គ.ជ.ប នឹងចាត់វិធានការច្បាប់លើបុគ្គល៣រូបដែលមិនព្រមបង់ប្រាក់ពិន័យ ក្នុងរឿង «ម្រាមដៃស្អាត»
- 2019-01-16 01:43:03
- ចំនួនមតិ 0 | ចំនួនចែករំលែក 0
គ.ជ.ប នឹងចាត់វិធានការច្បាប់លើបុគ្គល៣រូបដែលមិនព្រមបង់ប្រាក់ពិន័យ ក្នុងរឿង «ម្រាមដៃស្អាត»
ចន្លោះមិនឃើញ
គណៈកម្មាធិការជាតិរៀបចំការបោះឆ្នោត (គ.ជ.ប) នឹងចាត់វិធានការច្បាប់ទៅលើអតីតមន្ត្រីនៃអតីតគណបក្សសង្គ្រោះជាតិ ចំនួន០៣នាក់ នៅខេត្តបាត់ដំបង ដែលបានគេចវេសបង់ប្រាក់ពិន័យពី ៥លានរៀល ទៅ១០លានរៀល ពាក់ព័ន្ធនឹងការរារាំងប្រជាពលរដ្ឋដែលមានសិទ្ធិបោះឆ្នោតមិនឲ្យទៅបោះឆ្នោត និងធ្វើឲ្យមានការភ័ន្តច្រឡំ នាំឲ្យបាត់ទំនុកចិត្តលើការបោះឆ្នោត។ នេះបើតាមការឱ្យដឹងពីលោក សោម សូរីដា អគ្គលេខាធិការរង គ.ជ.ប។
បុគ្គលទាំង០៣នាក់ រួមមានៈ ១. លោក ជា ជីវ មានទីលំនៅឃុំអន្លង់វិល ស្រុកសង្កែ ខេត្តបាត់ដំបង ដោយពិន័យជាប្រាក់ ១០លានរៀល។ ២. លោក ថោង សារឿន មានទីលំនៅភូមិ-ឃុំ គាស់ក្រឡ ស្រុកគាស់ក្រឡ ខេត្តបាត់ដំបង ដោយពិន័យជាប្រាក់ ៥លានរៀល និង៣. លោក គ្រុយ គឹមសាំង មានទីលំនៅស្រុកកំរៀង ខេត្តបាត់ដំបង ដោយពិន័យជាប្រាក់ ៥លានរៀល។
លោក សោម សូរីដា បានបញ្ជាក់ថា ក្នុងការប្រមូលប្រាក់ពិន័យ គ.ជ.ប ធ្លាប់បានជូនដំណឹងដល់បុគ្គលទាំងបីរូប ឲ្យចូលខ្លួនបង់ប្រាក់ពិន័យដោយស្ម័គ្រចិត្ត ដោយទុករយៈពេលយ៉ាងយូរ៣០ថ្ងៃ បន្ទាប់ពីថ្ងៃបានទទួលលិខិតបង្គាប់ឲ្យបង់ប្រាក់ពិន័យ ប៉ុន្តែសាមីខ្លួនមិនព្រមបង់ប្រាក់ពិន័យតាមកាលកំណត់នោះទេ។
បុគ្គលទាំងបីនាក់នេះ មិនសុខចិត្តចំពោះការសម្រេចរបស់ គ.ជ.ប ក៏បានប្តឹងបន្តទៅក្រុមប្រឹក្សាធម្មនុញ្ញ។ ហើយនៅថ្ងៃទី១៥ ខែសីហា ឆ្នាំ២០១៨ ក្រុមប្រឹក្សាជំនុំជម្រះ នៃក្រុមប្រឹក្សាធម្មនុញ្ញ បានចេញសេចក្តីសម្រេចបិទផ្លូវតវ៉ា ដោយតម្កល់ការសម្រេចរបស់ គ.ជ.ប ទុកជាបានការដដែល។
សូមជម្រាបថា នៅក្នុងរយៈកាលនៃយុទ្ធនាការឃោសនាបោះឆ្នោតជ្រើសតាំងតំណាងរាស្ត្រ នីតិកាលទី៦ ក្រុមបុគ្គលខាងលើនេះ បានធ្វើការបង្ហោះរូបភាព និងសារមួយចំនួន ដោយលើកម្រាមដៃ ក្នុងន័យបំផុសបំផុលមិនឲ្យប្រជាពលរដ្ឋទៅចូលរួមបោះឆ្នោត នាថ្ងៃទី២៩ ខែកក្កដា ឆ្នាំ២០១៨ ដោយគេប្រើពាក្យមួយឃ្លាថា “យុទ្ធនាការម្រាមដៃស្អាត” មានន័យថា មិនចូលរួមបោះឆ្នោត។
ក្រោយពីមានយុទ្ធនាការម្រាមដៃស្អាត ក្នុងគោលបំណងរារាំងមិនឲ្យប្រជាពលរដ្ឋបានបំពេញកាតព្វកិច្ចជាពលរដ្ឋខ្មែរបែបនេះ ទើបក្រុមការងារនៃគណបក្សប្រជាជនកម្ពុជា បានដាក់ពាក្យប្តឹង ទៅគណៈកម្មការរៀបចំការបោះឆ្នោតខេត្តបាត់ដំបង កាលពីថ្ងៃទី១៩ ខែកក្កដា ឆ្នាំ២០១៨ ដើម្បីចាត់វិធានការតាមផ្លូវច្បាប់៕