ចិន កំពុងសាងសង់ ឧទ្យានច្នៃប្រឌិតវប្បធម៌ ដ៏ធំមួយនៅខេត្តសៀមរាប

2019-01-28 02:34:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅក្នុងដំណើរទស្សនកិច្ចនៅខេត្តសៀមរាប កាលពីរសៀលថ្ងៃទី២៧ ខែមករា ឆ្នាំ២០១៩ លោក ឡ ស៊ូកាង (Luo Shugang) រដ្ឋមន្រ្តីក្រសួងវប្បធម៌និងទេសចរណ៍ នៃសាធារណរដ្ឋប្រជាមានិតចិន បានចុះទៅពិនិត្យមើលការដ្ឋានសាងសង់ឧទ្យានច្នៃប្រឌិតវប្បធម៌កម្ពុជា-ចិនដ៏ធំមួយ ដែលស្ថិតនៅក្នុងបរិវេណសណ្ឋាគារសុខាសៀមរាប ខេត្តសៀមរាប។ នេះបើតាមការចុះផ្សាយរបស់ AKP កាលពីថ្ងៃទី២៧ ខែមករា ឆ្នាំ២០១៩។

ប្លង់គំរូ ឧទ្យានច្នៃប្រឌិតវប្បធម៌កម្ពុជា-ចិន នៅខេត្តសៀមរាប

លោក Liu Zhijie ប្រធានការិយាល័យកុងស៊ុលចិនប្រចាំនៅខេត្តសៀមរាប បានឲ្យដឹងថា ឧទ្យានច្នៃប្រឌិតវប្បធម៌កម្ពុជា-ចិននេះ ត្រូវបានក្រុមហ៊ុនចិន Yunnan Cultural Industry Investment Holding Group បានបណ្ដាក់ទុនជាង ៧០ លានដុល្លារ ដើម្បីសាងសង់ ហើយកំពុងសាងសង់លើផ្ទៃដីសរុបប្រមាណ ៣,៣ ហិកតា ដែលក្រោយពេលសាងសង់រួច ឧទ្យាននេះនឹងក្លាយជាបណ្ដុំនៃតំបន់ទេសចរណ៍បែបវប្បធម៌ រួមមាន រោងមហោស្រពញញឹមអង្គរ ចំនួន ១៥០០កៅអី, សារមន្ទីរ Zhou Daguan, មជ្ឈមណ្ឌលវប្បធម៌សម័យចេនឡា, មជ្ឈមណ្ឌលផ្លាស់ប្តូរវប្បធម៌កម្ពុជា-ចិន, មជ្ឈមណ្ឌលពិព័រណ៍ផលិតផលវប្បធម៌ និងភោជនីយដ្ឋាន ជាដើម។

បើតាមការឲ្យដឹងពីតំណាងរបស់ក្រុមហ៊ុន គម្រោងនេះ គ្រោងសាងសង់ឲ្យរួចរាល់ នៅត្រឹមឆ្នាំ២០២០ និងបើកឲ្យភ្ញៀវទេសចរចូលទស្សនាឈ្វេងយល់ពីវប្បធម៌ខ្មែរ និងចិន។

លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាបបានឲ្យដឹងថា ឧទ្យានច្នៃប្រឌិតវប្បធម៌កម្ពុជា-ចិន គឺមានសារសំខាន់ណាស់សម្រាប់បង្ហាញវប្បធម៌កម្ពុជា-ចិន ជាពិសេសការបង្ហាញពីវប្បធម៌ខ្មែរ ព្រោះនៅក្នុងឧទ្យានច្នៃប្រឌិតវប្បធម៌កម្ពុជា-ចិន មានសម្ដែងពីវប្បធម៌ខ្មែរ ដូចជាការ កសាងអង្គរ ចម្បាំងរបស់កងទ័ពខ្មែរនៅសម័យបុរាណ និងការបង្ហាញពីទំនៀមទម្លាប់ប្រពៃណីខ្មែរជាច្រើនទៀត។

លោកបានបញ្ជាក់ថា ឧទ្យានច្នៃប្រឌិតវប្បធម៌កម្ពុជា-ចិន នឹងធ្វើឲ្យទំនាក់ទំនងផ្នែកវប្បធម៌កម្ពុជា-ចិនកាន់តែរឹងមាំ ជាពិសេសនឹងទាក់ទាញភ្ញៀវទេសចរចិន ឲ្យមកទស្សនាកម្ពុជាកាន់តែច្រើនបន្ថែមទៀត ព្រោះបច្ចុប្បន្ននេះ ចិនគឺជាទីផ្សារទេសចរណ៍ដ៏សំខាន់របស់កម្ពុជា៕

រូប៖ AKP

អត្ថបទ៖ លាភ.