ប្រធានាធិបតីឡាវ ប្រាប់កងទ័ពឱ្យពង្រឹងស្មារតីត្រៀមប្រយុទ្ធ ដើម្បីការពារទឹកដី
- 2019-01-21 06:31:19
- ចំនួនមតិ 0 | ចំនួនចែករំលែក 0
ប្រធានាធិបតីឡាវ ប្រាប់កងទ័ពឱ្យពង្រឹងស្មារតីត្រៀមប្រយុទ្ធ ដើម្បីការពារទឹកដី
ចន្លោះមិនឃើញ
ប្រធានាធិបតីឡាវ លោក Bounnhang Vorachit បានប្រាប់កងទ័ពឱ្យមានការប្រុងប្រយ័ត្ន បង្កើនភាពក្លាហាន ពង្រឹងស្មារតីជាតិនិយម និងត្រៀមខ្លួនប្រយុទ្ធចំពោះសកម្មភាពអមិត្តណាមួយ ដើម្បីការពារឯករាជ្យ អធិបតេយ្យភាព និងបូរណភាពទឹកដីរបស់ខ្លួន។ លោកថ្លែងដូច្នេះ ក្នុងពិធីព្យុហយាត្រារំលឹកខួប ៧០ឆ្នាំ នៃថ្ងៃបង្កើតកងទ័ពរំដោះប្រជាជនឡាវ កាលពីថ្ងៃទី២០ ខែមករា ឆ្នាំ២០១៩ នៅក្រុងវៀងចន្ទន៍។
លោកបន្តថា កងទ័ពទាំងអស់ ត្រូវមានការរួបរួមសាមគ្គីគ្នា និងត្រូវពង្រឹងខ្លួនឯងដោយការបង្កើនសមត្ថភាពបញ្ជា និងភាពជាអ្នកដឹកនាំ ហ្វឹកហាត់សមយុទ្ធក្នុងសមរភូមិជាក់ស្តែង ព្រមទាំងបច្ចេកទេសទំនើបនានាផងដែរ។
លោកប្រធានាធិបតី បានជំរុញឱ្យកងទ័ពចូលរួមរក្សាធានានូវស្ថិរភាពនយោបាយ សណ្តាប់ធ្នាប់សង្គម និងសន្តិសុខជូនប្រជាជនឡាវ។ ជាមួយគ្នានេះ កងទ័ពឡាវទូទាំងប្រទេស ក៏ត្រូវបានណែនាំឱ្យចូលរួមលើកកម្ពស់ និងពង្រឹងមនោគមន៍វិជ្ជានយោបាយ ព្រមទាំងបណ្តាញសន្តិសុខនៅគ្រប់កម្រិតមូលដ្ឋានទាំងអស់ផងដែរ។
សូមរំលឹកថា កងទ័ពប្រជាជនឡាវ ដែលពីមុនមានឈ្មោះថា «Lao Issara Army» ត្រូវបានលោកប្រធានាធិបតី Kaysone Phomvihane ប្រកាសបង្កើតនៅថ្ងៃទី២០ ខែមករា ឆ្នាំ១៩៤៩ ក្នុងស្រុក Xiengkhor ខេត្ត Huaphan ដែលជាតំបន់ដ៏រឹងមាំនៃការធ្វើបដិវត្តន៍របស់ឡាវ។
គួរជម្រាបថា ក្នុងពិធីរំលឹកខួបនេះ មានអ្នកចូលរួមរាប់ម៉ឺននាក់ ដែលជាមេដឹកនាំ និងសមាជិកបក្សកុម្មុយនិស្តឡាវ កងទ័ព មន្រ្តីសាធារណៈ ព្រមទាំងមានការចូលរួមពីតំណាងប្រមុខយោធារបស់កម្ពុជា វៀតណាម រុស្ស៊ី ចិន ថៃ និងមីយ៉ាន់ម៉ាផងដែរ៕