សម្តេច ហ៊ុន សែន ជំរុញឱ្យក្រុមហ៊ុនចិន ឆាប់សាងសង់ផ្លូវល្បឿនលឿនភ្នំពេញ-ព្រះសីហនុ

2019-01-21 07:12:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចនាយករដ្ឋមន្រ្តី ហ៊ុន សែន បានជំរុញឱ្យក្រុមហ៊ុនវិនិយោគសាជីវកម្មស្ពាន និងថ្នល់ចិន (China Road and Bridge Corporation) បើកការដ្ឋានសាងសង់ឱ្យបានឆាប់នូវគម្រោងផ្លូវល្បឿនលឿនភ្នំពេញ-ព្រះសីហនុ ដែលត្រូវបានធ្វើការដោះស្រាយរួចមកហើយនោះ។ ការថ្លែងនេះ ធ្វើឡើងក្នុងជំនួបរវាងសម្តេច ហ៊ុន សែន និងថ្នាក់ដឹកនាំនៃក្រុមហ៊ុននេះ នៅថ្ងៃទី២១ ខែមករា ឆ្នាំ២០១៩ ក្នុងឱកាសដែលសម្តេចកំពុងបំពេញទស្សនកិច្ចផ្លូវការនៅក្រុងប៉េកាំង ប្រទេសចិន។

ជាមួយគ្នានេះ សម្តេច ហ៊ុន សែន ក៏បានណែនាំឱ្យក្រុមហ៊ុនចិននេះ សិក្សាជាបន្ទាន់ពាក់ព័ន្ធនឹងការកសាងផ្លូវដែលត្រូវតភ្ជាប់ចេញពីរាជធានីភ្នំពេញ ជាមួយនឹងផ្លូវល្បឿនលឿននេះផងដែរ។

សម្តេច ហ៊ុន សែន ក្នុងជំនួបជាមួយថ្នាក់ដឹកនាំក្រុមហ៊ុនចិន នាថ្ងៃទី២១ មករា ២០១៩ នៅក្រុងប៉េកាំង។ រូបថត៖ ហ្វេសប៊ុកសម្តេច ហ៊ុន សែន

សូមជម្រាបថា ការសាងសង់ផ្លូវល្បឿនលឿនភ្នំពេញ-ព្រះសីហនុ គ្រោងនឹងចំណាយថវិកាប្រមាណ ១៩០០លានដុល្លារ ដែលសាងសង់ដោយក្រុមហ៊ុនចិនខាងលើ ក្រោមរូបភាពវិនិយោគសាងសង់-ធ្វើអាជីវកម្ម-ផ្ទេរ (BOT)។

បើតាមការលើកឡើងរបស់លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន កាលពីថ្មីៗនេះ ឱ្យដឹងថា ផ្លូវល្បឿនលឿននេះ នឹងអាចបើកការដ្ឋានសាងសង់នៅក្នុងអំឡុងខែកុម្ភៈ ឬដើមខែមីនាខាងមុខនេះ ខណៈដែលគ្រឿងចក្រដែលមានតម្លៃប្រមាណ ១០០លានដុល្លារ នឹងត្រូវបញ្ជូនមកដល់កម្ពុជា នៅដំណាច់ខែមករាខាងមុខនេះ ឯអ្នកបច្ចេកទេស-វិស្វកម្មចិនប្រហែល២០០នាក់ បានមកដល់ហើយ។

គម្រោងផ្លូវល្បឿនលឿននេះ ឆ្លងកាត់ ៤រាជធានីខេត្ត រួមមាន រាជធានីភ្នំពេញ ខេត្តកណ្តាល ខេត្តកំពង់ស្ពី ខេត្តព្រះសីហនុ ក្នុងនោះគឺឆ្លងកាត់ ៦ស្រុក ១ខណ្ឌ ២ក្រុង ៣១ឃុំ/សង្កាត់ និង១១០ភូមិ។ ផ្លូវល្បៀនលឿននេះ ក្រាលបេតុងកៅស៊ូ AC មានប្រវែងសរុបជាង ១៩០គីឡូម៉ែត្រ (គិតរួមទាំងស្ពាន និងលូទាំងអស់) ហើយមានទទឹងសរុប ២៤,៥ម៉ែត្រ ក្នុងនោះមានគន្លងផ្លូវរថយន្ត (២x៣,៧៥ម៉ែត្រ) សងខាង ជាយផ្លូវកៅស៊ូ២ (២x២,៥ម៉ែត្រ) សម្រាប់ម៉ូតូ ជាយផ្លូវដីក្រហម ២(២x០,៧៥) សម្រាប់ថ្មើរជើង និងសួននៅអ័ក្សកណ្តាលទ្រូងផ្លូវ ៣ម៉ែត្រ ព្រមទាំងមានស្ពាន ៨៩កន្លែង។

ផ្លូវនេះមានកន្លែងសម្រាប់ឈប់សម្រាកចំនួន៤កន្លែង និងស្ថានីយប្រេងឥន្ធនៈ ៣កន្លែង។ ផ្លូវនេះក៏មានរបងអមតាមសងខាងផ្លូវនោះដើម្បីការពារសត្វពាហនៈឆ្លងកាត់ និងរបាំងការពារសំឡេងរំខាន សរុបប្រហែល៥៧,១៩គីឡូម៉ែត្រ ព្រមទាំងមានកន្លែងមនុស្ស និងសត្វព្រៃឆ្លងកាត់ចំនូន ៣៥២កន្លែងផងដែរ៕

អត្ថបទទាក់ទង៖

អត្ថបទ៖ សំភី