រដ្ឋមន្ត្រី លើកពីភាពចាំបាច់នៃមជ្ឈមណ្ឌលពាណិជ្ជកម្មកម្ពុជា នៅក្រុងធំៗរបស់ចិន

2019-01-23 06:32:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានលើកឡើង ពីការបង្កើតមជ្ឈមណ្ឌលពាណិជ្ជកម្មកម្ពុជា នៅតាមទីក្រុងធំៗនៃប្រទេសចិន ដូចជា៖ ក្វាងចូវ, ហាយនីង, ស៊ីអាន និងហុងកុង ដែលបច្ចុប្បន្នកំពុងដើរតួនាទីយ៉ាងសំខាន់ ក្នុងការជំរុញវិស័យពាណិជ្ជកម្ម សេដ្ឋកិច្ច ទេសចរណ៍ និងវប្បធម៌ នៃប្រទេសទាំងពីរ។

ប្រសាសន៍របស់លោករដ្ឋមន្ត្រីពាណិជ្ជកម្ម ធ្វើឡើងក្នុងវេទិកាជំរុញពាណិជ្ជកម្ម និងវិនិយោគកម្ពុជា-ចិន ឆ្នាំ២០១៩ កាលពីព្រឹកថ្ងៃអង្គារ៍ ទី២២ ខែមករា ឆ្នាំ២០១៩ ក្រោមវត្តមានអញ្ជើញចូលរួមពី សម្តេច ហ៊ុន សែន រួមជាមួយគណៈប្រតិភូជាន់ខ្ពស់នៃរាជរដ្ឋាភិបាលកម្ពុជា និងរដ្ឋាភិបាលចិន ព្រមទាំងវិស័យឯកជន សរុបជាង ៨០០នាក់។

លោករដ្ឋមន្ត្រីបានបន្ថែមថា នៅថ្ងៃខាងមុខ ក្រសួងពាណិជ្ជកម្ម ក៏មានគម្រោងបង្កើតមជ្ឈមណ្ឌលពាណិជ្ជកម្មថែមទៀត នៅទីក្រុងប៉េកាំង, គុនមីង, និងទីក្រុងផ្សេងៗទៀតផងដែរ។ លោកបន្តថា ទំហំពាណិជ្ជកម្មទ្វេភាគីកម្ពុជា និងចិន កាលពីឆ្នាំ២០១៧ សម្រេចបានទឹកប្រាក់ ៥ ពាន់លានដុល្លារអាមេរិក តាមផែនការកំណត់ ព្រមទាំងផែនការបង្កើត ឲ្យបានដល់ ៦ ពាន់លានដុល្លារ នៅឆ្នាំ២០២០ និង ១០ ពាន់លានដុល្លារ នៅត្រឹមឆ្នាំ២០២៣។

សូមជម្រាបថា វេទិកាជំរុញពាណិជ្ជកម្ម វិនិយោគកម្ពុជា-ចិន គឺជាជំនួបសម្រាប់វិស័យឯកជន ដើម្បីទទួលបានអនុសាសន៍ពីប្រមុខរដ្ឋាភិបាលនៃប្រទេសទាំងពីរ ហើយក៏ជាឱកាសសម្រាប់វិនិយោគិនចិន ក្នុងការស្វែងយល់អំពីគោលនយោបាយ និងវិស័យសក្ដានុពលសំខាន់ៗរបស់កម្ពុជា ដើម្បីធ្វើពាណិជ្ជកម្ម និងវិនិយោគទុន ស្របតាមគំនិតផ្ដួចផ្ដើមខ្សែក្រវាត់ និងផ្លូវ របស់លោក ស៊ី ជិនពីង ប្រធានាធិបតីចិន៕

រូប៖ ក្រសួងពាណិជ្ជកម្ម

អត្ថបទ៖ លាភ.