ដំណើរផ្សងព្រេងទៅកាន់ខ្មោចកប៉ាល់ទីតានិក ត្រូវបានបើកសម្រាប់សាធារណជនទូទៅ

2019-01-09 07:51:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ចាប់ពីឆ្នាំ២០១៩នេះតទៅ សាធារណជនទូទៅអាចធ្វើដំណើរផ្សងព្រេងទៅកម្សាន្តនៅទីតាំងដែលកប៉ាល់ទីតានិក បានលិច កាលពីជាង១សតវត្សរ៍កន្លងទៅ តាមរយៈក្រុមហ៊ុនអាមេរិក OceanGate ដែលមានមគ្គុទ្ទេសក៍ ជំនាញចាំនាំភ្ញៀវទេសចរ។

ខ្មោចកប៉ាល់ទីតានិក

សំបុត្រដំណើរផ្សងព្រេងសម្រាប់មនុស្សម្នាក់ មានតម្លៃជាង ១០ម៉ឺនដុល្លារអាមេរិក (១០៥១២៩) ដោយមានរយៈពេល ១១ថ្ងៃ។ អ្នកទេសចរ នឹងផ្ដើមដំណើរផ្សងព្រេងរបស់ពួកគេ ដោយចាកចេញពីក្រុង St.John's ខេត្ត Newfoundland របស់ប្រទេសកាណាដា តាមរយៈការជិះឧទ្ធម្ភាគចក្រ។ ទៅដល់ពាក់កណ្ដាលផ្លូវ នឹងមានកប៉ាល់ចាំទទួល ដើម្បីបន្តដំណើរទៅកាន់តំបន់ដែលខ្មោចកប៉ាល់ទីតានិក ស្ថិតនៅ។

អ្នកជំនាញ នឹងនាំអ្នកទេសចរ ទៅកម្សាន្តមើលខ្មោចកប៉ាល់ទីតានិក

ក្រុមហ៊ុន OceanGate បានបញ្ជាក់ថា ដំណើរផ្សងព្រេងជើងទីមួយ នឹងចាប់ផ្ដើមនៅថ្ងៃទី២៦ ខែមិថុនា ឆ្នាំ២០១៩ ក្នុងនោះ កញ្ចប់ដំណើរផ្សងព្រេងចំនួន ៤ ត្រូវបានកក់ពេញអស់ហើយ។ យ៉ាងណាមិញ ក្រុមហ៊ុនបន្តថា អ្នកផ្សងព្រេងទាំងអស់ ត្រូវមានអាយុចាប់ពី ១៨ឆ្នាំឡើងទៅ ហ៊ានជិះទូកធុនតូចនៅលើសមុទ្រដែលប្រឈមនឹងស្ថានភាពលំបាក ព្រមទាំងតម្រូវឲ្យបង្ហាញចលនាបម្លាស់ទី ភាពបត់បែន និងលំនឹង និងត្រូវចូលរួមវគ្គបំពាក់បំប៉នជិះនាវាមុជទឹក Helicopter Underwater Egress ។

គួរបញ្ជាក់ថា កប៉ាល់ទីតានិក បានលិចបន្ទាប់ពីបុកផ្ទាំងទឹកកក កាលពីថ្ងៃទី១៤ ខែមេសា ឆ្នាំ១៩១២ ដែលបានឆក់យកជិវិតមនុស្ស ១៥០៣នាក់។ កប៉ាល់បានលិច អំឡុងដំណើរកម្សាន្ត ចេញដំណើរពីក្រុង Southampton នៃចក្រភពអង់គ្លេស ទៅកាន់ក្រុងញ៉ូយ៉ក សហរដ្ឋអាមេរិក៕