ក្រុមហ៊ុនចិន គ្រោងសង់ផ្លូវល្បឿនលឿនពីភ្នំពេញ ទៅព្រំដែនវៀតណាម

2019-01-21 08:05:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហ៊ុនវិនិយោគសាជីវកម្មស្ពាន និងថ្នល់ចិន (China Road and Bridge Corporation) បានបង្ហាញពីគម្រោងសាងសង់ផ្លូវល្បឿនលឿនពីភ្នំពេញ ទៅបាវិត (ព្រំដែនកម្ពុជា-វៀតណាម) ទៅកាន់សម្តេចនាយករដ្ឋមន្រ្តី ហ៊ុន សែន ក្នុងជំនួបពិភាក្សាមួយនៅក្រុងប៉េកាំង នៅថ្ងៃទី២១ ខែមករា ឆ្នាំ២០១៩។

ជាការឆ្លើយតប សម្តេច ហ៊ុន សែន បានណែនាំឱ្យក្រុមហ៊ុន ត្រូវតែសិក្សានិងជជែកគ្នាបន្ថែមជាមួយនឹងស្ថាប័នពាក់ព័ន្ធ ដោយសារមានក្រុមហ៊ុនជាច្រើនបានសិក្សារួចមកហើយ។

សម្តេច ហ៊ុន សែន ក្នុងជំនួបជាមួយថ្នាក់ដឹកនាំក្រុមហ៊ុនចិន នាថ្ងៃទី២១ មករា ២០១៩ នៅក្រុងប៉េកាំង។ រូបថត៖ ហ្វេសប៊ុកសម្តេច ហ៊ុន សែន

សូមជម្រាបថា ក្រុមហ៊ុនចិនខាងលើនេះ ទទួលបានសិទ្ធិវិនិយោគសាងសង់ផ្លូវល្បឿនលឿន ភ្នំពេញ-ព្រះសីហនុ ប្រវែងជាង ១៩០គីឡូម៉ែត្រ ក្នុងទំហំទឹកប្រាក់ ១៩០០លានដុល្លារ ក្រោមរូបភាពវិនិយោគសាងសង់-ធ្វើអាជីវកម្ម-ផ្ទេរ (BOT) រួចមកហើយ។

ជុំវិញគម្រោងសាងសង់ផ្លូវល្បឿនលឿនភ្នំពេញ-បាវិតនេះ លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្ដីក្រសួងសាធារណការ និងដឹកជញ្ជូន បានឱ្យដឹងកាលពីចុងសប្តាហ៍កន្លងទៅថា រហូតមកដល់ពេលនេះ គឺបានសិក្សារួចរាល់ចប់សព្វគ្រប់អស់ហើយ ដែលត្រូវចំណាយថវិកាអស់ប្រមាណ ៣៨០០លានដុល្លារ។ រាជរដ្ឋាភិបាលបានអនុញ្ញាតឱ្យទីភ្នាក់ងារសហប្រតិបត្តិការអន្ដរជាតិនៃប្រទេសជប៉ុន (JICA) ធ្វើការសិក្សាផ្លូវល្បឿនលឿនដែលមានចម្ងាយផ្លូវប្រវែង ១៦០គីឡូម៉ែត្រ ដើម្បីធ្វើការសាងសង់ផ្លូវនេះ។

លោកបានគូសបញ្ជាក់ថា ការចំណាយយ៉ាងច្រើនសម្រាប់សាងសង់ផ្លូវល្បឿនលឿននេះ ដោយសារតែផ្លូវដែលត្រូវសាងសង់ គឺមានលិចទឹក ហើយកាត់តាមបឹង ឬតំបន់លិចទឹកច្រើន ដែលមានប្រវែងរហូតដល់ ៨០គីឡូម៉ែត្រ ជាហេតុធ្វើឱ្យតម្លៃក្នុងការចំណាយសាងសង់ច្រើន៕

អត្ថបទទាក់ទង៖ ផ្លូវល្បឿនលឿន ភ្នំពេញ-បាវិត នឹងត្រូវចំណាយសាងសង់ច្រើនជាងផ្លូវ ភ្នំពេញ-ព្រះសីហនុ

អត្ថបទ៖ សំភី