សម្តេច ហ៊ុន សែន បានស្នើអ្វីខ្លះទៅកាន់នាយករដ្ឋមន្រ្តីចិន?

2019-01-23 03:15:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្នុងជំនួបពិភាក្សាទ្វេភាគីជាមួយលោក លី ខឺឈាង នាយករដ្ឋមន្រ្តីចិន កាលពីថ្ងៃទី២២ ខែមករា ឆ្នាំ២០១៩ នៅក្រុងប៉េកាំង សម្តេច ហ៊ុន សែន បានលើកបង្ហាញនូវគម្រោង ៦សំខាន់ៗពាក់ព័ន្ធនឹងប្រព័ន្ធហេដ្ឋារចនាសម្ព័ន្ធ ផ្លូវ ស្ពាន និងប្រព័ន្ធអគ្គិសនី ដោយសម្តេចបានស្នើឲ្យចិន គាំទ្រគម្រោងសំខាន់ៗនេះ។

ពាក់ព័ន្ធនឹងការធ្វើពាណិជ្ជកម្មសេរី សម្តេចនាយករដ្ឋមន្រ្តី បានស្នើឲ្យភាគីទាំង២ពិនិត្យ និងសិក្សាទៅលើបញ្ហានេះ។ ក្នុងជំនួបនោះ សម្តេចក៏បានស្នើឲ្យចិន បន្តនាំចូលផលិតផល និងកសិផលរបស់កម្ពុជាឲ្យបានកាន់តែច្រើនថែមទៀតលើសពីអ្វីដែលមាននាពេលបច្ចុប្បន្ន ខណៈដែលប្រទេសចិនជាទីផ្សារដ៏ធំមួយនៅលើពិភពលោក។

ពាក់ព័ន្ធនឹងវិស័យវប្បធម៌ ទេសចរណ៍ និងអប់រំ ក៏ដូចជាវិស័យផ្សេងៗទៀតនោះ សម្តេច ហ៊ុន សែន បានថ្លែងអំណរគុណមិត្តចិន ដែលបានជួយកម្ពុជានាពេលកន្លងមក ហើយសម្តេចក៏បានស្នើឲ្យចិន បន្តជួយលើវិស័យនេះបន្ថែមទៀត។

សម្តេច ហ៊ុន សែន ក្នុងជំនួបជាមួយលោក លី ខឺឈាង នៅក្រុងប៉េកាំង កាលពីថ្ងៃទី២២ មករា ២០១៩ (រូបថត៖ ផ្តល់សិទ្ធិដោយ Reuters)

ជាមួយគ្នានេះ សម្តេចបានស្នើឱ្យចិនជួយជួសជុលប្រាសាទបុរាណនៅកម្ពុជា ហើយអរគុណដល់ចិន ដែលបានផ្តល់អាហារូបករណ៍ដល់និស្សិតកម្ពុជា ដែលបច្ចុប្បន្នមាននិស្សិតកម្ពុជាជិត ២ពាន់នាក់ កំពុងសិក្សានៅក្នុងប្រទេសចិន។

សម្តេចតេជោ ក៏បានស្វាគមន៍ចំពោះការចូលចតរបស់នាវាចិន នៅខេត្តព្រះសីហនុចំនួន៣លើកនៅក្នុងឆ្នាំ២០១៨កន្លងទៅ។ សម្តេច ហ៊ុន សែន ក៏បានអរគុណលោក លី ខឺឈាង ចំពោះការផ្តល់ជំនួយ ៨៤០លានយ័នសម្រាប់វិស័យយោធានាពេលកន្លងទៅនេះ។ សម្តេច បានបង្ហាញការចង់ឃើញរដ្ឋាភិបាលចិន បន្តជួយដល់វិស័យផ្សេងៗទៀត រួមទាំងវិស័យនគរបាលផងដែរសម្រាប់ការគ្រង់គ្រងសន្តិសុខ។

ជាចុងក្រោយសម្តេច ហ៊ុន សែន បានអញ្ជើញលោក លី ខឺឈាង មកបំពេញទស្សនកិច្ចនៅប្រទេសកម្ពុជា ក្នុងពេលវេលាសមស្របណាមួយ។

ជាការឆ្លើយតប លោកនាយករដ្ឋមន្ត្រីចិន បានមានប្រសាសន៍ថា រដ្ឋាភិបាលចិន នឹងបង្កើនការនាំចូលអង្ករពីកម្ពុជា ដើម្បីជួយដល់កម្ពុជា។ រីឯគម្រោងជួសជុលប្រាសាទព្រះវិហារ និងប្រាសាទផ្សេងៗទៀត កម្ពុជា និងចិន អាចបន្តសហការគ្នា។ ចិននឹងបន្តនាំចូលកសិផលពីប្រទេសកម្ពុជាផងដែរ ហើយសង្ឃឹមថា កម្ពុជានឹងបន្តនាំចេញកសិផលផ្សេងៗទៀតទៅកាន់ប្រទេសចិន និងបណ្តាប្រទេសផ្សេងៗទៀត។

លោក លី ខឺឈាង ក៏បានស្នើឲ្យកម្ពុជា និងចិន បន្តប្រើប្រាស់យន្តការដែលមាន គឺ យន្តការទ្វេភាគី និងយន្តការតំបន់។

លោកបានលើកឡើងដែរថា លោកនឹងរកពេលវេលាសមស្របណាមួយមកបំពេញទស្សនកិច្ចនៅកម្ពុជា៕

អត្ថបទទាក់ទង៖