ឡាវ សងរថក្រោះទៅរុស្ស៊ីវិញ ក្រោយខ្ចីប្រើជាង ៣០ឆ្នាំ
- 2019-01-10 09:38:06
- ចំនួនមតិ 0 | ចំនួនចែករំលែក 0
ឡាវ សងរថក្រោះទៅរុស្ស៊ីវិញ ក្រោយខ្ចីប្រើជាង ៣០ឆ្នាំ
ចន្លោះមិនឃើញ
រថក្រោះ T-34 ចំនួន៣០គ្រឿងដែលឡាវ ខ្ចីពីរុស្ស៊ី (អតីតសហភាពសូវៀត) កាលពីឆ្នាំ១៩៨៧នោះ ត្រូវបានបញ្ជូនទៅដល់ក្រុងវ្ល៉ាឌីវ៉ូស្តុក ប្រទេសរុស្ស៊ីវិញហើយ កាលពីថ្ងៃទី៩ ខែមករា ឆ្នាំ២០១៩។ នេះបើតាមសេចក្តីប្រកាសព័ត៌មានក្រសួងការពារជាតិរុស្ស៊ី។
ការប្រគល់រថក្រោះវិញនេះ គឺជាផ្នែកមួយនៃកិច្ចសហប្រតិបត្តិការបច្ចេកទេសយោធារវាងក្រុងមូស្គូ និងវៀងចន្ទន៍ បន្ទាប់ពីរដ្ឋមន្រ្តីការពារជាតិរុស្ស៊ី លោក Sergei Shoigu បានបំពេញទស្សនកិច្ចនៅប្រទេសឡាវ កាលពីខែមករា ឆ្នាំ២០១៨។
រថក្រោះប្រយុទ្ធនេះ មានកេរ្តិ៍ឈ្មោះល្បីគួរសម កាលពីអំឡុងសង្គ្រាមលោកលើកទី២។ បើតាមការផ្សព្វផ្សាយរបស់ទូរទស្សន៍រុស្ស៊ី Zvezda បានបង្ហាញថា រថក្រោះខាងលើនេះ ត្រូវបានផលិតក្នុងឆ្នាំ ១៩៤៤។
លើសពីនេះ រថក្រោះ T-34 នឹងត្រូវដាក់បង្ហាញក្នុងព្យុហយាត្រាយោធាអបអរជ័យជម្នះសង្គ្រាមលោកលើកទី២ ដែលធ្វើឡើងនាថ្ងៃទី៩ ខែឧសភា ឆ្នាំ២០១៩ខាងមុខនេះ នៅតាមបណ្តាក្រុងមួយចំនួនក្នុងប្រទេសរុស្ស៊ី ព្រមទាំងយកទៅរក្សាទុកក្នុងសារមន្ទីរ ហើយសម្រាប់យកថតជាខ្សែភាពយន្តប្រវត្តិសាស្រ្តនៃសង្គ្រាមលោកលើកទី២ផងដែរ។ នេះបើតាមការលើកឡើងបន្ថែមរបស់ក្រសួងការពារជាតិរុស្ស៊ី៕