រកឃើញហ្វូស៊ីលមនុស្សអាយុកាល ៨ម៉ឺនឆ្នាំក្នុងរូងភ្នំមួយនៅឡាវ

2019-01-16 09:28:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អ្នកវិទ្យាសាស្រ្តបារាំង បានរកឃើញហ្វូស៊ីលមនុស្សដែលមានអាយុកាល ៨ម៉ឺនឆ្នាំនៅក្នុងរូងភ្នំ Pha Ling ខេត្ត Huaphan ប្រទេសឡាវ។ នេះគឺជាហ្វូស៊ីលដ៏ចំណាស់ជាងគេបំផុតមួយដែលត្រូវបានរកឃើញនៅក្នុងតំបន់អាស៊ីអាគ្នេយ៍។ នេះបើតាមការចុះផ្សាយរបស់ The South East Asia Globe កាលពីសប្តាហ៍មុន។

ប្រជាជនឡាវក្នុងតំបន់ ជួយជីកកកាយរកហ្វូស៊ីល និងវត្ថុបុរាណផ្សេងទៀតក្នុងរូងភ្នំ Pha Ling។ រូបថត៖ Uffe Wilken

អ្នកស្រាវជ្រាវបារាំងមួយរូបលោកបណ្ឌិត Fabrice Demeter បាននិយាយថា ពួកគេបានរកឃើញហ្វូស៊ីលមនុស្សចំនួន៧នាក់ ក្នុងរូងភ្នំនេះ ដែលមានអាយុកាលពី ៥ម៉ឺន ទៅ ៨ម៉ឺនឆ្នាំ។ ហ្វូស៊ីលទាំងនេះ គឺតំណាងឱ្យមនុស្សទំនើប (Homo Sapiens) ដែលមានអាយុកាលដ៏ចំណាស់បំផុតក្នុងតំបន់។

សកម្មភាពរុករកហ្វូស៊ីលក្នុងរូងភ្នំ Pha Ling។ រូបថត៖ Uffe Wilken

លោកបានឱ្យដឹងថា គម្រោងស្រាវជ្រាវ ឡាវ-បារាំង នៅរូងភ្នំ Pha Ling និងតំបន់ជុំវិញ បានធ្វើឡើងអស់រយៈពេលជាច្រើនឆ្នាំមកហើយ ប៉ុន្តែទើបតែបានរកឃើញភស្តុតាងប្រវត្តិសាស្រ្តនេះ កាលពីខែធ្នូកន្លងទៅ។

ហ្វូស៊ីលមួយចំនួននឹងត្រូវបញ្ជូនទៅប្រទេសបារាំងដើម្បីដាក់តាំងពិព័រណ៍ និងពិនិត្យ ហើយនឹងត្រូវបញ្ជូនមកប្រទេសឡាវវិញ នៅឆ្នាំក្រោយ។

លលាដ៏ល្បាលដំបូងគេ ដែលត្រូវបានរកឃើញក្នុងរូងភ្នំ Pha Ling។ រូបថត៖ Fabrice Demeter

លោក Phonephanh Sychanthongthid មន្រ្តីនាយកដ្ឋានបេតិកភណ្ឌនៃក្រសួងព័ត៌មាន វប្បធម៌ និងទេសចរណ៍ប្រទេសឡាវ បានថ្លែងប្រាប់ Vientiane Times នៅថ្ងៃទី១៦ ខែមករា ឆ្នាំ២០១៩ថា ក្រសួងកំពុងតែស្នើដាក់រូងភ្នំ Pha Ling និងតំបន់ជុំវិញ ជាតំបន់បេតិកភណ្ឌជាតិមួយ។

លោកបន្តថា រូងភ្នំនេះមានតម្លៃជាប្រវត្តិសាស្រ្តដ៏សំខាន់ ហើយមិនតែប៉ុណ្ណោះវាស្ថិតក្នុងតំបន់អភិរក្ស Nam Et Phou Loey National ផងដែរ។ លោកថា ដូច្នេះមានមូលហេតុគ្រប់គ្រាន់ ក្នុងការដាក់ជាតំបន់បេតិកភណ្ឌជាតិ ដែលអាចធ្វើឱ្យទីនោះ ក្លាយជាតំបន់ទេសចរណ៍ដ៏ទាក់ទាញបំផុត៕

ប្រភព៖ Vientiane Times ប្រែសម្រួល៖ សំភី