ប្រភពថាមពលអគ្គិសនីកម្ពុជា ដែលនាំចូលពីប្រទេសជិតខាង ត្រូវបានកាត់បន្ថយមកនៅត្រឹមជាង ១៤%

2019-01-24 02:41:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រភពថាមពលអគ្គិសនីរបស់កម្ពុជា ដែលនាំចូលពីប្រទេសជិតខាង ត្រូវបានកាត់បន្ថយមកនៅត្រឹម ១៤,១៥% នៅឆ្នាំ២០១៨ ពោលគឺបានថយចុះជាបន្តបន្ទាប់ពី ៤០,០៦% នៅឆ្នាំ២០១៤។ នេះបើតាមរបាយការណ៍របស់អាជ្ញាធរអគ្គិសនីកម្ពុជា ដែលត្រូវបានផ្សព្វផ្សាយក្នុងសន្និបាតបូកសរុបការងារត្រួតពិនិត្យ និងគ្រប់គ្រងការធ្វើសេវាកម្មអគ្គិសនីនៅកម្ពុជាឆ្នាំ២០១៨ កាលពីថ្ងៃទី២៣ ខែមករា ឆ្នាំ២០១៩។

របាយការណ៍នេះបង្ហាញថា នៅចុងឆ្នាំ២០១៨ បរិមាណថាមពលអគ្គិសនីដែលបានផ្តល់សរុបមាន ៩៣០៧,៤៤លានគីឡូវ៉ាត់ម៉ោង គឺកើនឡើង ១,៩១ដង ក្នុងអំឡុងឆ្នាំ២០១៤ ដល់ឆ្នាំ២០១៨។ ប្រភពផលិតអគ្គិសនីក្នុងស្រុកមានអានុភាព ២២០៧,៧៦ មេហ្គាវ៉ាត់ ដោយនៅអាណត្តិទី៥ (២០១៤-២០១៨) ការអភិវឌ្ឍប្រភពអគ្គិសនីបានបន្ថែមអានុភាព ១០៩៩,២មេហ្គាវ៉ាត់។ ទន្ទឹមនឹងនេះ ក៏បានបញ្ឈប់ដំណើរការប្រភពអគ្គិសនីប្រើប្រេងខ្មៅ ៥២,៧មេហ្គាវ៉ាត់ និងលុបបំបាត់ការផលិតអគ្គិសនីប្រើម៉ាស៊ីនម៉ាស៊ូតរបស់អ្នកកាន់អាជ្ញាបណ្ណអស់ ៣៦,២៣មេហ្គាវ៉ាត់។

គិតត្រឹមចុងឆ្នាំ២០១៨ អាជ្ញាធរអគ្គិសនីកម្ពុជាបានផ្តល់ដែនអាជ្ញាបណ្ណឲ្យក្រុមហ៊ុនរដ្ឋ និងឯកជនចំនួន ១៤ ០៧២ភូមិ ស្មើ ៩៩,៣២% នៃចំនួនភូមិសរុប ១៤ ១៦៨ ខណៈ ការសាងសង់បណ្តាញចែកចាយអគ្គិសនីបានទៅដល់ភូមិចំនួន ១២ ៣០៥ ស្មើ ៨៦,៨៥%។ ទន្ទឹមនឹងនេះ វឌ្ឍនភាពនៃការភ្ជាប់ចរន្តអគ្គិសនីឲ្យអ្នកប្រើប្រាស់គ្រប់ប្រភេទមានចំនួន ២ ៦៤៥ ៦៣០កន្លែង ដែលក្នុងនោះ លំនៅឋានមានចំនួន ២ ៥៣៧ ២៨២ខ្នងផ្ទះ អាជីវកម្មនិងឧស្សាហកម្មមានចំនួន ១០២ ៣៧៦ កន្លែង និងស្ថាប័នរដ្ឋមានចំនួន ៥៩៧២កន្លែង។

បើតាមលោក វ៉ិចទ័រ ហ្ស៊ូណា អ្នកនាំពាក្យក្រសួងរ៉ែ និងថាមពល បានឲ្យដឹងកាលពីដើមខែមករានេះថា រាជរដ្ឋាភិបាលគ្រោងនឹងបង្កើនលទ្ធភាពនៃការផ្គត់ផ្គង់ថាមពលអគ្គិសនី ឲ្យដល់ជាង ២៨៧០មេហ្គាវ៉ាត់ ដើម្បីឆ្លើយតបទៅនឹងតម្រូវការប្រើប្រាស់របស់ប្រជាពលរដ្ឋ និងកំណើនការពង្រីករោងចក្រសហគ្រាសនៅកម្ពុជា។

លោកបន្តថា ប្រភពថាមពលដែលទទួលបានគឺមកពីរោងចក្រផលិតធ្យូងថ្មនៅខេត្តព្រះសីហនុ ការបើកឱ្យដំណើរការពេញលេញនៃរោងចក្រផលិតថាមពលអគ្គិសនីវារីអគ្គិសនីសេសានក្រោម២ និងគម្រោងដាក់ឱ្យប្រើប្រាស់ថាមពលអគ្គិសនីដើរដោយថាមពលពន្លឺព្រះអាទិត្យនៅចុងឆ្នាំ២០១៩ខាងមុខនេះ។ បន្ថែមពីនេះទៀត គឺការនាំចូលប្រភពថាមពលអគ្គិសនីពីប្រទេសជិតខាងដូចជា ប្រទេសវៀតណាម ចំនួន ២៧៧មេហ្គាវ៉ាត់, ថៃចំនួនជាង ១៣៥ មេហ្គាវ៉ាត់ និងពីប្រទេសឡាវចំនួន ៣០មេហ្គាវ៉ាត់៕

អត្ថបទ៖ សំភី