សហព័ន្ធ អំពាវនាវឲ្យប្រជាពលរដ្ឋជួយទិញអង្ករកម្ពុជា
- 2019-01-24 07:10:37
- ចំនួនមតិ 0 | ចំនួនចែករំលែក 0
សហព័ន្ធ អំពាវនាវឲ្យប្រជាពលរដ្ឋជួយទិញអង្ករកម្ពុជា
ចន្លោះមិនឃើញ
សហព័ន្ធស្រូវអង្ករកម្ពុជា (ស.អ.ក) បានធ្វើការអំពាវនាវដល់ប្រជាពលរដ្ឋខ្មែរទាំងអស់ ជួយគាំទ្រតាមរយៈការទិញអង្ករកម្ពុជា ដើម្បីពង្រឹងទីផ្សារក្នុងស្រុក និងជួយគាំទ្រដល់ប្រជាកសិករខ្មែរ ក៏ដូចជាវិស័យស្រូវអង្ករកម្ពុជាទាំងមូល។ នេះបើតាមសេចក្ដីថ្លែងការណ៍របស់ ស.អ.ក កាលពីថ្ងៃទី២២ ខែមករា ឆ្នាំ២០១៩។
ការអំពាវនាវនេះ គឺបន្ទាប់ពី សហភាពអឺរ៉ុប កាលពីថ្ងៃទី១៦ ខែមករា ឆ្នាំ២០១៩ បានសម្រេចលើការយកពន្ធលើអង្ករសម្រិតប្រភេទ Indica (មានលេខកូដសម្គាល់ 1006 30 27, 1006 30 48, 1006 30 67 និង 1006 30 98) ក្នុងរយៈពេល ៣ឆ្នាំពីកម្ពុជា ដោយលើកលែងចំពោះអង្ករសម្រូប អង្ករបាក់ និងប្រភេទអង្ករផ្សេងទៀតរបស់កម្ពុជា ទៅទីផ្សារអឺរ៉ុប។
សេចក្ដីថ្លែងការណ៍របស់ ស.អ.ក បានឲ្យដឹងថា ការសម្រេចដាក់ពន្ធនេះ មានលក្ខណៈឆាប់រហ័សពេក នៅពេលដែលវិស័យស្រូវអង្ករកម្ពុជា ត្រូវការពេលប៉ុន្មានឆ្នាំទៀត ដើម្បីពង្រឹងខ្លួនឲ្យបានរឹងមាំគ្រប់គ្រាន់ ក្នុងការប្រកួតប្រជែង ដោយមិនអាស្រ័យលើការអនុគ្រោះពន្ធបាន។ ការយកពន្ធនេះ នឹងធ្វើឲ្យប៉ះពាល់ដល់ការប្រកួតប្រជែង និងមានការពិបាកនាំចូលអង្ករពីកម្ពុជា ទៅកាន់សហភាពអឺរ៉ុប ដោយសារកម្ពុជាមិនបានត្រៀមខ្លួនពេញលេញ។
សេចក្ដីថ្លែងការណ៍របស់ ស.អ.ក ឲ្យដឹងទៀតថា ក្រោយពីជួបប្រជុំពិភាក្សាគ្នាទៅលើផលប៉ះពាល់នៃការដាក់ពន្ធនេះ ស.អ.ក នឹងព្យាយាមតវ៉ាទៅអន្តរជាតិ និងព្យាយាមពង្រឹងការប្រកួតប្រជែង តាមរយៈការកាត់បន្ថយចំណាយថ្លៃដើម និងពង្រីកទីផ្សារដោយធ្វើការជាមួយក្រសួង ស្ថាប័នពាក់ព័ន្ធ ជាពិសេសក្រុមការងារទី៩ នៃវេទិការាជរដ្ឋាភិបាល និងវិស័យឯកជនផ្នែកស្រូវអង្ករ ដើម្បីជំរុញការប្រកួតប្រជែង និងព្យាយាមជំរុញម៉ាកសញ្ញាអង្ករប្រណីតកម្ពុជា ម្លិះអង្គរ ដែលជាម៉ាកសញ្ញាសម្រាប់សម្គាល់អង្ករ ដែលទទួលបានបានរង្វាន់អង្ករល្អជាងគេ នៅលើពិភពលោកទៅកាន់ទីផ្សារអន្តរជាតិនានា។
សហព័ន្ធស្រូវអង្ករកម្ពុជា ចាត់ទុកការសម្រេចដាក់ពន្ធនេះ ជាជំហានថយក្រោយរវាងសហភាពអឺរ៉ុប និងកម្ពុជា ដែលបានកសាងកន្លងមក៕