ចិន ត្រូវការនាវាផ្ទុកយន្តហោះ យ៉ាងហោចណាស់ ៣គ្រឿង

2019-01-10 06:56:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រទេសចិន ត្រូវការនាវាផ្ទុកយន្តហោះយ៉ាងហោចណាស់ ៣គ្រឿង ដើម្បីការពារឆ្នេរសមុទ្រដ៏វែងរបស់ខ្លួនប្រមាណ ១,៨ម៉ឺនគីឡូម៉ែត្រ និងពង្រីកផលប្រយោជន៍នៅបរទេស។ នេះបើតាមលោក Zhang Junshe ជាអ្នកជំនាញម្នាក់នៅវិទ្យាសា្ថនស្រាវជ្រាវទ័ពជើងទឹក នៃប្រទេសចិន ថ្លែងទៅកាន់អ្នកសារព័ត៌មានក្នុងកិច្ចប្រជុំមួយកាលពីថ្ងៃទី៩ ខែមករា ឆ្នាំ២០១៩។

លោកលើកយ៉ាងដូច្នេះថា៖ «ទាំងអស់នេះ គឺតម្រូវឱ្យយើងបញ្ជូនកម្លាំងយោធាមួយ ទៅកាន់តំបន់សមុទ្រឆ្ងាយៗ ដើម្បីការពារ (ផលប្រយោជន៍)។ នៅក្នុងកាលៈទេសៈនេះ ខ្ញុំគិតថាយើងត្រូវការយ៉ាងហោចណាស់នាវាផ្ទុកយន្តហោះចំនួន ៣គ្រឿង។ ជាការពិត ដោយផ្អែកលើការអភិវឌ្ឍសេដ្ឋកិច្ច យើងអាចពិនិត្យមើលលើការបន្ថែមចំនួននេះបាន»។

នាវារបស់ចិនទី១ "Type 001A" ដែលផលិតក្នុងស្រុក

បើតាមអ្នកជំនាញដដែលនេះ ចាប់តាំងពីសង្គ្រាមអាភៀន ក្នុងឆ្នាំ១៨៤០ រហូតមកទល់នឹងការបង្កើតសាធារណរដ្ឋប្រជាមានិតចិន ក្នុងឆ្នាំ១៩៤៩ គឺប្រទេសនេះ បានរងការវាយប្រហារពីកងទ័ពជើងទឹករបស់លោកខាងលិច និងជប៉ុន ចំនួន ៤៧០ដង។

«យើងនឹងមិនឈ្លានពានប្រទេសណាមួយនោះទេ ប៉ុន្តែជនជាតិចិនមានការភ័យខ្លាចថា ប្រទេសពួកគេ នឹងត្រូវគេឈ្លានពានម្តងទៀត ដូច្នេះនេះជាមូលហេតុចម្បង ដែលយើងកំពុងពង្រឹងវិស័យការពារជាតិរបស់យើង ដើម្បីធានាដល់សន្តិសុខរបស់យើង»។ Zhang Junshe លើកឡើងបន្ថែម។

គួរបញ្ជាក់ថា បច្ចុប្បន្ននេះ ចិនមាននាវាផ្ទុកយន្តហោះដែលកំពុងប្រតិបត្តិការតែមួយគ្រឿងគត់ គឺនាវា Liaoning ដែលជានាវាបន្សល់តាំងពីសម័យអតីតសហភាពសូវៀត។ ចិនក៏មាននាវាផ្ទុកយន្តហោះមួយគ្រឿងទៀតដែរដែលផលិតក្នុងស្រុក ត្រូវបានគេស្គាល់ថា "Type 001A" ប៉ុន្តែកំពុងស្ថិតក្នុងដំណាក់កាលសាកល្បងនៅឡើយ។

បើតាមការចុះផ្សាយរបស់សារព័ត៌មាន Xinhua កាលពីខែវិច្ឆិកាកន្លងទៅ ប្រទេសចិន បានចាប់ផ្តើមសាងសង់នាវាផ្ទុកយន្តហោះទី៣ ប៉ុន្តែក្រសួងការពារជាតិចិន មិនបានបញ្ជាក់ពីការសាងសង់នេះឡើយ៕

ប្រភព៖ Japantimes ប្រែសម្រួល៖ សំភី