ក្រុងមួយរបស់ចិន និងខេត្តព្រះសីហនុ ពង្រឹងកិច្ចសហប្រតិបត្តិការលើវិស័យ៤

2019-01-22 08:09:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គណៈប្រតិភូក្រុងឈីងតាវ ដឹកនាំដោយលោក លួយ ជៀនជុន អភិបាលរងក្រុងឈីងតាវ បានជួបសម្ដែងការគួរសមអភិបាលខេត្តព្រះសីហនុ លោក យន្ត មីន ដើម្បីពង្រឹងកិច្ចសហប្រតិបត្តិការរវាងខេត្តទាំងពីរ លើវិស័យ សេដ្ឋកិច្ច ពាណិជ្ជកម្ម វិទ្យាសាស្ត្រអប់រំ និង ទេសចរណ៍។

ថ្លែងក្នុងជំនួប នៅសាលាខេត្តព្រះសីហនុ នាថ្ងៃទី២២ ខែមករា ឆ្នាំ២០១៩នេះ លោក លួយ ជៀនជុន សង្ឃឹមថា កំពង់ផែឈាងតាវ និងកំពង់ផែក្រុងព្រះសីហនុ នឹងសហការគ្នាក្នុងការដឹកជញ្ជូនកាន់តែប្រសើរឡើង។ ក្នុងឆ្នាំ២០១៨ ទីក្រុងឈីងតាវ ទទួលបានភ្ញៀវទេសចរ ១០០លាននាក់ ដោយលោកសង្ឃឹមថា ទីក្រុងឈីងតាវ និងទីក្រុងព្រះសីហនុ នឹងបន្តកិច្ចសហការលើវិស័យទេសចរណ៍កាន់តែល្អថែមទៀត។

លោក ក៏បានសំណូមពរដល់អភិបាលខេត្តព្រះសីហនុ ដឹកនាំគណៈប្រតិភូ ទៅចូលរួមរដូវកាលស្រាបៀរនៅខេត្តឈីងតាវ និងបានភ្លក់រសជាតិស្រាថ្មីៗ ដើម្បីបង្កើនទំនាក់ទំនង និងកិច្ចសហប្រតិបត្តិការរវាងខេត្តទាំងពីរ កាន់តែជិតស្និត។

លោក យន្ត មីន បានស្វាគមន៍គណៈប្រតិភូទីក្រុងឈីងតាវ ព្រមទាំងបានជំរាបជូនពីសក្តានុពលរបស់ខេត្ត មានកំពង់ផែអន្តរជាតិក្រុងព្រះសីហនុ មានវិសាលភាពធំទូលាយ សម្រាប់តភ្ជាប់ការដឹកជញ្ជូន តាមផ្លូវសមុទ្រជាលក្ខណៈជាតិ អន្តរជាតិបម្រើទំនិញជាកុងតឺន័រចេញ-ចូលប្រមាណជិត ៧៣ភាគរយ នៃបរិមាណទំនិញនាំចេញ នាំចូលទូទាំងប្រទេស។

លោកបន្តថា ខេត្តមានព្រលានយន្តហោះអន្តរជាតិ ដោយបានដើរតួនាទីយ៉ាងសំខាន់ក្នុងការដឹកជញ្ជូនអ្នកដំណើរជាតិ និងអន្តរជាតិមកទស្សនា និងវិនិយោគ នៅខេត្តព្រះសីហនុ។ បច្ចុប្បន្នព្រលានយន្តហោះប្រតិបត្តិការដោយក្រុមហ៊ុនអាកាសចរណ៍ចំនួន ១១ក្រុមហ៊ុន ក្នុងនោះមានជើងហោះហើរក្នុងស្រុក មាន ៨៣ជើង ក្នុងមួយសប្តាហ៍ និងក្រៅស្រុក ៦១ជើង ក្នុងមួយសប្តាហ៍ ។ គោលដៅហោះហើរត្រង់ពីខេត្ត ក្រុងប្រទេសចិន មកខេត្តព្រះសីហនុមាន ១៦ខេត្ត ក្រុង។ លោកបន្ថែមថា ខេត្តព្រះសីហនុមានតំបន់សេដ្ឋកិច្ចពិសេសចំនួន ៤កន្លែង កំពុងដំណើរការមានរោងចក្រតូច-ធំសរុប ១៦០កន្លែង និងសិប្បកម្ម ១០៣៧កន្លែង ស្រូបយកកម្លាំងពលកម្មសរុប ៦៨៣៥៤នាក់។ ភ្ញៀវទេសចរ ជាមធ្យមមានការកើនឡើងពី ១០ ទៅ ១៥ភាគរយក្នុងមួយឆ្នាំ ជាពិសេសភ្ញៀវទេសចរចិន ស្ថិតក្នុងលំដាប់លេខមួយដែលមានចំនួន ២០២៩៤៧នាក់ កើនឡើង ៦៨,៧៩ភាគរយ ។

លោក យន្ត មីន ឲ្យដឹងទៀតថា បច្ចុប្បន្នមានអ្នកវិនិយោគចិនមកខេត្តព្រះសីហនុស្ថិតក្នុងលំដាប់លេខ១ ដែលមករកស៊ី និងវិនិយោគច្រើនក្នុងវិស័យឧស្សាហកម្ម ពាណិជ្ជកម្មដឹកជញ្ជូន សំណង់ និងទេសចរណ៍។ ក្នុងនាមអាជ្ញាធរដែនដី លោកគាំទ្រអ្នកវិនិយោគចិន ដែលអនុវត្តតាមគោល នយោបាយផ្លូវមួយ ខ្សែក្រវាត់មួយ របស់ប្រធានាធិបតីចិន ធ្វើឲ្យខេត្តព្រះសីហនុ មានការអភិវឌ្ឍលឿនយ៉ាងគំហុក ព្រមទាំងសំណូមពរដល់គណៈប្រតិភូ ជួយផ្សព្វផ្សាយពីសក្តានុពលរបស់ខេត្ត និងជួយជំរុញ អ្នកវិនិយោគចិនមកកាន់ខេត្តព្រះសីហនុបន្ថែមទៀត៕

អត្ថបទ៖ លាភ.