គម្រោងសាងសង់ស្ពានឆ្លងទន្លេមេគង្គ ទៅតំបន់ស្វាយជ្រុំ ស្ថិតក្រោមការសិក្សារបស់កូរ៉េ
- 2019-01-24 03:50:02
- ចំនួនមតិ 0 | ចំនួនចែករំលែក 0
គម្រោងសាងសង់ស្ពានឆ្លងទន្លេមេគង្គ ទៅតំបន់ស្វាយជ្រុំ ស្ថិតក្រោមការសិក្សារបស់កូរ៉េ
ចន្លោះមិនឃើញ
អ្នកនាំពាក្យក្រសួងសាធារណការ និងដឹកជញ្ជូនបានបានអះអាងថា គម្រោងសាងសង់ ស្ពានឆ្លងពីជ្រោយចង្វារទៅកាន់តំបន់ស្វាយជ្រុំមិនអាចដំណើរបាននៅឡើយទេ ក្រោយពី ប្រគល់សិទ្ធិឲ្យប្រទេសកូរ៉េខាងត្បូង សិក្សាបន្ទាប់ពីចិន។ នេះបើតាមការចុះផ្សាយរបស់ AKP កាលពីថ្ងៃទី២៣ ខែមករា ឆ្នាំ២០១៩។
លោក វ៉ាស៊ីម សូរិយា អ្នកនាំពាក្យក្រសួងសាធារណការ និងដឹកជញ្ជូនបានប្រាប់ ទីភ្នាក់ងារសារព័ត៌មាន កម្ពុជា AKPកាលពីថ្ងៃទី២៣ ខែមករា ឆ្នាំ២០១៩ថា គម្រោងសាងសង់ ស្ពានជ្រោយចង្វារ-ស្វាយជ្រុំ ត្រូវបានភាគីចិនសិក្សាចប់ម្តងរួចមកហើយ។ ប៉ុន្តែបច្ចុប្បន្ននេះ ស្ថិតក្រោមការសិក្សាគម្រោងរបស់ភាគីប្រទេសកូរ៉េខាងត្បូងវិញម្តង ដែលការសិក្សានេះ ក៏មិនដឹងចប់ពេលណាដែរ។
សូមរំឭកថា ប្រមុខរាជរដ្ឋាភិបាលកម្ពុជា សម្តេច ហ៊ុន សែន បានប្រកាស ក្នុងឱកាសអញ្ជើញសម្ពោធបើកដាក់ឲ្យប្រើប្រាស់ផ្លូវ ៦០ម៉ែត្រ កាលពីឆ្នាំ២០១៧ ដោយបានលើក ឡើងពីគម្រោងសាងសង់ស្ពានភ្ជាប់រវាងតំបន់ក្តីតាកុយ ភ្ជាប់ទៅកាន់តំបន់អរិយក្សត្រ និងពីផ្លូវកែវ ចិន្តា នាតំបន់ជ្រោយចង្វារ ភ្ជាប់ទៅកាន់តំបន់ស្វាយជ្រុំ ស្ថិតក្នុងឃុំស្វាយជ្រុំ ស្រុក ល្វាឯម ខេត្តកណ្តាល នាអំឡុងឆ្នាំ២០១៩នេះ។
យោងតាមសេចក្តីប្រកាសរបស់ក្រសួងការបរទេស និងសហប្រតិបត្តិការអន្តរជាតិ ចេញកាលពីថ្ងៃទី១២ ខែមីនា ឆ្នាំ២០១៨កន្លងទៅនេះ បានឲ្យដឹងដែរថា កូរ៉េខាងត្បូងបាន យល់ព្រមទទួលសំណើរបស់សម្ដេចនាយករដ្ឋមន្រ្តី ហ៊ុន សែន ក្នុងការជួយសាងសង់ស្ពានមិត្តភាពកម្ពុជា-កូរ៉េ ឆ្លងកាត់ទន្លេមេគង្គពីរាជធានីភ្នំពេញទៅត្រើយម្ខាង។
ក្នុងជំនួបសម្ដែងការគួរសមជាមួយលោកឯកអគ្គរដ្ឋទូតកូរ៉េ Oh Nak-Young កាលពីពេលកន្លងមកនេះ សម្តេច ហ៊ុន សែន បានថ្លែងថា កម្ពុជាមានស្ពានមិត្តភាពពីប្រទេសចិន និងជប៉ុនរួចទៅហើយ ដូច្នេះ កម្ពុជានឹងមានសេចក្ដីរីករាយយ៉ាងខ្លាំងដែលមានស្ពានមិត្តភាពកម្ពុជា-កូរ៉េ ផងដែរ៕