រដ្ឋមន្រ្តីសេដ្ឋកិច្ច ស្នើឱ្យស៊ុយអែត ជួយរៀបចំផ្តល់ភាពងាយស្រួលសម្រាប់អ្នកបង់ពន្ធនៅកម្ពុជា

2019-01-16 06:57:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានស្នើឱ្យអាជ្ញាធរពន្ធដារស៊ុយអែត ជួយដល់អគ្គនាយកដ្ឋានពន្ធដារកម្ពុជា ពង្រឹងបន្ថែមទៀតចំពោះកំណែទម្រង់គោលនយោបាយពន្ធដារ និងរដ្ឋបាលពន្ធដារកម្ពុជា តាមរយៈការជួយរៀបចំ និងបង្កលក្ខណៈក្នុងការផ្តល់សេវាបង់ពន្ធឱ្យកាន់តែល្អប្រសើរជូនដល់អ្នកបង់ពន្ធ។ សំណើនេះ ត្រូវបានធ្វើឡើងក្នុងជំនួបរវាងលោក អូន ព័ន្ធមុនីរ័ត្ន និងលោកស្រី Katrin Westling Palm អគ្គនាយកនៃទីភ្នាក់ងារពន្ធដារស៊ុយអែត កាលពីថ្ងៃទី១៥ ខែមករា ឆ្នាំ២០១៩ នៅទីស្តីការក្រសួងសេដ្ឋកិច្ច។

ជំនួបរវាងលោកស្រី Katrin Westling Palm និងលោក អូន ព័ន្ធមុនីរ័ត្ន កាលពីថ្ងៃទី១៥មករា ២០១៩។ រូបថត៖ ក្រសួងសេដ្ឋកិច្ច

លោកឧបនាយករដ្ឋមន្រ្តី លើកឡើងថា ការជួយរៀបចំនេះ នឹងជំរុញឱ្យមានការគោរពកាតព្វកិច្ចពន្ធ និងបង់ពន្ធខ្ពស់ ការប្រមូលពន្ធប្រកបដោយប្រសិទ្ធភាព ក៏ដូចជាជួយរៀបចំរចនាសម្ព័ន្ធដែលពិបាកក្នុងការគេចពន្ធ តាមរយៈបាវចនា "បង្កើតបរិយាកាសល្អជូនអ្នកជាប់ពន្ធ ដើម្បីងាយស្រួលក្នុងការបង់ពន្ធ ប៉ុន្តែលំបាកក្នុងការគេចពន្ធ"។ នេះបើយោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ច។

ក្នុងជំនួបពិភាក្សានេះ លោកស្រី Katrin Westling Palm បានលើកឡើងថា គោលបំណងនៃដំណើរទស្សនកិច្ចរបស់គណៈប្រតិភូលោកស្រី នៅកម្ពុជា គឺដើម្បីពង្រឹងបំណងសាមគ្គីភាព និងកិច្ចសហប្រតិបត្តិការទ្វេភាគីរវាងអគ្គនាយកដ្ឋានពន្ធដារកម្ពុជា និងទីភ្នាក់ងារពន្ធដារស៊ុយអែត ការផ្លាស់ប្តូរនូវចំណេះដឹង និងបទពិសោធន៍លើវិស័យពន្ធដារ និងស្វែងយល់អំពីវឌ្ឍនភាពការងាររបស់កម្មវិធីកែទម្រង់ ការគ្រប់គ្រងហិរញ្ញវត្ថុ។

បើតាមសេចក្តីប្រកាសព័ត៌មានដដែលនេះ ឱ្យដឹងថា បច្ចុប្បន្ន ទីភ្នាក់ងារពន្ធដារស៊ុយអែត បាននឹងកំពុងផ្តល់ជំនួយបច្ចេកទេសទាក់ទិននឹង៖

១. ហានិភ័យក្នុងវិស័យនៃការទូទាត់សាច់ប្រាក់

២. សិក្សាអំពីសមិទ្ធិលទ្ធភាព នៃការប្រមូលពន្ធលើចំណូលរូបវន្តបុគ្គល

៣. ជួយពង្រឹងផ្នែកសេវាអ្នកជាប់ពន្ធ៕

អត្ថបទ៖ សំភី