កូរ៉េ គ្រោងបង្កើតផ្សារបោះដុំផលិតផលកសិកម្ម នៅកម្ពុជា

2019-01-23 04:22:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រទេសកូរ៉េខាងត្បូង គ្រោងអភិវឌ្ឍវិស័យកសិកម្មនៅកម្ពុជាឱ្យមាននិរន្តរភាព តាមរយៈការបង្កើតផ្សារបោះដុំផលិតផលកសិកម្ម និងការបង្កើតប្រព័ន្ធព័ត៌មានទីផ្សារ។ ការបង្ហាញពីគម្រោងនេះ ធ្វើឡើងដោយលោក JEONG Yun Gilm នាយកទីភ្នាក់ងារកិច្ចសហប្រតិបត្តិការអន្តរជាតិកូរ៉េ (KOICA) ក្នុងជំនួបជាមួយលោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ នាព្រឹកថ្ងៃ២៣ ខែមករា ឆ្នាំ២០១៩ នៅទីស្តីការក្រសួង។

លោក JEONG Yun Gilm ក្នុងជំនួបជាមួយលោក វេង សាខុន នាព្រឹកថ្ងៃទី២៣មករា ២០១៩ (រូបថត៖ ហ្វេសប៊ុកក្រសួងកសិកម្ម)

ជាការឆ្លើយតប លោករដ្ឋមន្រ្តី បានសម្តែងការស្វាគមន៍ និងគាំទ្រចំពោះគម្រោងនេះ ព្រោះវានឹងជួយរកទីផ្សារបន្លែ ផ្លែឈើឱ្យកសិករ ជាកន្លែងផ្តល់ព័ត៌មានទាក់ទងនឹងទីផ្សារ តម្លៃ បរិមាណផ្គត់ផ្គង់ ដែលអ្នកបញ្ជាទិញត្រូវការ និងជាកន្លែងណាត់ជួបរវាងអ្នកបរិភោគ ឈ្មួញកណ្តាល ជាមួយអ្នកផ្គត់ផ្គង់។ ជាពិសេស គម្រោងនេះ នឹងបង្កលក្ខណៈងាយស្រួលដល់មន្ត្រីជំនាញក្នុងការត្រួតពិនិត្យគុណភាព សុវត្ថិភាព អនាម័យ និងប្រភពទំនិញច្បាស់លាស់ ដើម្បីបង្កើននូវជំនឿទុកចិត្ត និងការធានាត្រឹមត្រូវ។

ជាមួយគ្នានេះ លោក វេង សាខុន បានវាយតម្លៃខ្ពស់ជូនចំពោះរាជរដ្ឋាភិបាលសាធារណរដ្ឋកូរ៉េ ដែលបានគាំទ្រ និងជួយឧបត្ថម្ភទាំងបច្ចេកទេស និងហិរញ្ញវត្ថុសម្រាប់ការកសាង និងអភិវឌ្ឍកម្ពុជា ឱ្យមានការរីកចម្រើនលើគ្រប់វិស័យ និងជាពិសេសវិស័យកសិកម្ម។

លោកបន្តថា សមិទ្ធផលសំខាន់ៗជាច្រើនដែលកម្ពុជា សម្រេចបាននាពេលនេះ គឺបានមកពីកិច្ចសហប្រតិបត្តិការយ៉ាងល្អប្រសើររវាងប្រទេសទាំងពីរ ហើយលោករដ្ឋមន្ត្រី ជឿជាក់ថាគម្រោងថ្មីនេះនឹងពង្រឹង និងពង្រីកសាមគ្គីភាព មិត្តភាព និងកិច្ចសហប្រតិបត្តិការរវាងប្រទេសទាំងពីរ ឱ្យកាន់តែល្អប្រសើរថែមមួយកម្រិតទៀត ជាប្រយោជន៍ដល់ប្រជាជន និងប្រជាកសិករកម្ពុជា។

រូបតំណាង

ក្រសួងកសិកម្ម បានឱ្យដឹងថា កិច្ចប្រជុំនេះ បានផ្តោតជាសំខាន់លើប្រធានបទ៖

ទី១. ពិនិត្យ ពិចារណាឱ្យបានល្អិតល្អន់អំពីទីតាំងដែលត្រូវជ្រើសរើសសម្រាប់បង្កើតផ្សារ និងត្រូវបន្តជួបពិភាក្សាជាមួយគ្រប់ភាគីពាក់ព័ន្ធដូចជាមន្ត្រីជំនាញ វិស័យឯកជន សហគ្រាសខ្នាតតូច និងមធ្យម ដៃគូអភិវឌ្ឍន៍តាមអភិក្រម "រដ្ឋ-ឯកជន-ដៃគូអភិវឌ្ឍន៍-និងសហគមន៍"។

ទី២. បន្តជំរុញកិច្ចសហការជាមួយអគ្គនាយកដ្ឋានកសិកម្មលើការងារច្បាប់ និងបច្ចេកទេស៕

អត្ថបទ៖ សំភី