ឡាវ សម្រេចឈប់យកពន្ធលើទំនិញជាង ៨ពាន់មុខ ដែលនាំចូលពីប្រទេសអាស៊ាន
- 2019-01-23 09:00:52
- ចំនួនមតិ 0 | ចំនួនចែករំលែក 0
ឡាវ សម្រេចឈប់យកពន្ធលើទំនិញជាង ៨ពាន់មុខ ដែលនាំចូលពីប្រទេសអាស៊ាន
ចន្លោះមិនឃើញ
រដ្ឋាភិបាលឡាវ បានសម្រេចបញ្ឈប់ការយកពន្ធ (ពន្ធ ០%) លើទំនិញប្រមាណ ៨៥៣៦មុខ ដែលនាំចូលពីប្រទេសសមាជិកអាស៊ាន ដើម្បីចូលរួមចំណែកបង្កើតនូវតំបន់ពាណិជ្ជកម្មសេរីអាស៊ាន។ នេះបើតាមការចុះផ្សាយរបស់ Vientiane Times នៅថ្ងៃទី២៣ ខែមករា ឆ្នាំ២០១៩ ដោយដកស្រង់ចេញពីរបាយការណ៍ក្នុងកិច្ចប្រជុំមួយរបស់ក្រសួងផែនការ និងវិនិយោគនៃប្រទេសឡាវ កាលពីពេលថ្មីៗនេះ។
ទំនិញទាំងនេះ គឺស្មើនឹង ៨៩% នៃទំនិញសរុប ដែលឡាវបានធ្វើពាណិជ្ជកម្មជាមួយប្រទេសក្នុងតំបន់នេះ ក្រោមកិច្ចព្រមព្រៀងពាណិជ្ជកម្មទំនិញអាស៊ាន (ATIGA)។ ចំណែកទំនិញណាដែលឡាវយល់ឃើញថា មានសារៈសំខាន់សម្រាប់ស្ថិរភាពសេដ្ឋកិច្ច គឺបន្តការយកពន្ធដដែល ពោលគឺមានប្រមាណ ៣២៥មុខទំនិញ។
មន្រ្តីដដែលបន្តថា រដ្ឋាភិបាលឡាវ បានកំណត់ពន្ធតម្លៃបន្ថែម (VAT) ១០% លើទំនិញនាំចូល ដែលជាផ្នែកនៃកិច្ចប្រឹងប្រែង បង្កើនចំណូលក្នុងរយៈពេលប៉ុន្មានឆ្នាំនេះ។
ឡាវបានចាប់ផ្តើមអនុវត្តកិច្ចព្រមព្រៀងពាណិជ្ជកម្មសេរីអាស៊ាន ក្នុងឆ្នាំ២០១៥។ ក្នុងនាមជាប្រទេសអភិវឌ្ឍន៍តិចតួច និងជាប្រទេសសមាជិកអាស៊ានថ្មីមួយដែរនោះ ឡាវ អាចពន្យារការអនុវត្តកិច្ចព្រមព្រៀងនេះដោយពេញលេញ ដល់ឆ្នាំ២០១៨។
សូមជម្រាបថា គោលបំណងចម្បងនៃតំបន់ពាណិជ្ជកម្មសេរីអាស៊ាន និងការលុបបំបាត់ពន្ធនាំចូល គឺធ្វើឡើងដើម្បីជំរុញពាណិជ្ជកម្មក្នុងតំបន់ដែលមានប្រជាជនប្រមាណ ៦០០លាននាក់នេះ។ ការលុបបំបាត់ពន្ធគយនេះ គឺដើម្បីជួយឱ្យអ្នកផលិត និងអ្នកជំនួញ ក្នុងតំបន់អាស៊ាន អាចចែកចាយទំនិញរបស់ពួកគេ កាន់តែសេរី និងកាត់បន្ថយបាននូវការចំណាយថ្លៃដើមប្រតិបត្តិការពាណិជ្ជកម្មផងដែរ។ លំហូរទំនិញដោយសេរីនេះ ក៏នឹងជួយទាក់ទាញអ្នកវិនិយោគនៅក្រៅតំបន់ ឱ្យចូលមកវិនិយោគ ដើម្បីបង្កើតការងារដល់ប្រជាជនក្នុងប្រទេសសមាជិកអាស៊ានផងដែរ៕