វៀតណាម ប្រើប្រាស់ទឹកប្រាក់ជាង ៦០០លានដុល្លារ សាងសង់កំពង់ផែ១បន្ថែមទៀត

2019-01-17 03:35:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នាយករដ្ឋមន្ត្រីវៀតណាម លោក Nguyen Xuan Phuc បានឯកភាពឲ្យសាងសង់កំពង់ផែ My Thuy ដែលត្រូវប្រើប្រាស់ទឹកប្រាក់ប្រមាណ ១៤,២៣ទ្រីលានដុង ឬប្រមាណ ៦០៨ លានដុល្លារអាមេរិក នៅខេត្ត Quang Tri ភាគកណ្ដាលប្រទេសវៀតណាម។ នេះបើយោងតាមការប្រកាសរបស់គណៈកម្មាធិការប្រជាជនវៀតណាមនៃខេត្ត Quang Tri ក្នុងពិធីមួយកាលពីថ្ងៃទី១៥ ខែមករា ឆ្នាំ២០១៩។

ប្លង់កំពង់ផែ My Thuy (រូប៖ baomoi.com)

គម្រោងសាងសង់កំពង់ផែនេះ ស្ថិតនៅតំបន់សេដ្ឋកិច្ចពិសេស Dong Nam នៅឃុំ Hai An ស្រុក Hai Lang ខេត្ត Quang Tri ប្រទេសវៀតណាម។ អ្នកវិនិយោគពីក្រុមហ៊ុនកំពង់ផែអន្តរជាតិ My Thuy និងភាគីពាក់ព័ន្ធនានា បានបោះទុនវិនិយោគលើគម្រោងនេះ។

កំពង់ផែ My Thuy នឹងត្រូវសាងសង់លើផ្ទៃដី ៦៨៥ហិកតា ដែលមានសមត្ថភាពទទួលកប៉ាល់ចូលចត ដែលមានទម្ងន់រហូតដល់ ១០ម៉ឺនតោន។ ការសាងសង់ ចែកជា ៣ដំណាក់កាល ដោយដំណាក់កាលទី១ ចាប់ពីឆ្នាំ២០១៨ ដល់ ២០២៥, ដំណាក់កាលទី២ ឆ្នាំ២០២៦ ដល់ ២០៣១ និង ដំណាក់កាលចុងក្រោយ ពីឆ្នាំ២០៣២ ដល់ ២០៣៦។ កំពង់ផែនេះ នឹងត្រូវប្រើប្រាស់ជាច្រករបៀងសេដ្ឋកិច្ចភាគខាងកើត និងខាងលិច ដើម្បីបម្រើដល់តំបន់សេដ្ឋកិច្ច Dong Nam និងទទួលទំនិញពីប្រទេសឡាវ និងភាគឦសានប្រទេសថៃ។

ថ្លែងក្នុងពិធីប្រកាសខាងលើ លោក Nguyen Duc Chinh ប្រធានគណៈកម្មាធិការប្រជាជនវៀតណាមខេត្ត Quang Tri បានឲ្យដឹងថា តាមការគ្រោងទុក ពិធីសម្ពោធបើកការដ្ឋានសាងសង់ នឹងប្រព្រឹត្តទៅ នាខែកញ្ញា ឆ្នាំ២០១៩ខាងមុខនេះ។

សូមជម្រាបថា តំបន់សេដ្ឋកិច្ច Dong Nam ជាតំបន់សេដ្ឋកិច្ចតែមួយគត់របស់ខេត្ត Quang Tri ដែលគ្របដណ្ដប់លើផ្ទៃដី ២៣៧៩២ ហិកតា ក្នុងឃុំចំនួន១៧ នៃស្រុកចំនួន៣ ៕

អត្ថបទទាក់ទង វៀតណាម គ្រោងចំណាយជាង ៣០០លានដុល្លារ សង់កំពង់ផែសមុទ្រថ្មីមួយ

ប្រភព៖ Vietnam News ប្រែសម្រួល៖ លាភ.