កម្ពុជា-ADB ចុះ MoU ស្តីពីការរៀបចំកិច្ចប្រជុំលើកទី៧ នៃគណៈកម្មាធិការរួមអនុវត្តកិច្ចព្រមព្រៀងដឹកជញ្ជូនឆ្លងកាត់ព្រំដែន

2019-01-24 06:56:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងសាធារណការ និងដឹកជញ្ជូន និងធនាគារអភិវឌ្ឍន៍អាស៊ី បានចុះហត្ថលេខាលើអនុស្សារណៈនៃការយោគយល់ ស្តីពីការរៀបចំកិច្ចប្រជុំលើកទី៧ នៃគណៈកម្មាធិការរួមអនុវត្តកិច្ចព្រមព្រៀងដឹកជញ្ជូនឆ្លងកាត់ព្រំដែន។ កិច្ចប្រជុំនេះ នឹងប្រព្រឹត្តទៅនៅខែមីនា ឆ្នាំ២០១៩ ក្នុងទឹកដីអង្គរនៃខេត្តសៀមរាប។

កាលពីថ្ងៃទី២៣ ខែមករា ឆ្នាំ២០១៩ លោក តូច ចាន់កុសល រដ្ឋមន្ត្រីស្ដីទីនៃក្រសួងសាធារណការ និងដឹកជញ្ជូន បានជួបពិភាក្សាទ្វេភាគីជាមួយគណៈប្រតិភូធនាគារអភិវឌ្ឍន៍អាស៊ី (ADB) ដោយមានការចូលរួមពីមន្ត្រីជាន់ខ្ពស់ក្រសួងផងដែរ។

លោករដ្ឋមន្ត្រីស្ដីទី បានឱ្យដឹងថា កម្ពុជានឹងទទួលធ្វើជាម្ចាស់ផ្ទះក្នុងការរៀបចំ និងធ្វើជាប្រធាន បន្តវេនតាមលំដាប់អក្សរឡាតាំងនូវកិច្ចប្រជុំលើកទី៧នៃគណៈកម្មាធិការរួមសម្រាប់អនុវត្តកិច្ចព្រមព្រៀង ដឹកជញ្ជូនឆ្លងកាត់ព្រំដែន ក្រោមក្របខណ្ឌមហាអនុតំបន់មេគង្គ (GMS-CBTA) និងកិច្ចប្រជុំគណៈកម្មាធិការជាតិសម្រួលការដឹកជញ្ជូនឆ្លងដែន ដែលគ្រោងនឹងប្រព្រឹត្តទៅក្នុងខែមីនា ឆ្នាំ២០១៩ នៅទីក្រុងសៀមរាប ខេត្តសៀមរាប។

លោក តូច ចាន់កុសល (រូបថត៖ ផ្តល់ឱ្យ)

ភាគីទាំងពីរបានជជែកពិភាក្សាលម្អិតលើការបែងចែកការទទួលខុសត្រូវ និងរបៀបវារៈដើម្បីត្រៀមរៀបចំកិច្ចប្រជុំនេះឱ្យមានភាពរលូន និងបានចុះហត្ថលេខាលើអនុស្សារណៈនៃការយោគយល់ស្តីពីការរៀបចំកិច្ចប្រជុំលើកទី៧ នៃគណៈកម្មាធិការអនុវត្តកិច្ចព្រមព្រៀងសម្រួលការដឹកជញ្ជូនឆ្លងកាត់ព្រំដែនក្នុងក្របខណ្ឌមហាអនុតំបន់មេគង្គ (7th JC GMS CBTA)។

គួររំលឹកផងដែរថា បន្ទាប់ពីការចូលជាធរមាននូវកិច្ចព្រមព្រៀងដឹកជញ្ជូនឆ្លងកាត់ព្រំដែន (CBTA) ក្នុងឆ្នាំ២០១៥ ក្រុមរដ្ឋមន្រ្តីមហាអនុតំបន់មេគង្គ បានពិភាក្សាលើបែបបទសម្រាប់អនុវត្តឱ្យបានពេញលេញដែលក្នុងនោះរួមមាន៖

១. ការផ្តល់និងចេញលិខិតអនុញ្ញាតដឹកជញ្ជូនឆ្លងកាត់ព្រំដែនទៅឱ្យប្រតិបត្តិករឆ្លងដែនដែលជាវិធានការ/បទបញ្ញត្តិបន្ទាន់សម្រាប់អនុវត្តកិច្ចព្រមព្រៀងCBTA។

២. ការធ្វើបច្ចុប្បន្នភាពបទបញ្ញត្តិនៃមាត្រា CBTAនិងទិសដៅបន្ត រាប់បញ្ចូលទាំងថាតើធ្វើដូចម្តេចដើម្បីធានាថាCBTA ជាកិច្ចព្រមព្រៀងមួយមានសារៈសំខាន់

និង៣. ពេលវេលាជាក់លាក់សម្រាប់ការអនុវត្តCBTA ឱ្យបានពេញលេញ៕

អត្ថបទ៖ សំភី