ក្រសួងការបរទេស នឹងរៀបចំកិច្ចប្រជុំពិគ្រោះយោបល់រវាងរាជរដ្ឋាភិបាលកម្ពុជា និង NGO បរទេស

2019-01-28 04:12:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងការបរទេស និងសហប្រតិបត្តិការអន្តរជាតិ នឹងរៀបចំកិច្ចប្រជុំពិគ្រោះយោបល់រវាងរាជរដ្ឋាភិបាលកម្ពុជា និងអង្គការមិនមែនរដ្ឋាភិបាលបរទេស នាថ្ងៃទី២៩ ខែមករា ឆ្នាំ២០១៩ នៅទីស្តីការក្រសួងការបរទេស។ លោក ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីការបរទេស នឹងអញ្ជើញធ្វើជាអធិបតីក្នុងពិធីបើកកិច្ចប្រជុំនេះ។ លោកនឹងថ្លែងសុន្ទរកថាបើក ដោយផ្តោតទាំងស្រុងលើវត្តមាន និងការរួមចំណែករបស់អង្គការមិនមែនរដ្ឋាភិបាលបរទេសក្នុងស្រុក នៅក្នុងកិច្ចអភិវឌ្ឍសេដ្ឋកិច្ច-សង្គមកម្ពុជា ព្រមទាំងសិទ្ធិនិងកាតព្វកិច្ចរបស់ពួកគេ ក្រោមច្បាប់ស្តីពីសមាគម និងអង្គការមិនមែនរដ្ឋាភិបាល។

លោក ប្រាក់ សុខុន ថ្លែងនាពេលកន្លងមក

អញ្ជើញចូលរួមក្នុងកិច្ចប្រជុំនេះ រួមមាន តំណាងក្រសួង និងស្ថាប័នពាក់ព័ន្ធនានារបស់កម្ពុជា និងតំណាងអង្គការមិនមែនរដ្ឋាភិបាលបរទេស ដែលសរុបទាំងអស់ប្រមាណ ៣០០នាក់។ គួរកត់សម្គាល់ថា នេះគឺជាកិច្ចប្រជុំលើកទី១ ដែលក្រសួងការបរទេស និងសហប្រតិបត្តិការអន្តរជាតិរៀបចំឡើងក្នុងគោលបំណងផ្លាស់ប្តូរទស្សនទានដោយស្មោះត្រង់ និងពង្រឹងកិច្ចសហប្រតិបត្តិការរវាងរាជរដ្ឋាភិបាលកម្ពុជា និងអង្គការមិនមែនរដ្ឋាភិបាលបរទេស។

លោក កេត សោផាន់ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានថ្លែងប្រាប់ [ខ្លីៗ] នាព្រឹកថ្ងៃទី២៨ ខែមករា ឆ្នាំ២០១៩ថា អង្គការមិនមែនរដ្ឋាភិបាលបរទេស ដែលបានចុះបញ្ជីនៅក្រសួងការបរទេស មានចំនួនសរុប ៣៨៦ គិតត្រឹមថ្ងៃទី៣០ ខែធ្នូ ឆ្នាំ២០១៨៕

អត្ថបទ៖ សោភា