កំណាត់ផ្លូវជាតិលេខ៥ ក្នុងក្រុងកំពង់ឆ្នាំង នឹងត្រូវផ្អាកចរាចរណ៍២ថ្ងៃ
- 2019-01-10 02:09:12
- ចំនួនមតិ 0 | ចំនួនចែករំលែក 0
កំណាត់ផ្លូវជាតិលេខ៥ ក្នុងក្រុងកំពង់ឆ្នាំង នឹងត្រូវផ្អាកចរាចរណ៍២ថ្ងៃ
ចន្លោះមិនឃើញ
រដ្ឋបាលខេត្តកំពង់ឆ្នាំង នឹងបញ្ចៀសការធ្វើចរាចរណ៍រថយន្តធុនតូច និងផ្អាកបណ្តោះអាសន្នការធ្វើចរាចរណ៍រថយន្តធុនធំ នៅលើកំណាត់ផ្លូវជាតិលេខ៥ ក្នុងក្រុងកំពង់ឆ្នាំង នៅថ្ងៃទី១១ និងថ្ងៃទី១២ ខែមករា ឆ្នាំ២០១៩។ នេះបើតាមសេចក្តីជូនដំណឹងរបស់រដ្ឋបាលខេត្តកំពង់ឆ្នាំង កាលពីថ្ងៃទី៨ ខែមករា ២០១៩។
ការបញ្ចៀស និងផ្អាកចរាចរណ៍នេះ គឺដើម្បីរក្សាបាននូវសន្តិសុខ សុវត្ថិភាព របៀបរៀបរយ និងសណ្តាប់ធ្នាប់ ខណៈដែលរដ្ឋបាលខេត្តកំពង់ឆ្នាំង នឹងរៀបចំពិធីបុណ្យខួបអនុស្សាវរីយ៍លើកទី៤០ ទិវាជ័យជម្នះ ៧មករា ក្នុងរយៈពេល២ថ្ងៃខាងលើនេះ។
បើតាមសេចក្តីជូនដំណឹងដដែលឱ្យដឹងថា ការបញ្ចៀស និងការផ្អាកចរាចរណ៍នេះនឹងធ្វើឡើងចាប់ពីម៉ោង៥ព្រឹកទាំង២ថ្ងៃខាងលើ រហូតដល់ចប់កម្មវិធី ដោយត្រូវបានកំណត់ដូចខាងក្រោម៖
-ចំពោះរថយន្តធុនតូច៖ ត្រូវបញ្ចៀសការធ្វើចរាចរណ៍ចូលក្រុងកំពង់ឆ្នាំង ដោយត្រូវបើកតាមផ្លូវបំបែកសួនឆ្នាំង ក្នុងភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង មកដល់ចំណុចច្រមុះជ្រូក មុខហាងលក់ម៉ូតូហុងដា ក្នុងភូមិឃ្លាំងប្រាក់ សង្កាត់ប្អេរ ក្រុងកំពង់ឆ្នាំង។
-ចំពោះរថយន្តធុនធំ៖ ត្រូវផ្អាកការធ្វើចរាចរណ៍ចាប់ពីភូមិស្រះកែវ ឃុំមេលំ ស្រុកបរិបូណ៍ ដល់ភូមិព្រៃខ្មែរ ឃុំអណ្តូងស្នាយ ស្រុករលាប្អៀរ (ភ្នំដើមផ្កា)៕