ចិន៖ NASA ស្នើឲ្យពួកយើងជួយ ក្នុងបេសកកម្មទៅកាន់ព្រះចន្ទ

2019-01-16 07:07:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មន្ត្រីជាន់ខ្ពស់កម្មវិធីភពព្រះចន្ទ របស់ចិន បានអះអាងថា អ្នកវិទ្យាសាស្ត្រមកពីទីភ្នាក់ងារអវកាស NASA របស់សហរដ្ឋអាមេរិក បានស្នើមកខាងភាគីចិន ដើម្បីសុំប្រើប្រាស់យានអវកាស Chang'e 4 ក្នុងបេសកកម្មឡើងទៅកាន់ផ្នែកម្ខាងនៃភពព្រះចន្ទ។

លោក Wu Weiren មន្ត្រីជាន់ខ្ពស់កម្មវិធីភពព្រះចន្ទ (រូបថត៖ KY Cheng)

លោក Wu Weiren មន្ត្រីជាន់ខ្ពស់កម្មវិធីភពព្រះចន្ទ បានប្រាប់ប៉ុស្តិ៍ទូរទស្សន៍ក្នុងស្រុក CCTV កាលពីថ្ងៃទី១៥ ខែមករា ឆ្នាំ២០១៩ថា អ្នកវិទ្យាសាស្ត្រ NASA ធ្លាប់ដាក់សំណើដូច្នេះ នៅក្នុងសន្និសីទសារព័ត៌មានអន្តរជាតិមួយ កាលពីប៉ុន្មានឆ្នាំកន្លងទៅ។

លោកឲ្យដឹងថា អ្នកវិទ្យាសាស្ត្រអាមេរិក បានស្នើឲ្យចិន ពន្យារអាយុកាលរបស់ផ្កាយរណប Queqiao ដើម្បីអនុញ្ញាតឲ្យអាមេរិក ដាក់ឧបករណ៍របស់ខ្លួនចូលក្នុងយានអវកាស Chang'e 4 ។ ធ្វើដូច្នេះ អាចជួយឲ្យអាមេរិក រៀបចំផែនការដើម្បីចុះចតលើភពព្រះចន្ទបានដោយខ្លួនឯង។

ការអះអាងរបស់មន្ត្រីជាន់ខ្ពស់ចិនខាងលើ បានធ្វើឡើង បន្ទាប់ពីចិនបានសម្រេចជោគជ័យលើកដំបូងជាប្រវត្តិសាស្ត្រ ក្នុងការចុះចតយាន Chang'e-4 នៅលើផ្នែកម្ខាងទៀតនៃភពព្រះចន្ទ នាថ្ងៃទី៣ ខែមករា ឆ្នាំ២០១៩កន្លងទៅ។ យានអង្កេតនេះ ត្រូវបានរំពឹងថា នឹងសិក្សាពីទីតាំងភូមិសាស្រ្ត សមាសភាពរ៉ែ និងរចនាសម្ព័ន្ធលើផ្ទៃដីនៅតំបន់ងងឹតភពព្រះចន្ទនោះ។

យានរបស់ចិន បានទៅដល់ផ្នែកម្ខាងនៃព្រះចន្ទ នាពេលថ្មីៗកន្លងទៅ (រូបថត៖ Xinhua)

យោងតាមសារព័ត៌មានក្នុងស្រុក បានចុះផ្សាយថា សហរដ្ឋអាមេរិក រួមជាមួយដៃគូដទៃទៀត ដូចជា អាល្លឺម៉ង់ ស៊ុយអែត ហុល្លង់ និងអារ៉ាប៊ីសាអ៊ូឌីត បានសហការជាមួយចិន លើគម្រោងភពព្រះចន្ទនេះ។

កាលពីថ្ងៃទី១៤មករា អ្នកវិទ្យាសាស្ត្រចិន បានបង្ហើបថា ចិនបានផ្ដល់ទិន្នន័យនៃការចុះចតយាន Chang'e 4 នៅលើផ្នែកម្ខាងនៃព្រះចន្ទ ទៅឲ្យទីភ្នាក់ងារ NASA ផងដែរ។ យ៉ាងណាមិញ NASA មិនបានចេញសេចក្ដីថ្លែងការណ៍ ជុំវិញកិច្ចសហការជាមួយភាគីចិនឡើយ។

កាលពីឆ្នាំ២០១១ សភាអាមេរិក បានចេញសេចក្ដីព្រាងច្បាប់មួយ រឹតបន្តឹងកិច្ចសហប្រតិបត្តិការនានា រវាង អាមេរិក និងចិន លើផ្នែកអវកាស។ ចំណែកលោក Wu លើកឡើងថា ចិនសម្រេចយកអាមេរិកជាដៃគូ ព្រោះនេះជាឱកាសមាស។ លោកថា អាមេរិកចង់ស្វែងយល់ពីទំហំនៃផលប៉ះពាល់របស់អាចម៍ផ្កាយ ដែលបានធ្លាក់នៅលើព្រះចន្ទ៕

ប្រភព៖ South China Morning Post ប្រែសម្រួល៖ លាភ.