ក្រសួង ប្រកាសដកអាជ្ញាបណ្ណទេសចរណ៍ពីភោជនីយដ្ឋាន-អាហារដ្ឋាន ជុំវិញបញ្ហាមួយ
- 2019-01-15 03:00:00
- ចំនួនមតិ 0 | ចំនួនចែករំលែក 0
ក្រសួង ប្រកាសដកអាជ្ញាបណ្ណទេសចរណ៍ពីភោជនីយដ្ឋាន-អាហារដ្ឋាន ជុំវិញបញ្ហាមួយ
ចន្លោះមិនឃើញ
យោងតាមសារាចរណែនាំរបស់ក្រសួងទេសចរណ៍ ចុះថ្ងៃទី១១ ខែមករា ឆ្នាំ២០១៩ បានឲ្យដឹងថា ក្រសួងទេសចរណ៍ នឹងសម្រេចដកហូតមកវិញនូវអាជ្ញាបណ្ណទេសចរណ៍ មូលដ្ឋានអាជីវកម្មភោជនីយដ្ឋាន និងអាហារដ្ឋានទេសចរណ៍ទាំងឡាយណា ដែលពុំបានអនុវត្តត្រឹមត្រូវតាមបទដ្ឋានអនាម័យ ឬតាមការណែនាំរបស់ក្រសួងសុខាភិបាល ឬមន្ទីរសុខាភិបាល ឬរដ្ឋបាលថ្នាក់ក្រោមជាតិ។
សារាចររបស់ក្រសួងទេសចរណ៍បានឲ្យដឹងថា ក្រសួងទេសចរណ៍ និងមន្ទីរទេសចរណ៍រាជធានី ខេត្ត នឹងមិនផ្ដល់អាជ្ញាបណ្ណទេសចរណ៍ដល់គ្រប់អាជីវកម្មភោជនីយដ្ឋាន និងអាហារដ្ឋានទេសចរណ៍ទាំងឡាយណា ដែលមិនមានវិញ្ញាបនបត្របញ្ជាក់អនាម័យ ចេញពីក្រសួងសុខាភិបាល ឬមន្ទីរសុខាភិបាល ឬរដ្ឋបាលថ្នាក់ក្រោមជាតិឡើយ។
ក្រសួងបានរំឭកថា យោងតាមច្បាប់ស្ដីពីទេសចរណ៍មាត្រា៣២ កថាខណ្ឌទី២ បានបញ្ញត្តិថា "គ្មានបុគ្គលណាម្នាក់អាចប្រកបអាជីវកម្មទេសចរណ៍បានទេ ប្រសិនបើបុគ្គលនោះមិនបានទទួលការផ្ដល់អាជ្ញាបណ្ណទេសចរណ៍ពីក្រសួងទេសចរណ៍ ឬពីរដ្ឋបាលថ្នាក់ក្រោមជាតិ។...” ដែលក្នុងនោះលក្ខខណ្ឌផ្ដល់អាជ្ញាបណ្ណទេសចរណ៍សម្រាប់អាជីវកម្មភោជនីយដ្ឋាន និងអាហារដ្ឋានទេសចរណ៍ តម្រូវឲ្យមានជាចាំបាច់នូវវិញ្ញាបនបត្របញ្ជាក់អនាម័យពីក្រសួងសុខាភិបាល ឬមន្ទីរសុខាភិបាល ឬរដ្ឋបាលថ្នាក់ក្រោមជាតិ។
ក្រសួងបន្តថា កន្លងមកមានអាជីវកម្មភោជនីយដ្ឋាន និងអាហារដ្ឋានទេសចរណ៍មួយចំនួន មិនទាន់បានអនុវត្តកាតព្វកិច្ចស្នើសុំអាជ្ញាបណ្ណទេសចរណ៍ ក៏ដូចជាការអនុវត្តឲ្យបាននូវការស្នើសុំវិញ្ញាបនបត្របញ្ជាក់អនាម័យនេះទេ៕