះ នៅថ្ងៃទី១ ខែកុម្ភៈ ឆ្នាំ២០១៩ ដោយលោកស្រី Kristalina Georgieva ដែលជានាយកប្រតិបត្តិ នឹងឡើងតំណែងជាប្រធានស្តីទីនៃធនាគារនេះ។
នៅក្នុងសារអ៊ីមែលមួយដែលលោក Jim Yong Kim ផ្ញើទៅកាន់បុគ្គលិកធនាគារ បញ្ជាក់ថា លោកនឹងចូលរួមនៅក្នុងក្រុមហ៊ុនឯកជនមួយ ដោយផ្តោតលើការវិនិយោគហេដ្ឋារចនាសម្ព័ន្ធ ក្នុងប្រទេសកំពុងអភិវឌ្ឍន៍។
យ៉ាងណាមិញ បើតាមការចុះផ្សាយរបស់ Bloomberg ប្រធានាធិបតីអាមេរិក លោក ដូណាល់ ត្រាំ ត្រូវបានរំពឹងថា នឹងជ្រើសរើសប្រធានធនាគារពិភពលោកថ្មីជាជនជាតិអាមេរិក តាមគោលការណ៍របស់លោកគឺ "America First" ជំនួសលោក Jim Yong Kim ដែលត្រូវបានឧទ្ទេសនាមដោយលោក បារ៉ាក់ អូបាម៉ា។
យោងតាមសារព័ត៌មាន CGTN ឱ្យដឹងថា ក្នុងអំឡុងពេលនៃការកាន់តំណែងរបស់លោក Jim Yong Kim គឺលោកបានពង្រឹងភាពជាដៃគូជាមួយប្រទេសចិន លើការកាត់បន្ថយភាពក្រីក្រ ការអភិវឌ្ឍហិរញ្ញវត្ថុ ការវិនិយោគហេដ្ឋារចនាសម្ព័ន្ធ និងគម្រោងផ្លូវមួយខ្សែក្រវាត់មួយ។
ចំពោះកិច្ចសហការបែបនេះ ត្រូវបានលោក John Bolton ទីប្រឹក្សាសន្តិសុខជាតិរបស់ប្រធានាធិបតីអាមេរិក កាលពីឆ្នាំ២០១៦ បានសរសេរអត្ថបទមួយដោយចោទសួរធនាគារពិភពលោកជុំវិញការឱ្យចិន ខ្ចីលុយដ៏ច្រើនសន្ធឹកសន្ធាប់ ខណៈដែលប្រទេសនេះ បានដំណើរការរួចហើយនូវទីផ្សារហិរញ្ញវត្ថុសកល៕