ចិន បំបែកកំណត់ត្រា ដោយទទួលការស្នើសុំប៉ាតង់ច្រើនបំផុតពីក្រុមហ៊ុនបរទេស
- 2019-01-11 08:55:24
- ចំនួនមតិ 0 | ចំនួនចែករំលែក 0
ចិន បំបែកកំណត់ត្រា ដោយទទួលការស្នើសុំប៉ាតង់ច្រើនបំផុតពីក្រុមហ៊ុនបរទេស
ចន្លោះមិនឃើញ
ក្រុមហ៊ុនបរទេស បានដាក់ស្នើសុំប័ណ្ណប៉ាតង់ នៅក្នុងប្រទេសចិន ក្នុងចំនួនកំណត់ត្រាមួយ ដែលមិនធ្លាប់មាន ខណៈរដ្ឋាភិបាលចិន អះអាងថា វាជាសញ្ញាវិជ្ជមានក្នុងការវិនិយោគពីបរទេស។ យោងតាមរបាយការណ៍របស់រដ្ឋបាលកម្មសិទ្ធិបញ្ញាចិន ដែលចេញផ្សាយកាលពីថ្ងៃទី១០ ខែមករា ឆ្នាំ២០១៩ បានឲ្យដឹងថា ការស្នើសុំប័ណ្ណប៉ាតង់នៅចិនដោយក្រុមហ៊ុនបរទេស កាលពីឆ្នាំ២០១៨ មានចំនួនសរុប ១៤៨០០០ សំណើ កើនឡើង ៩,១% ធៀបទៅនឹងឆ្នាំ២០១៧។
របាយការណ៍ខាងលើបន្តថា ក្រុមហ៊ុនបរទេស បានធ្វើការស្នើសុំម៉ាកសញ្ញា ចំនួន ២៤៤០០០ សំណើ ក្នុងឆ្នាំ២០១៨ ដែលកើនឡើង ១៦,៥% ធៀបទៅនឹងឆ្នាំ២០១៧។
លោក Bi Nan នាយករដ្ឋបាលកម្មសិទ្ធិបញ្ញាចិន ទទួលបន្ទុកផ្នែកផែនការ និងអភិវឌ្ឍន៍ បានថ្លែងក្នុងសន្និសីទសារព័ត៌មានមួយ នៅក្រុងប៉េកាំងថា តួលេខនេះ មានន័យថា ស្ថានភាពជំនួញនៅប្រទេសចិន កំពុងមានភាពល្អប្រសើរឡើង ហើយគេរំពឹងថា កំណើននឹងបន្តក្នុងរយៈពេលមធ្យម និងវែង។
របាយការណ៍របស់រដ្ឋបាលកម្មសិទ្ធិបញ្ញា ត្រូវបានចេញផ្សាយតែប៉ុន្មានម៉ោងប៉ុណ្ណោះ ក្រោយជំនួបចរចារវាងភាគីចិន និងអាមេរិក ដែលមានរយៈពេល ៣ថ្ងៃ នៅក្រុងប៉េកាំង លើដំណោះស្រាយសង្គ្រាមពាណិជ្ជកម្ម។
ក្នុងឆ្នាំ២០១៨ ការស្នើសុំប័ណ្ណប៉ាតង់ដោយអ្នកបង្កើតថ្មី នៅចិនដីគោក មានជាង ១,៥លានសំណើ ក្នុងនោះ ប័ណ្ណប៉ាតង់ចំនួន ៤៣២០០០ ប័ណ្ណ ត្រូវបានផ្ដល់ជូន។
ក្រុមហ៊ុនបច្ចេកវិទ្យាដ៏ធំរបស់ចិន Huawei ត្រូវបានផ្ដល់ប័ណ្ណប៉ាតង់ចំនួន ៣៣០០ ប័ណ្ណ កាលពីឆ្នាំមុន ដែលជាចំនួនច្រើនបំផុត បើធៀបទៅនឹងក្រុមហ៊ុនចិនដទៃទៀត។
ដោយឡែក នៅសហរដ្ឋអាមេរិកវិញ អ្នកបង្កើតថ្មីដែលធ្វើការឲ្យក្រុមហ៊ុនចិន ទទួលបានប័ណ្ណប៉ាតង់ចំនួន ១២៥៨៩ ប័ណ្ណ ក្នុងឆ្នាំ២០១៨ កើនឡើង ១២% ។ នេះបើយោងតាមការិយាល័យប៉ាតង់ និងម៉ាកសញ្ញាអាមេរិក៕
អត្ថបទទាក់ទង ចិន នឹងដណ្ដើមតំណែងមហាអំណាចសេដ្ឋកិច្ចពីអាមេរិក នៅឆ្នាំក្រោយ